افغانستان کې وچکالي او د اوبو تنظيم يو منظم پلان نه شتون خلک له ګڼو ستونزو سره مخ کړي او اټکل دا دی چې که دې ستونزې ته د حل لار ونه موندل شي، دا موضوع ښايي په یو ناورین واوړي.
عام باور دا دی چې افغانستان سږکال د طالبانو د تیرې واکمنۍ په څېر بیا هم له وچکالی سره مخ دی.
د افغانستان اقتصاد چې تر ډېره کچه کرنې او موسمي ورښتونو پورې تړلی نو ښايې د کرنیزو محصولاتو کمښت د دغه هېواد ټولیز اقتصاد زیانمن کړي.
په تیر ژمي کې په افغانستان کې د واورې او بارانونو د کمښت له امله سږکال د اوبو سرچینې هم کمې شوي.
افغانستان کې د اوبو د کمښت ستونزه او وچکالۍ د نورو ستونزه سربېره د افغان بزګرانو په حاصلاتو ناوړه اغیزه کړې.
د تېر په څېر سږکال هم وچکالۍ کرنې او مالدارۍ ته زیان رسولی او دې چارې تر ډېره د بزګرو او مالدارانو عواید کم کړي دي.
یو شمېر بزګران چې په افغانستان کې په کرنه بوخت دی، وایي سږکال یې وچکالۍ ټول فصل ځپلی او هېڅ چمتووالی هم نه لري.
د دوی په وینا که کرنې وزارت ورسره مرسته کړې وه نو یوه برخه محصولات به یې خوندي شوي وو.
کابل څخه رحيم الدين اوريا خيل رپوټ لري.
