د پوسټ نړیوال ورځ هر کال د نړۍ په بېلابېلو هېوادونو کې د پوسټي ادارو له لوري نمانځل کیږي، چې پکې بیلابیل فرهنګي، عامه پوهاوي او معلوماتي پروګرامونه ترسره کیږي.
افغانستان هم دا مهال د یونیورسل پستی اتحادیې غړیتوب لري او د افغان پوسټ دولتي شرکت ترڅنګ لسګونه خصوصي شرکتونه په دې برخه کې فعالیت کوي.
که څه هم پوستي خدمات په مدرن ژوند کې حیاتي ارزښت لري خو لاهم ځینې افغانان ددې خدماتو له کیفیت، لاسرسي او بیو څخه ناخوښ دي.
د کابل ښار ځینې اوسیدونکي وايي، چې پوستي خدمات د اړتیا وړ دي، خو په افغانستان کې ورته لازمه پاملرنه نه ده شوې.
دوی د طالبانو له حکومت غواړي چې دې برخه ته لا ډیر کار وکړي او خدماتو بیې يې کنټرول کړي.
د طالبانو د مخابراتو او معلوماتي ټګنالوژۍ وزارت بیا وايي، چې له تېرو څلورو کلونو راپدیخوا هڅه راونه ده، ترڅو د پوستي خدماتو شرکتونه معیاري شي او خلکو ته اړینې اسانتیاوې برابرې شي.
د دغه وزارت ویاند عنایت الله الکوزي له اس بي اس پښتو سره په خبرو کې وویل، چې دمګړۍ په افغانستان کې د افغان پوسټ دولتي شرکت ترڅنګ ځینې خصوصي پوسټي شرکتونه فعالیت کوي.
نوموړي زیاتوي، دغه شرکتونه نه یوازې په کور دننه بلکې د بېلابېلو هېوادونو د پوسټي شرکتونو سره لېږد را لېږد لري.
ورته وخت کې د افغان پوسټ دولتي شرکت بیا وايي، چې اوس دا شرکت د افغانستان ټولو ولایتونو، ولسوالیو او د نړۍ ۱۹۲ هېوادونو ته پستي خدمات لري.
دغه شرکت زیاتوي چې افغان پوسټ دا مهال ۱۸ ډوله خدمات لري او هر کال له دې لارې میلونونه افغانۍ ترلاسه کوي.
په افغانستان کې د لومړي ځل لپاره عصري پستي ارتباط د امیر شیرعلي خان د واکمنۍ پر مهال ( ۱۸۶۰م) کال رامنځته شوی، خو لاهم په دغه هېواد کې پستي سکتور هغه ډول پرمختګ نه دی کړی لکه څرنګه چې باید وی او د خدماتو او د هغې د بیې په اړه لا هم شکایتونه شتون لري.
د اس بي اس پښتو خپرونه دلته زمونږ پر ویب پاڼه یا هم د اس بي اس پر اپلیکیشن واورئ. تاسو کولای شئ د اس بي اس اپلیکیشن په وړیا توګه له اپل سټور یا ګوګل پلې څخه ترلاسه کړئ.
