د سویلي آسټرالیا د تاریخ ټولنې او د دغه ایالت د کډوالو موزیم په نوښت د "صحرا غږونه" تر عنوان لاندې یو فرهنګي پروګرام جوړ شو چې د اوښبه افغانانو اولادونو په ګډون کړی و.
د دغه پروګرام موخه دا وه ترڅو د اوښبه افغانانو د ژوند کیسې او د هغوی د سفرونو خاطرې ثبت او مستند شي، ترڅو د موزیم او د هېواد د تاریخي آرشیف برخه وګرځي.
د اوښبه افغانانو د اولادونو ترڅنګ په دغه پروګرام کې د افغانستان سفیر، وحیدالله ویسي او د اډېلېډ ښار یو شمېر مېشتو افغانانو ګډون کړی و.
په آسټرالیا کې د افغانستان سفیر وحیدالله ویسي، په دې غونډه کې له ګډون څخه خوښي څرګنده کړې او ویلي یې دي چې د اوښبه افغانانو د اولادونو کیسې د آسټرالیا د داخلي ترانسپورت په جوړښت او همدارنګه د عبادت ځایونو په جوړولو کې د اوښبه افغانانو د مهمې او تلپاتې ونډې یادونه کوي.
هغه همدا راز زیاته کړې چې د اوښبه افغانانو د اولادونو لخوا بیان شوې کیسې نه یواځې دې خاورې ته د افغانانو د کډوالۍ برخه ده، بلکې دا د آسټرالیا د کلتوري او متمدن هویت په جوړولو کې د دوی بنسټیز رول منعکس کوي.
ښاغلي ویسي اس بي اس پښتو ته ویلي "د دې کیسو مستند کول نه یوازې د تاریخ د ساتنې یوه لاره ده، بلکې د هویت د بیا راژوندي کولو او راتلونکو نسلونو ته د لیږدولو لپاره یو کلتوري عمل هم دی."
"د اوښبه افغانانو کیسې ښيي چې زموږ ریښې څنګه د دې خاورې له جوړښت سره تړلې دي او څنګه یې د آسټرالیا د کلتوري هویت په جوړولو کې رول لوبولی دی."
"زه د دې ارزښتناکه نوښت تنظیم کونکو څخه مننه کوم، په ځانګړې توګه د سویلي آسټرالیا د تاریخ له ټولنې او د اوښبه افغانانو له پېژندل شوې تاریخ لیکونکې، ډاکټر پامیلا راجکووسکي څخه چې د کډ میراث د ژوندي ساتلو لپاره هڅې کوي."
په اډېلېډ ښار کې مېشت افغان عرفان عابدي هم په دې غونډه کې ګډون کړی او پر خپله فېسبوک پاڼه یې لیکلي چې په دغه پروګرام کې یې د رضاکارانه کار ویاړ درولود.
هغه لیکلي چې د اوښبه افغانانو کیسې اورېدل "زړه راښکونکې" وې او هغه ته یې دا یادونه کړې چې "له دې خاورې سره د افغان ټولنې اړیکه ژوره، تاریخي او تلپاتې ده.
هغه همدا راز زیاته کړې چې اوښبه افغانانو د آسټرالیا په جوړښت کې مهمه رول لوبولی دی.
د اس بي اس پښتو خپرونه دلته زمونږ پر ویب پاڼه یا هم د اس بي اس پر اپلیکیشن واورئ. تاسو کولای شئ د اس بي اس اپلیکیشن په وړیا توګه له اپل سټور یا ګوګل پلې څخه ترلاسه کړئ.
