افغانستان لکه هر وخت د نړۍ د سترو قدرتونو د بحث موضوع ده او د طالبانو برخليک هم نا معلوم راتلونکي سره مخ دی. آيا له طالبانو سره د چين او روسيې نږدېوالی د هغوی په ګټه تماميږي؟
افغانستان باندې د طالبانو له واکمنۍ څخه نږدې ۸ مياشتې تيرې شوې ولې اوس هم د طالبانو حکومت او خلک له نا معلوم برخليک سره مخ دي.
افغانستان ته چين او روسيي لوړپوړو چارواکو سفرونه او بيا بله خوا قطر کې د امريکا او طالبانو ترمينځ د خبرو پيليدل هغه څه دي چې د افغانانو په ګډون د سيمې هيوادونه يې هم له نږدې څاري.
سياسي چارو شنونکی او د پخواني حکومت ديپلومات ښاغلی معين مرستيال وايي، طالبان اوس لکه پخوا سوچ او دريځ نه لري ، دوی بدل شوی او غواړي نړۍ سره ځان نږدې کړي.
بله خوا افغانستان يو ځل بيا د نړۍ دوه قدرتونو سره اړيکو او نږدې کيدو غوراوی لري چې هر يو يې له ځانسره ګټې او تاوان لري.
ښاغلی مرستيال وايي، د طالبانو پر روسيې او چين باندې اقتصادي تکيه او له لويديځ سره واټن به د هغوی په تاوان تمام شي.
بله خوا له ۶ ټولګي څخه پورته د نجونو ښوونځيو يو ځل بيا تړل نړيواله ټولنه د طالبانو پر ژمنو شکمنه کړې ځکه دا پريکړه په وروستيو شيبو کې د ډيرو له تمې لرې وه.
اس بي اس پښتو سره خبرو کې ښاغلي مرستيال وويل، که طالبان د نجونو ښوونځيو نه پرانيستلو دلايل امن چاپيريال او ځيني نور مسايل يادوي نو پداسې حالت کې بايد د هغو سيمو او ولايتونو ښوونځي پرانيستل شي چيرې چې شرايط برابر وي او داسې هم نده چې په ټول افغانستان کې حالت يو شان وي.
سياسي چارو شنوونکی او د افغانستان د پارلمان پخواني غړي ښاغلي معين مرستيال سره مو پر مهمو مسايلو خبرې کړي، بشپړه مرکه واورئ.
