د آسټرالیا او افغانستان د کرېکټ لوبډلو ترمنځ نن د هند په ممبئي ښار کې لوبه ترسره شي. د واړه لوبډلې هڅه کوي ترڅو د نړیوال جام نیمه پایلوبې ته لاره پیدا کړي.
د ۲۰۲۳ کال د کرېکټ په نړیوال جام کې د آسټرالیا لوبډلې تر دې دمه ۷ لوبې ترسره کړي او ۵ لوبې یې ګټلي دي، مګر نیمه پایلوبې ته د رسېدلو لپاره باید آسټرالیا له خپلو وروستیو دوو لوبو څخه یوه لوبه وګټي.
بل خوا افغانستان له خپلو ۷ لوبو څخه ۴ لوبې ګټلي دي او هڅه کوي ترڅو خپلې وروستۍ لوبې هم وګټي.
افغانستان او آسټرالیا تر دې وړاندې ۳ یو ورځنۍ لوبې ترسره کړي او آسټرالیا درې واړه لوبې ګټلي دي.
په داسې حال کې چې نن شپه د آسټرالیا او افغانستان ترمنځ لوبه ترسره کېږي، د افغانستان د کرېکټ د ملي لوبدلې لوبغاړی نوین الحق او د کرېکټ یو شمېر مینه والو د آسټرالیا په کرېکټ بورد انتقاد کړی چې دوه ګونه چلند کوي.
د روان کال په جنورۍ میاشت کې د آسټرالیا کرېکټ بورډ اعلان وکړ چې له ښځو سره د طالبانو د ناوړه چلند له امله یې د افغانستان له ملي لوبډلې سره درې یو ورځنۍ لوبې لغوه کړي دي.
د آسټرالیا د کرېکټ بورد له دغې پرېکړې وروسته، د افغانستان د کرېکټ یو شمېر لوبغاړو یاده پرېکړه وغوندله او د آسټرالیا له کرېکټ بورډ څخه یې وغوښتل ترڅو خپله پرېکړه بېرته واخلي.
په آسټرالیا کې مېشت افغانان وايي، د نن شپې په لوبه کې د افغانستان د ملي لوبډلې ملاتړ کوي او هیله لري ترڅو افغانستان د پاتې دوو لوبو په ګټلو سره د روان نړیوال جام نیمه پایلوبې ته لاره پیدا کړي.
زموږ خپرونه دلته زمونږ پر ویب پاڼه یا هم د اس بي اس پر اپلیکیشن واورئ. تاسو کولای شئ د اس بي اس اپلیکیشن په وړیا توګه له اپل سټور یا ګوګل پلې څخه ترلاسه کړئ.
