په اسټرالیا کې د محدودیتونو له کموالي سره، په دغه هېواد کې د سټار جېټ هوايي شرکت غواړي ترڅو ۱۰ زره ټکټونه په ټیټه بیه و پلوري. یاد شرکت یواځې د داخلي پروازونو بیې راټیټې کړي ترڅو خلک وکولای شي په ارزانه بیه ټکټونو د ددغه هېواد ۲۲ ښارونو ته سفر وکړي.
د اسټرالیا اوسیدونکي کولای شي په ۱۹ ډالره د الوتکې ټکټ واخلي او په هغه له خپل ښار څخه د اسټرالیا یو بل ښار ته سفر وکړي. د بېلګې په توګه د سیډنياوسیدونکي کولای شي په ۱۹ ډالره له سیډني ښار څخه ملبورن ښار ته سفر وکړي.
اوسمهال د اسټرالیا په ډېریو ایالتونو او سیمو کې وضعیت ښه ښکاري او په کرونا وېروس د اخته کسانو په شمېر کې د پام وړ کموالی راغلی. مګر په ویکټوریا ایالت کې هره ورځ یو زیات شمېر نوې پیښې ثبتېږي، له همدې امله په یاد ایالت کې یو ځل بیا محدودیتونه وضع شوي دي.
په اسټرالیا کې مېشت کسان باید د یو بل ترمنځ، له یو نیم متر څخه زیات فزیکي واټن وساتي.
د کرونا وېروس آزموینه اوسمهال د اسټرالیا په بېلابېلو سیمو کې ترسره کېږي. که چېرې تاسو باور لرئ چې تاسو هم ممکن په کرونا وېروس اخته شوي یاست، نو خپل ډاکټر ته زنګ ووهئ (لیدنه ونکړئ) یا د کرونا وېروس د معلوماتو له ملي مرکز سره په ۰۸۰ ۰۲۰ ۱۸۰۰ شمېره اړیکه ونیسئ. که تاسو په ساه اخیستلو کې ستونزه لرئ نو له 000 شمېرې سره اړیکه ونیسئ.
تاسو کولای شئ، د خپل موبایل له اپ سټور څخه د کوېډ سېف (COVIDSafe) اپلېکېشن ډاونلوډ کړئ.
د اس بي اس شبکه ژمنه ده ترڅو تاسو ته د کرونا وېروس په اړه ستاسو په ژبه باوري راپورونه چمتو کړي. دلته تاسو کولای شئ په ۶۳ ژبو خبرونه او معلومات پیدا کړئ: https://www.sbs.com.au/language/coronavirus
