ਆਸਟ੍ਰੇਲੀਆ ‘ਚ ਸਭ ਤੋਂ ਵੱਧ ਵਸਣ ਵਾਲੇ ਵਿਦੇਸ਼ੀ ਲੋਕਾਂ ਦੀ ਗਿਣਤੀ ‘ਚ ਭਾਰਤੀ ਦੂਜੇ ਸਥਾਨ ‘ਤੇ

ਆਸਟ੍ਰੇਲੀਆ ਵਿੱਚ ਵੱਸਣ ਵਾਲੇ ਭਾਰਤੀਆਂ ਦੀ ਗਿਣਤੀ ਵਿੱਚ ਲਗਾਤਾਰ ਵਾਧਾ ਹੋ ਰਿਹਾ ਹੈ। ਤਾਜ਼ਾ ਅੰਕੜਿਆਂ ਮੁਤਾਬਕ ਇਹ ਸੰਖਿਆ ਕੁੱਲ 846,000 ਹੈ ਜੋ ਕਿ 2022 ਵਿੱਚ 754,000 ਸੀ।

Three countries account for more than a third of Australia's overseas-born population. Source: AAP / Jason O'Brien

1800 ਦੇ ਦਹਾਕੇ ਤੋਂ ਬਾਅਦ ਆਸਟ੍ਰੇਲੀਆ ਦੇ ਰਿਕਾਰਡਾਂ ਵਿੱਚ ਅਜਿਹਾ ਨਹੀਂ ਦੇਖਿਆ ਗਿਆ ਕਿ ਵਿਦੇਸ਼ਾਂ ਵਿੱਚ ਜਨਮੇ ਲੋਕਾਂ ਦਾ ਅਨੁਪਾਤ ਇੰਨਾ ਵੱਧ ਹੋਇਆ ਹੋਵੇ।

‘ਆਸਟ੍ਰੇਲੀਅਨ ਬਿਓਰੋ ਆਫ ਸਟੈਟਿਸਟਿਕਸ’ ਦੀ ਤਾਜ਼ਾ ਰਿਪੋਰਟ ਮੁਤਾਬਕ ਆਸਟ੍ਰੇਲੀਆ ਦੀ ਆਬਾਦੀ ਵਿੱਚ ਵਿਦੇਸ਼ਾਂ ‘ਚ ਪੈਦਾ ਹੋਏ ਲੋਕਾਂ ਦਾ ਅਨੁਪਾਤ 2022 ਵਿੱਚ 29.5 ਪ੍ਰਤੀਸ਼ਤ ਤੋਂ ਵੱਧ ਕੇ 2023 ਵਿੱਚ 30.7 ਪ੍ਰਤੀਸ਼ਤ ਤੱਕ ਪਹੁੰਚ ਗਿਆ ਹੈ।

The amount of Australians who were born overseas has not been as high as it currently is for 130 years. Source: SBS

ਵਿਦੇਸ਼ੀ ਮੂਲ ਦੀ ਆਸਟ੍ਰੇਲੀਅਨ ਆਬਾਦੀ ਦਾ ਇੰਨਾ ਉੱਚਾ ਅਨੁਪਾਤ 1891 ਤੋਂ ਬਾਅਦ ਪਹਿਲੀ ਵਾਰ ਦਰਜ ਕੀਤਾ ਗਿਆ ਹੈ।

ਆਸਟ੍ਰੇਲੀਆ ਦੀ ਆਬਾਦੀ ਦਾ ਕਿੰਨਾਂ ਵੱਡਾ ਹਿੱਸਾ ਹਨ ਭਾਰਤੀ?

