د سیډني په لویدیځ کې د ټلویزیوني نشراتو پرمهال یو عیسوی بشپ (د کلیسا او پادریانو د نظارت او رهبرۍ مسئول) او درې کلیسا ته تلونکي کسان په چړې وهل شوي دي.
پولیسو ویلي چې عملیات روان دي او یو تن یې نیولی دی.
پولیسو په یوه بیان کې ویلي: "افسرانو یو سړی نیولی او هغه له پولیسو سره په څېړنو کې مرسته کوي."
د نیو ساوت وېلز ایالت د امبولانس خدمتونو یوه ویاند ویلي چې د ماښام په ۷ بجو او ۱۵ دقیقو کلیسا ته بلل شوي او د یو تن ټپي درملنه یې د لیورپول روغتون ته له انتقال مخکې کړې ده.
په ټولنیزو رسنیو کې خپره شوې ویډیو ښیې چې یو سړی چې تور جامې یې اغوستي دي د مار ماري ایمانویل په نوم یو سړي ته چې د Christ the Good Shepherd کلیسا بشپ دی نږدې کېږي.
دغه کلیسا د سیډني په لویدیځ کې د واکیلي په سیمه کې موقعیت لري.
په داسې حال چې د دغې پېښې په اړه څېړنې دوام لري. د آسټرالیا د امامانو ملي شورا د یوې اعلامیې په خپرولو سره دغه پېښه غندلې ده.
په اعلامیې کې راغلي: "دا بریدونه وحشتناکه دي او په آسټرالیا کې هیڅ ځای نلري، په ځانګړې توګه د عبادت ځایونو او مذهبي مشرانو په وړاندې."
"موږ له ټولنې څخه غواړو چې ارام واوسي او د ټولو آسټرالیایانو د خوندیتوب او امنیت لپاره په ګډه کار وکړي."
دا په داسې حال کې ده چې د شبنې په ورځ (اپریل ۱۳مه) د سیډني ښار د بونډای جنکشن په وېسټفیلډ شاپنګ سنټر کې یو سړي ۶ کسان په چړې ووژل او لږترلږه ۱۲ کسان یې ټپیان کړل. په وژل شویو کسانو کې ۵ ښځې او یو سیکیورټي ګارډ شامل وو.
شریکول
