د عادلانه کار کمیسیون (Fair Work Commission) نن د چهارشنبې په ورځ په رسمي ډول اعلان وکړ چې حد اقل معاش به ۵.۲ سلنه پورته ولاړ شي.
د عادلانه کار کمیسیون مشر ای - ین راس وايي چې حد اقل معاش به د جولای میاشتې له لومړۍ نېټې څخه په اوونۍ کې له ۷۷۲ ډالرو او ۶۰ سینټو څخه ۸۱۲ ډالرو او ۶۰ سینټو ته پورته شي.
هغه وايي: "انفلاسیون د کارګرانو د معاشونو حقیقي ارزښت له منځه وړي او د دوی د ژوند معیارونه ټیټوي."
"ټیټ عاید لرونکي خلک په ځانګړې توګه د انفلاسیون د زیاتوالي له امله زیان منونکي دي."
هغه همدا راز وايي چې د کمیسیون پریکړه به د هېواد په اقتصاد باندې "د پام وړ منفي" اغیزه ونلري.
یاد کمیسیون وايي چې د حداقل معاش په زیاتوالی سره به د ۲.۷ میلیونه کارګرانو په معاشونو کې زیاتوالی راشي.
د آسټرالیا لومړي وزیر انتوني البنیزی د خپل کمپاین پرمهال ویلي وه چې له بریا وروسته به په معاشونو کې زیاتوالی شي.
د عادلانه کار کمیسیون له اعلان وروسته ښاغلی البنیزی له رسنیو سره به خبرو کې ویلي، هغه کسان چې په آسټرالیا کې لږ معاش ترلاسه کوي هغوی اتلان دي او د دې مستحق دي ترڅو یې په معاشونو کې زیاتوالی راشي.
هغه وايي: "حقیقت دا دی چې ډیری هغه خلک چې په لږترلږه معاش کار کوي، اتلان دي چې موږ د وبا پرمهال ولیدل."
"دا کارګران زمونږ له مننې پرته د ډېر څه مستحق دي. دوي د معاش زیاتوالي مستحق دي او نن یې ترلاسه کړي"
