وروسته تر هغه چې په پاکستان کې د عمران په مشرۍ حکومت بي واکه او ددغه هېواد پارلمان د مسلم لیګ ګوند مشر شهباز شریف د صدراعظم په توګه وټاکه اوس داسې پوښتنې را ولاړې شوي چې ایا په پاکستان کې د نوي حکومت په راتګ سره به د افغانستان په اړه ددغه هېواد په بهرنۍ تګلاره کې کوم بدلون راشي او که نه؟
د سیاسي چارو یو شمېر افغان کارپوهان په دې اړه بیلا بیل لید لوري لري.
په دې ډله کې یو شمېر پدې اند دي چې په پاکستان کې د حکومت بدلون به د افغانستان په اړه د دې هېواد پر سیاست اغیزه ونکړي، ځکه د دوی په وینا د افغانستان په اړه د پاکستان سیاست تر ډیره بریده د دې هېواد پوځ له لوري اداره کیږي.
دوی وايي، د پاکستان پوځ په تېرو څه باندې څلور لسیزو کې د افغانستان په اړه د دې هېواد سیاست اداره کاوه او اوس هم پوځ د افغانستان په اړه د پالیسۍ جوړولو او تعقیب مسولیت په غاړه لري.
ځيني نور افغانان بيا مخالف نظر لري.
تاسو ته مو د پاکستان نوي حکومت په اړه د افغانانو غبرګونونه راخيستي چې دا ټول په تيار شوي رپوټ کې اوريدلی شئ.
