پېښو ته د رسېدو په چارو کې د دولت وزارت مرستیال مولوي شرف الدین مسلم په یوې خبري ناسته کې خبریالانو ته ویلي چې په خوست، پکتیکا او ننګرهار ولایتونو کې د زلزلې له امله ۹۲۰ کسان مړه شوي او ۶۱۰ نور ټپیان دي.
ښاغلي مسلم ویلي چې د مړه شویو کسانو له کورنیو سره ۱۰۰ زره او له ټپیانو سره ۵۰ زره افغانۍ کمک کېږي.
نوموړي له نړیوالې ټولنې څخه غوښتنه کړې ترڅو د دغې پیښې له قربانیانو سره مرسته وکړي.
پېښو ته د رسېدو په چارو کې د دولت وزارت، د اړیکو او معلوماتو آمر، حسیب الله شیخانی له اس بي اس پښتو راډیو سره په خبرو کې ویلي چې د زلزلې ټکانونه په خوست، پکتیا، پکتیکا او ننګرهار ولایتونو کې ثبت شوې. مګر ډیری تلفات په پکتیکا او خوست ولایتونو کې خلکو ته اوښتي دي.
هغه وايي، د پکتیا ولایت په زلزله ځپلې سیمه کې مخابراتي شبکې کار نکوي له همدې امله د یاد ولایت په اړه تر اوسه دقیق معلومات په لاس کې نلري.
"په پکتیا کې د زلزلې ټکانونه په داسې ځای کې ثبت شوي چې تلیفوني شبکې کار نه کوي، له همدې امله یې جزیات وروسته شریکوو."
نوموړی وايي چې د زلزلې ترڅنګ، په ورستیو ورځو کې د سیلابونو له امله ۱۱ کسان وژل شوي او شاوخوا ۵۰ ټپیان شوي دي.
ښاغلی شیخانی له آسټرالیا او نورو ورته هېوادونو غواړي ترڅو د افغانستان خلکو سره مرسته وکړي.
" قربانیانو ته د ښې رسیدنې لپاره، دا اړینه ده چې مرستندویه هیوادونه لکه آسټرالیا او نور هېوادونه د افغانانو او د افغانستان له اغیزمنو خلکو سره مرسته وکړي."
