د ولسي جرګې یو شمېر غړي وايي ، په مسکو کې جوړه شوې غونډه یو مانور و چې روسیې اجراء کړ او له دې لارې غوښتل چې امریکا ته خپل موقف څرګند کړي.
د ولسي جرګې دوهم منشي عرفان الله عرفان یو له هغو کسانو دی چې وايي، طالب استازي وتوانېدل چې له غونډې زیاته استفاده وکړي.
د وسله والو طالبانو استازو او د افغانستان د سولې عالي شورا غړو د روسیې په کوربه توب د جمعې په ورځ په مسکو کې سره خبرې وکړې.
په دغه غونډه کې د روسیې او پاکستان په ګډون د لسو هېوادونو استازو ګډون کړی و.
افغان دولت د مسکو په غونډه کې له ګډونه انکار وکړ، خو د افغانستان د بهرنیو چارو وزارت په خبره، د افغانستان د سولې عالي شورا د یوه خپلواک ارګان په توګه په دغه غونډه کې ګډون وکړ.
لا ډېر جزیات د ناجیه ساپۍ په رپوټ کې واورئ.