ਜੂਨ 2023 ਵਿੱਚ ਦਰਜ ਕੀਤੇ ਗਏ ਤਾਜ਼ਾ ਅੰਕੜੇ ਦਰਸਾਉਂਦੇ ਹਨ ਕਿ ਆਸਟ੍ਰੇਲੀਆ ਦੀ ਕੁੱਲ ਜਨਸੰਖਿਆ 26.6 ਮਿਲੀਅਨ ਹੈ ਜਿਸ ਵਿੱਚੋਂ 18.5 ਮਿਲੀਅਨ ਉਹ ਹਨ ਜਿਹਨਾਂ ਦਾ ਜਨਮ ਆਸਟ੍ਰੇਲੀਆ ਵਿੱਚ ਹੋਇਆ, ਅਤੇ 8.2 ਮਿਲੀਅਨ ਅਜਿਹੇ ਹਨ ਜਿੰਨ੍ਹਾਂ ਦਾ ਜਨਮ ਆਸਟ੍ਰੇਲੀਆ ਤੋਂ ਬਾਹਰ ਹੋਰ ਦੇਸ਼ਾਂ ਵਿੱਚ ਹੋਇਆ ਸੀ।

ਆਸਟ੍ਰੇਲੀਆ ਦੀ ਵਿਦੇਸ਼ਾਂ ਵਿੱਚ ਪੈਦਾ ਹੋਈ ਆਬਾਦੀ ਦਾ ਇੱਕ ਤਿਹਾਈ ਤੋਂ ਵੱਧ ਹਿੱਸਾ ਤਿੰਨ ਦੇਸ਼ ਹੀ ਹਨ ਜਿਸ ਵਿੱਚ ਭਾਰਤ ਦੂਜੇ ਸਥਾਨ ਉੱਤੇ ਹੈ। 92,000 ਦੇ ਵਾਧੇ ਨਾਲ ਭਾਰਤ ਵਿੱਚ ਪੈਦਾ ਹੋਣ ਵਾਲੇ ਆਸਟ੍ਰੇਲੀਅਨ ਲੋਕਾਂ ਦੀ ਗਿਣਤੀ 2022 ‘ਚ 754,000 ਤੋਂ ਵੱਧ ਕੇ 846,000 ਹੋ ਗਈ ਹੈ।

ਪਹਿਲੇ ਸਥਾਨ ‘ਤੇ ਮੌਜੂਦ ਇੰਗਲੈਂਡ ‘ਚ ਪੈਦਾ ਹੋਣ ਵਾਲੇ ਆਸਟ੍ਰੇਲੀਅਨ ਲੋਕਾਂ ਦੀ ਗਿਣਤੀ 962,000 ਹੈ। ਜਦਕਿ ਤੀਜੇ ਸਥਾਨ ਉੱਤੇ ਦਰਜ ਚੀਨ ‘ਚ ਪੈਦਾ ਹੋਣਾ ਵਾਲੀ ਆਸਟ੍ਰੇਲੀਅਨ ਆਬਾਦੀ ਦੀ ਗਿਣਤੀ 656,000 ਹੈ।

ਨਿਊ-ਜ਼ੀਲੈਂਡ ਤੋਂ ਆਸਟ੍ਰੇਲੀਆ ਵਿੱਚ ਵੱਸਣ ਵਾਲੇ ਲੋਕਾਂ ਦੀ ਗਿਣਤੀ ਵਿੱਚ ਵੀ ਲਗਾਤਾਰ ਵਾਧਾ ਹੋਇਆ ਹੈ। ਕੀਵੀਜ਼ ਦੀ ਆਬਾਦੀ 598,000 ਹੈ।

2013 ਤੋਂ 2023 ਦੌਰਾਨ ਭਾਰਤੀ ਭਾਈਚਾਰੇ ਦੀ ਆਬਾਦੀ ਸਭ ਤੋਂ ਤੇਜ਼ ਵਧੀ ਹੈ

2013-2023 ਦੌਰਾਨ ਜਿੰਨ੍ਹਾਂ ਭਾਈਚਾਰਿਆਂ ਦੀ ਆਬਾਦੀ ਸਭ ਤੋਂ ਤੇਜ਼ੀ ਨਾਲ ਵਧੀ ਉਸ ਵਿੱਚ ਭਾਰਤੀ ਭਾਈਚਾਰਾ ਸਭ ਤੋਂ ਅੱਗੇ ਹੈ।

