وروسته ترهغه چې د آسټرالیا کرېکټ بورد په افغانستان کې د طالبانو له لوري پر ښځو او انجونو د لګېدلو محدویتونو په ځواب کې له افغان لوبډلې سره خپلې درې ورځنې لوبې لغو اعلان کړې، اوس یو شمېر کرېکټ پوهان دغه وضعیت د افغان کرېکټ لپاره د اندیښنې وړ بولي.
د اسټرالیا کرېکټ بورد د جنوري میاشتې په ۱۲ مه نېټه د یوې اعلامیې په خپرولو سره وویل چې په افغانستان کې د ښځو او انجونو لپاره د ژوند او زده کړو د محدویتونو له امله نه غواړي له افغان کرېکټ لوبډلې سره په راتلونکې مارچ میاشت کې د افغان لوبډلې په کوربتوب د کرېکټ نړیوال جام د سوپر لیګ درې یو ورځنۍ سیالۍ ولوبوي.
د اسټرالیا کرېکټ بورد ویلي ول، که چېرته افغان انجونو ته په افغانستان کې ښه شرایط برابر شي، اسټرالیا به د افغانستان له کرېکټ سره خپلې همکارۍ ته دوام ورکړي.
د اسټرالیا د کرېکټ بورد له دغه اعلان سره سم د افغانستان کرېکټ بورډ ادارې او د ملي لوبډلې مخکښو لوبغاړو پر دغه پرېکړه ناخوښې په ډاګه کړه او د بیرته اخیستو غوښتنه يې وکړه.
که څه هم دوی دا پرېکړه سیاسي وبلله خو د اسټرالیا کرېکټ بورډ په ځواب کې وویل، چې بشري حقونه سیاسي مسله نه ده.
د کرېکټ برخې یوشمیر افغان مبصرین بیا د اسټرالیا له لوري له افغانستان سره د لوبلړۍ د لغو کېدو په اړه بیلابیل لید لوري لري.
مهرباني وکړئ، پډې اړه لا ډېر معلومات په رپوټ کې واورئ.
