اسټراليا ته د يو کډوال او يا مهاجر په توګه راتګ او بيا اسټراليا کې ميشتيدنې يو مهم ګام د اسټراليا تابعيت ترلاسه کول وي.
اسټراليا کې ژوند پيلولو سره کله چې په شرايطو برابر شئ نو بيا د تابعيت ازموينې لپاره نوم ليکنه کوئ او له اسنادو وړاندې کولو او ازموينه کې برياليتوب وروسته تاسو ته د اسټراليا تابعيت درکول کيږي.
د اسټراليا تابعيت ترلاسه کولو وروسته بيا تاسې د اسټراليا پاسپورټ ترلاسه کولی شئ او هم ددې حق ترلاسه کوئ چې ټاکنو کې رايه ورکړئ.
د اسټراليا تابعيت ازموينه په انګليسي ژبه ده او ډيره کې هغه کسان چې عمرونه يې ډير وي او په انګليسي ژبه ښه نه پوهيږي بيا ددې ازموينې په ورکولو کې له ګڼو ستونزو سره مخ کيږي.
ملبورن ښار کې ميشته شيرين افغان ميرمنو ته په ځانګړي ډول پښتنو ميرمنو لپاره د تابعيت ازموينې تياري زده کړه ورکوي.
اس بي اس پښتو سره په مرکه کې اغلې شيرين وايي، پښتنې کورنۍ ډيره کې زړه نه ښه کوي ترڅو خپل ميرمنې د تابعيت ازموينې لپاره يادو زده کړو مرکزونو ته وليږي او له بده مرغه داسې پښتنې ښځې هم په اسټراليا کې شته چې له ۱۰ يا ۱۵ کلونو راهيسې د اسټراليا تابعيت پرته ژوند کوي او له پاسپورټ او نورو اسانتياوو بې برخې دي.
د تابعيت ازموينې زده کړې پروګرامونه وړيا دي او تاسې خپل ځايي ټولنو څخه لا ډير معلومات ترلاسه کولی شئ چې ځنګه په يادو زده کړو پروګرامونو کې برخه واخلئ.
له اغلې شرين سره پر يادې مسلې بشپړه مرکه واورئ.
——————————————————-
زموږ خپرونه دلته زمونږ پر ویب پاڼه یا هم د اس بي اس پر اپلیکیشن واورئ. تاسو کولای شئ د اس بي اس اپلیکیشن په وړیا توګه له اپل سټور یا ګوګل پلې څخه ترلاسه کړئ.