ਚੀਨੀ, ਨੇਪਾਲੀ ਅਤੇ ਫਿਲੀਪਿਨੋ ਭਾਈਚਾਰੇ ਵੀ ਇਸ ਲੜੀ ਵਿੱਚ ਸ਼ਾਮਲ ਹਨ।

ਹਾਲਾਂਕਿ ਵਿਦੇਸ਼ਾਂ ਤੋਂ ਇਥੇ ਵੱਸਣ ਵਾਲੇ ਦੇਸ਼ਾਂ ਵਿੱਚ ਸਭ ਤੋਂ ਵੱਧ ਉਮਰ ਦੇ ਲੋਕ ਲਾਤਵੀਆ ਤੋਂ ਹਨ ਜਿੰਨ੍ਹਾਂ ਦੀ ਔਸਤ ਉਮਰ 80 ਸਾਲ ਹੈ।

ਜਦਕਿ ਸਭ ਤੋਂ ਛੋਟੀ ਉਮਰ ਦੇ ਵਿਦੇਸ਼ਾਂ ‘ਚ ਪੈਦਾ ਹੋਏ ਲੋਕ ਕਤਰ ਤੋਂ ਹਨ, ਜਿਸਦੀ ਆਬਾਦੀ ਦੀ ਔਸਤ ਉਮਰ 15 ਸਾਲ ਹੈ।

The foreign-born communities within Australia that grew the most between 2013 and 2023. Source: SBS

ਵਿਸ਼ਵ ਪੱਧਰ ਉੱਤੇ ਇਹ ਅੰਦਾਜ਼ਾ ਲਗਾਇਆ ਗਿਆ ਹੈ ਕਿ 2020 ਤੱਕ 280.6 ਮਿਲੀਅਨ ਲੋਕ ਅਜਿਹੇ ਹਨ ਜੋ ਆਪਣੇ ਜਨਮ ਦੇ ਦੇਸ਼ ਤੋਂ ਬਾਹਰ ਰਹਿ ਰਹੇ ਹਨ।

ਆਸਟ੍ਰੇਲੀਆ ਵਿੱਚ ਰਹਿਣ ਵਾਲੇ ਵਿਦੇਸ਼ੀ ਮੂਲ ਦੇ ਲੋਕਾਂ ਦੀ ਸੰਖਿਆ ਮੁਤਾਬਕ ਆਸਟ੍ਰੇਲੀਆ ਵਿਸ਼ਵ ਵਿੱਚ ਨੌਵੇਂ ਸਥਾਨ ‘ਤੇ ਹੈ ਜੋ ਕਿ ਇਸਦੀ ਆਬਾਦੀ ਦਾ ਵੱਡਾ ਅਨੁਪਾਤ 29.9 ਪ੍ਰਤੀਸ਼ਤ ਬਣਦਾ ਹੈ।

ਇਸ ਵੱਡੇ ਅਨੁਪਾਤ ਵਿੱਚ ਭਾਰਤੀ ਭਾਈਚਾਰਾ ਵੀ ਇੱਕ ਵੱਡਾ ਯੋਗਦਾਨ ਪਾਉਂਦਾ ਹੈ।

ਸੋਮਵਾਰ ਤੋਂ ਸ਼ੁੱਕਰਵਾਰ ਸ਼ਾਮ 4 ਵਜੇ ਸਾਡਾ ਪੰਜਾਬੀ ਪ੍ਰੋਗਰਾਮ ਐਸਬੀਐਸ ਸਾਊਥ ਏਸ਼ੀਅਨ 'ਤੇ ਸੁਣੋ।

ਸਾਨੂੰ  ਫੇਸਬੁੱਕ ਤੇ ਟਵਿੱਟਰ ਉੱਤੇ ਵੀ ਫਾਲੋ ਕਰੋ।