شاوخوا ۱۰۶ کاله وړاندې، د ۱۹۱۹ کال د اګسټ د میاشتې په ۱۹مه نېټه، امان الله خان له بریټانیا څخه د افغانستان خپلواکي ترلاسه کړه.
د افغانستان د خپلواکۍ ورځ هر کال د نړۍ په بېلابېلو هېوادونو کې د مېشتو افغانانو لخوا نمانځل کېږي.
د آسټرالیا د سېډني، ملبورن او اډېلېډ ښارونو ترڅنګ په نیوکاسل ښار کې مېشتو افغانانو هم د افغانستان د خپلواکۍ کالیزه ونمانځله.
په نیوکاسل ښار کې د افغان کلتوري ټولنې (Afghan Cultural Association) سکرتر، شمس الرحمن ماموند وايي چې دغه غونډه د دوي له ټولنې سره په همغږۍ د نیوکاسل مېشتو ځوانانو او مشرانو لخوا نمانځل شوې او دا ورځ د دوي لپاره ځانګړې ارزښت لري.
هغه وايي: "دا ورځ ډېر اهمیت ځکه لري چې دا د ملي ویاړ، یووالی او خپلواکۍ نښه ده. په هېواد کې په بېلابېلو سیمو کې رسمي او فرهنکي مراسم ترسره کېږي.ولسي خلک هم په خپلو دودونو، نندارو او ویاړونو سره دا ورځ نمانځي."
"دا ورځې په افغانستان کې شاید کمرنګې شوې وي خو په آسټرالیا کې او په غربي هېوادونو کې موږ باید دې ته لا ډېر متوجه اوسېږو چې زموږ له نسلونو نه دا تاریخې ورځې هېرې نه شي، ورکې نه شي او خپل هویت ورک نه کړو او د افغانستان په تاریخ کې چې کومې زرینې ورځې دي، تاریخې شیبې دې هغه خپلو اولادونو او اینده نسلونو ته انتقال کړو."
لا ډېر معلومات د ښاغلي ماموند په غږیز پیغام کې اورېدلی شئ.
د اس بي اس پښتو خپرونه دلته زمونږ پر ویب پاڼه یا هم د اس بي اس پر اپلیکیشن واورئ. تاسو کولای شئ د اس بي اس اپلیکیشن په وړیا توګه له اپل سټور یا ګوګل پلې څخه ترلاسه کړئ.
