د طالبانو او ایراني چارواکو ترمنځ د هلمند سیند د اوبو حق ابې په سر لانجه لا پر ځای پاتې وه چې د شنبې په ورځ طالب او ایراني پوله ساتي ځواکونه د نیمروز ولایت په کنګ ولسوالۍ کې سره ونښتل او پر یو بل يې د سپکو او درنو وسلو ډزې وکړي.
د راپورونو له مخې نښته وروسته تر هغې رامنځته شوه چې ایراني اړخ غوښتل په یاده شوې سیمه کې پولې ته څېرمه دیوال جوړ کړي.
په دغه نښته کې له داوړو لوریو لږ تر لږه دوه کسان ووژل شول او ګڼ نور ټپیان شول.
دا لومړی ځل نه ده چې د طالبانو او ایراني پوله ساتو ځواکونو ترمنځ پر پوله نښته رامنځته کیږي، له کله چې په افغانستان کې طالبان واک ته رسیدلي دي، د دې پولې په اوږدو کې په ځانګړي ډول د نیمروز په کنګ او اسلام کلا کې د دواړو خواوو ترمنځ ګڼې سرحدي نښتې شوي چې پاېله کې يې داوړو لوریو ته مرګ ژوبله اوښتې.
بلخوا د طالبانو او ایراني پوله ساتو ځواکونو ترمنځ د شنبې په ورځ دغه نښته وروسته تر هغه رامنځته شوه چې په دې وروستیو کې د هلمند د اوبو پر سر د طالبانو او ایران ترمنځ تاوتریخوالي زیات شوی دی.
مهرباني وکړئ، پدې اړه لا دېر جزیات د رحیم الدین اوریاخیل په رپوټ کې واورئ.
