د سایبري امنیت یو شمېر متخصصینو اعلان کړی چې د نړۍ په ۱۰۶ هېوادونو کې د شاوخوا ۵۳۳ میلیونو کسانو شخصي معلومات د دوي د فیسبوک له حسابونو څخه غلا شوي. د ۱۰۶ هېواونو په لېست کې د افغانستان، آسټرالیا، هندوستان، جرمني، فرانسې، انګلستان او امریکا نومونه لیدل کېږي.
په آسټرالیا کې د فیسبوک شبکې د شاوخوا ۷ میلیونو او په افغانستان کې د ۵۵۸ زره کسانو شخصي معلومات غلا شوي او آنلاین خپاره شوي دي.
د فسبوک شبکې د میلیونونو کاروونکو د شخصي معلوماتو له غلا وروسته، اوس په انلاین نړۍ کې د خلکو د شخصي معلوماتو د خوندیتوب په اړه اندیښنې نورې هم زیاتې شوي دي.
د فیسبوک شبکې مسئولین وايي چې هکرانو په ۲۰۱۹ کال کې د میلیونونو کاروونکو شخصي معلومات غلا کړي وه، مګر اوس تخنیکي ستونزه حل شوې او د نورو کاروونکو معلومات خوندي دي.
دا لومړی ځل ندی چې د فیسبوک د کارونکو معلومات غلا کېږي، تر دې وړاندې د ۲۰۲۰ کال په لومړیو کې هم دې ته ورته خبرونه خپاره شوي وه چې د فیسبوک د میلیونونو کاروونکو د ټلیفون شمېرې غلا شوي دي.
