ਭਾਰਤੀ ਪਰਿਵਾਰ ਦੇ ਜੀਆਂ ਦੀ ਕਾਫਸ ਹਾਰਬਰ ਲਾਗੇ ਸਮੁੰਦਰ 'ਚ ਡੁੱਬਣ ਪਿੱਛੋਂ ਮੌਤ

ਸਿਡਨੀ ਅਤੇ ਬ੍ਰਿਸਬੇਨ ਦੇ ਦੋ ਭਾਰਤੀ ਪਰਿਵਾਰਾਂ ਲਈ ਇਕੱਠੇ ਹੋ ਕੇ ਛੁੱਟੀਆਂ ਬਿਤਾਉਣ ਦਾ ਖੁਸ਼ਗਵਾਰ ਮੌਕਾ ਓਦੋਂ ਮਾਤਮ ਵਿੱਚ ਬਦਲ ਗਿਆ ਜਦੋਂ ਪਰਿਵਾਰ ਦੇ ਦੋ ਜੀਆਂ ਦੀ ਸਮੁੰਦਰ ਵਿੱਚ ਡੁੱਬਣ ਪਿੱਛੋਂ ਮੌਤ ਹੋ ਗਈ ਜਦਕਿ ਤੀਜੇ ਵਿਅਕਤੀ ਦੀ ਵੀ ਜਿਉਂਦੇ ਮਿਲਣ ਦੀ ਕੋਈ ਉਮੀਦ ਨਹੀਂ ਹੈ।

ਭਾਰਤ ਵਿੱਚ ਹੈਦਰਾਬਾਦ ਨਾਲ ਸਬੰਧ ਰੱਖਦੇ ਇਹ ਪਰਿਵਾਰ ਕਾਫਸ ਹਾਰਬਰ ਦੇ ਨੇੜੇ ਦੇ ਸਮੁੰਦਰੀ ਕਿਨਾਰੇ 'ਤੇ ਛੁੱਟੀਆਂ ਬਿਤਾ ਰਹੇ ਸਨ।

ਕਾਫਸ ਹਾਰਬਰ ਤੋਂ 25 ਕਿਲੋਮੀਟਰ ਦੂਰ ਮੂਨੀ ਬੀਚ 'ਤੇ ਪਾਣੀ ਵਿੱਚ ਨਹਾਉਂਦਿਆਂ-ਤੈਰਾਕੀ ਕਰਦਿਆਂ ਪਰਿਵਾਰ ਦੇ ਛੇ ਜੀਅ ਸਮੁੰਦਰ ਦੀਆਂ ਛੱਲਾਂ ਦੀ ਚਪੇਟ ਵਿੱਚ ਆ ਗਏ ਸਨ, ਜਿੰਨਾ ਵਿੱਚੋਂ ਤਿੰਨ ਨੂੰ ਬਚਾਅ ਲਿਆ ਗਿਆ ਹੈ।

ਸਿਡਨੀ ਦੇ ਔਬਰਨ ਇਲਾਕੇ ਦੇ ਰਹਿਣ ਵਾਲੇ 45-ਸਾਲਾ ਮੁਹੰਮਦ ਗ਼ੁਜ਼ੂਦੀਨ ਅਤੇ 35-ਸਾਲਾ ਸਈਦ ਦੀ ਪਾਣੀ ਵਿੱਚ ਡੁੱਬਣ ਨਾਲ ਮੌਤ ਹੋ ਗਈ ਹੈ ਜਦਕਿ 28 ਸਾਲਾ ਅਬਦੁੱਲ ਜੁਨੈਦ ਅਜੇ ਵੀ ਲਾਪਤਾ ਹੈ।

ਸਮੁੰਦਰੀ ਰਾਹਤ ਅਤੇ ਬਚਾਅ ਕੰਮਾਂ ਦੇ ਚਲਦਿਆਂ 15 ਅਤੇ 17 ਸਾਲ ਦੀ ਉਮਰ ਦੀਆਂ ਦੋ ਲੜਕੀਆਂ ਤੇ ਇਕ 15 ਸਾਲਾ ਲੜਕੇ ਨੂੰ ਸਖਤ ਕੋਸ਼ਿਸ਼ਾਂ ਤੋਂ ਬਾਅਦ ਬਚਾਅ ਲਿਆ ਗਿਆ ਹੈ।

ਆਸਟ੍ਰੇਲੀਆ ਵਸਦੇ ਭਾਰਤੀ ਭਾਈਚਾਰੇ ਨੇ ਪੀੜਤ ਪਰਿਵਾਰ ਨਾਲ਼ ਦੁੱਖ ਸਾਂਝਾ ਕਰਦਿਆਂ ਅਫਸੋਸ ਜਤਾਇਆ ਹੈ।

ਭਾਰਤੀ ਮੁਸਲਿਮ ਐਸੋਸੀਏਸ਼ਨ ਆਫ ਆਸਟਰੇਲੀਆ ਵੱਲੋਂ ਸਯਦ ਸਿਰਾਜ ਪਟੇਲ ਨੇ ਐਸਬੀਐਸ ਹਿੰਦੀ ਨਾਲ਼ ਗੱਲ ਕਰਦਿਆਂ ਕਿਹਾ ਕਿ ਇਹ ਦੋ ਮਹੀਨਿਆਂ ਵਿਚ ਦੂਜੀ ਤ੍ਰਾਸਦੀ ਹੈ ਅਤੇ ਭਾਰਤੀ ਭਾਈਚਾਰੇ ਦੇ ਲੋਕ ਇਸ ਸਮੇਂ ਸਦਮੇ ਵਿਚ ਹਨ।

ਸ਼੍ਰੀ ਪਟੇਲ ਨੇ ਲੋਕਾਂ ਨੂੰ ਸਮੁੰਦਰੀ ਪਾਣੀ ਵਿੱਚ ਜਾਣ ਸਮੇਂ ਖਾਸ ਖਿਆਲ ਰੱਖਣ ਦੀ ਲੋੜ ਤੇ ਵੀ ਜ਼ੋਰ ਦਿੱਤਾ ਹੈ।

Listen to SBS Punjabi Monday to Friday at 9 pm. Follow us on Facebook and Twitter.