د روسیې حکومت اعلان کړی چې پر هغو هېوادونو د تېلو پلور بندوي چې د دغه هېواد پر تېلو او ګازو د لویدیځ لخوا ټاکل شوی حد پلي کوي.
د آسټرالیا په ګډون یو شمېر هېوادونو پرېکړه کړې ترڅو د روسیې د هر بېرل تېلو لپاره تر ۸۹ آسټرالیايي (۶۰ امریکايي) ډالرو ډېرې پیسې ورنکړل شي. دغه پرېکړه د ډسمبر د میاشتې له ۵ نېټې څخه د تطبیق وړ ده.
روسیه له سعودي عربستان څخه وروسته، په نړۍ کې د تېلو دویم لوی صادروونکی هېواد دی. که چېرې روسیه پر ځینو هېوادونو تېل بند کړي نو دا به د انرژۍ پر نرخونو د پام وړ ناوړه اغېز ولري.
د روسیې د ولسمشر ولادیمیر پوتین لخوا لاسلیک شوی امر به د فبرورۍ د میاشتې له لومړۍ نېټې څخه د ۶ میاشتو لپاره عملي شي.
په نړیوال مارکېټ کې اوسمهال د یو بېرل خامو تېلو بیه ۱۱۷ آسټرالیايي ډالره ده، مګر د روان کال په مارچ میاشت کې د یوه بېرل تېلو بیه ۱۷۷ آسټرالیایي ډالرو ته رسېدلې وه.
دا په داسې حال کې ده چې اوکراین له روسیې سره د خبرو لپاره چمتووالی نیسي.
تمه کېږي ترڅو د راتلونکي کال په فبرورۍ میاشت کې د روسیې او اوکراین ترمنځ د سولې لپاره یوه ناسته ترسره شي.
زموږ د فیسبوک پاڼې له لارې د مرکو او راپورونه اورېدولو ته دوام ورکړئ.
د آسټرالیا د تازه خبرونو او په زړه پورو موضوعاتو لپاره همدا اوس زمونږ ویب پاڼې ته ولاړ شئ.
که چېرې غواړئ په انګلیسي ژبه زمونږ خپرې شوې مقالې ولولئ، مهرباني وکړئ دلته کلیک کړئ.
زمونږ خپرونه دلته زمونږ پر ویب پاڼه یا هم د اس بي اس پر اپلیکیشن واورئ. تاسو کولای شئ د اس بي اس اپلیکیشن په وړیا توګه له اپل سټور یا ګوګل پلې څخه ترلاسه کړئ.
