ਬੈਂਕ ਵਲੋਂ ਆਏ ਪ੍ਰਤੀਤ ਹੋਏ ਇੱਕ ਟੈਕਸਟ ਮੈਸੇਜ ਕਾਰਨ ਮੈਲਬੌਰਨ ਦੇ ਇੱਕ ਜੋੜੇ ਨੂੰ 98 ਹਜ਼ਾਰ ਡਾਲਰ ਦਾ ਨੁਕਸਾਨ ਹੋਇਆ ਹੈ।
ਜਦੋਂ ਜੇਮਜ਼ ਗ੍ਰੀਨ ਨੇ ਆਪਣੇ ਫ਼ੋਨ 'ਤੇ 'ਵੈਸਟਪੈਕ' ਬੈਂਕ ਤੋਂ ਟੈਕਸਟ ਸੁਨੇਹਾ ਦੇਖਿਆ ਤਾਂ ਉਨ੍ਹਾਂ ਨੂੰ ਇਸ ਉਤੇ ਸ਼ੱਕ ਕਰਨ ਦਾ ਕੋਈ ਕਾਰਣ ਨਹੀਂ ਸੀ ਕਿਉਂਕਿ ਉਨ੍ਹਾਂ ਨੂੰ ਪਹਿਲਾਂ ਵੀ ਕਈ ਵਾਰੀ ਇਸੇ ਵਿਧੀ ਰਾਹੀਂ 'ਵੈਸਟਪੈਕ' ਬੈਂਕ ਨੇ ਕਈ ਵਾਰੀ ਸੰਪਰਕ ਬਣਾਇਆ ਸੀ।
ਉਸ ਨੂੰ ਪ੍ਰਾਪਤ ਹੋਏ ਲਿਖਤੀ ਸੰਦੇਸ਼ ਵਿੱਚ ਇਹ ਕਿਹਾ ਗਿਆ ਸੀ ਕਿ "ਤੁਹਾਡੇ ਖ਼ਾਤੇ ਤੋਂ ਜੋਸੇਫ ਸਟੀਫਨਸਨ ਨੂੰ 5500 ਡਾਲਰ ਟ੍ਰਾਂਸਫਰ ਕਰਨ ਦੀ ਕੋਸ਼ਿਸ਼ ਕੀਤੀ ਗਈ ਹੈ। ਜੇਕਰ ਇਹ ਤੁਸੀਂ ਨਹੀਂ ਸੀ, ਤਾਂ ਕਿਰਪਾ ਕਰਕੇ ਸਾਨੂੰ ਇਸ 'ਤੇ ਕਾਲ ਕਰੋ..."
ਜਦੋਂ ਜੇਮਸ ਨੇ ਪ੍ਰਦਾਨ ਕੀਤੇ ਨੰਬਰ 'ਤੇ ਕਾਲ ਕੀਤੀ ਤਾਂ ਉਸਨੇ ਸੋਚਿਆ ਕਿ ਉਹ ਵੈਸਟਪੈਕ ਬੈਂਕ ਦੇ ਪ੍ਰਤੀਨਿਧੀ ਨਾਲ ਗੱਲ ਕਰ ਰਹੇ ਸੀ ਜਿਸ ਨੇ ਭਵਿੱਖ ਵਿੱਚ ਘੋਟਾਲੇ ਤੋਂ ਬਚਣ ਲਈ ਮੌਜੂਦਾ ਖਾਤੇ ਨੂੰ ਬੰਦ ਕਰਨ ਅਤੇ ਇੱਕ ਇਸ ਦੀ ਥਾਂ ਇੱਕ ਨਵਾਂ ਖਾਤਾ ਖੋਲਣ ਦੀ ਸਲਾਹ ਦਿਤੀ।
ਜੇਮਸ ਵਲੋਂ ਭੇਜੇ ਗਏ ਲਿੰਕ 'ਤੇ ਕਲਿੱਕ ਕਰਨ ਦੀ ਹੋਈ ਗਲਤੀ ਤੋਂ ਕੁਝ ਦਿਨਾਂ ਬਾਅਦ ਇਸ ਜੋੜੇ ਦੇ ਖ਼ਾਤੇ ਵਿੱਚੋਂ 98,000 ਡਾਲਰ ਗਾਇਬ ਹੋ ਗਏ।
ਬੈਂਕ ਵਲੋਂ ਮੁਆਵਜ਼ੇ ਵਿੱਚ ਜੋੜੇ ਨੂੰ ਸਿਰਫ 3000 ਡਾਲਰ ਦੀ ਪੇਸ਼ਕਸ਼ ਕੀਤੀ ਗਈ ਹੈ। 'ਵੈਸਟਪੈਕ' ਦੇ ਬੁਲਾਰੇ ਨੇ ਇਸ ਘੋਟਾਲੇ ਉਤੇ ਕਿਹਾ ਕਿ ਉਹ ਗੁਪਤਤਾ ਕਾਨੂੰਨਾਂ ਕਾਰਨ ਵਿਅਕਤੀਗਤ ਗਾਹਕਾਂ ਦੇ ਮਾਮਲਿਆਂ 'ਤੇ ਟਿੱਪਣੀ ਨਹੀਂ ਕਰ ਸਕਦੇ।
ਇਨ੍ਹਾਂ ਘੋਟਾਲਿਆਂ ਤੋਂ ਬਚਣ ਲਈ ਆਰ ਐਮ ਆਈ ਟੀ ਯੂਨੀਵਰਸਿਟੀ ਦੇ ਦੂਰਸੰਚਾਰ ਮਾਹਰ ਐਸੋਸੀਏਟ ਪ੍ਰੋਫੈਸਰ ਮਾਰਕ ਗ੍ਰੈਗਰੀ ਦੀ ਖਪਤਕਾਰਾਂ ਨੂੰ ਸਲਾਹ ਹੈ ਕਿ ਉਹ ਕਦੇ ਵੀ ਕਿਸੇ ਕਿਸਮ ਦੇ ਲਿੰਕ 'ਤੇ ਕਲਿੱਕ ਨਾ ਕਰਨ ਅਤੇ ਨਾ ਹੀ ਕਦੇ ਵੀ ਕਿਸੇ ਸੰਸਥਾ ਤੋਂ ਭੇਜੇ ਗਏ ਕਿਸੇ ਮੈਸਜ ਜਾਂ ਈਮੇਲ ਦਾ ਜਵਾਬ ਦੇਣ।
ਉਨ੍ਹਾਂ ਕਿਹਾ ਕਿ "ਭਰੋਸੇ ਯੋਗ ਜਾਣਕਾਰੀ ਸਿਰਫ਼ ਵਿੱਤੀ ਸੰਸਥਾਵਾਂ ਦੀ ਵੈੱਬਸਾਈਟ 'ਤੇ 'ਲੋਗਔਨ' ਕਰਕੇ ਹੀ ਲੈਣੀ ਚਾਹੀਦੀ ਹੈ"
