ਡੇਵਿਡ ਬੇਨਿਅਨ, ਜੋ ਯੂਨੀਵਰਸਿਟੀ ਆਫ ਟੈਕਨੋਲੋਜੀ ਸਿਡਨੀ ਦੇ ਮੈਨੇਜਮੈਂਟ ਅਤੇ ਸੈਰ-ਸਪਾਟੇ ਵਿਭਾਗ ਦੇ 'ਐਡਜੰਕਟ ਫੈਲੋਓ' ਹਨ, ਅਨੁਸਾਰ ਆਸਟ੍ਰੇਲੀਆ ਦੇ ਨਵੇਂ 'ਆਰ ਸੀਰੀਜ਼' ਪਾਸਪੋਰਟ ਦੀ ਕੀਮਤ ਵਿਚ ਵਾਧਾ ਹੋਣ ਦਾ ਕਾਰਨ ਇਸ ਵਿਚ ਪ੍ਰਦਾਨ ਕੀਤੇ ਗਏ ਵਾਧੂ ਸੁਰੱਖਿਆ ਫੀਚਰਾਂ ਤੋਂ ਇਲਾਵਾ ਸਰਕਾਰ ਵਲੋਂ ਇਸ ਵਿਚੋਂ ਵਧੇਰੇ ਮੁਨਾਫ਼ਾ ਕਮਾਉਣ ਦੇ ਮਨਸ਼ੇ ਨੂੰ ਵੀ ਨਜ਼ਰ-ਅੰਦਾਜ਼ ਨਹੀਂ ਕੀਤਾ ਜਾ ਸਕਦਾ।
ਉਨ੍ਹਾਂ ਦੱਸਿਆ ਕਿ ਦੂਜੇ ਦੇਸ਼ਾਂ, ਜਿਵੇਂ ਕਿ ਅਮਰੀਕਾ, ਯੂਕੇ ਅਤੇ ਕਨੇਡਾ ਦੇ ਪਾਸਪੋਰਟਾਂ ਵਿੱਚ ਵੀ ਆਧੁਨਿਕ ਸੁਰੱਖਿਆ ਵਿਸ਼ੇਸ਼ਤਾਵਾਂ ਹਨ ਪਰ ਉਨ੍ਹਾਂ ਕੀ ਕੀਮਤ ਸਾਡੇ ਨਾਲੋਂ ਕਾਫ਼ੀ ਘੱਟ ਹੈ।
ਕਾਮਿਆਂ ਦੀਆਂ ਵਧੀਆਂ ਹੋਈਆਂ ਤਨਖਾਵਾਂ ਅਤੇ ਪ੍ਰਿੰਟਿੰਗ ਦੇ ਵਧੇ ਖਰਚੇ ਨੂੰ ਵੀ ਇਸ ਲਈ ਜਿੰਮੇਵਾਰ ਦਸਿਆ ਜਾ ਰਿਹਾ ਹੈ।
ਕੈਨੇਡੀਅਨ, ਯੂਨਾਨੀ ਅਤੇ ਮਾਲਟੀਜ਼ ਪਾਸਪੋਰਟ ਵੀ ਆਸਟ੍ਰੇਲੀਅਨ ਪਾਸਪੋਰਟ ਵਾਂਗ ਇਕੋ ਜਿਹੇ ਮੁਲਕਾਂ ਵਿਚ ਵੀਜ਼ਾ ਮੁਕਤ ਯਾਤਰਾ ਦੀ ਆਗਿਆ ਪ੍ਰਦਾਨ ਕਰਦੇ ਹਨ ਪਰ ਉਨ੍ਹਾਂ ਦੇ ਨਾਗਰਿਕ ਆਪਣੇ ਪਾਸਪੋਰਟ ਲਈ ਸਾਡੇ ਨਾਲੋਂ ਘਟ ਕੀਮਤ ਅਦਾ ਕਰਦੇ ਹਨ।
ਜ਼ਿਕਰਯੋਗ ਹੈ ਕਿ ਆਸਟ੍ਰੇਲੀਆ ਦੀ ਤੁਲਨਾ ਵਿਚ ਨਿਊਜ਼ੀਲੈਂਡ ਦੇ ਪਾਸਪੋਰਟ ਦੀ ਕੀਮਤ 180 ਆਸਟ੍ਰੇਲੀਅਨ ਡਾਲਰ ਹੈ, ਕੈਨੇਡੀਅਨ ਪਾਸਪੋਰਟ ਦੀ ਕੀਮਤ 172 ਆਸਟ੍ਰੇਲੀਅਨ ਡਾਲਰ, ਮਾਲਟੀਜ਼ ਪਾਸਪੋਰਟ ਦੀ 107 ਤੋਂ 122 ਆਸਟ੍ਰੇਲੀਅਨ ਡਾਲਰ ਅਤੇ ਯੂਨਾਨੀ ਪਾਸਪੋਰਟ ਦੀ ਕੀਮਤ 130 ਆਸਟ੍ਰੇਲੀਅਨ ਡਾਲਰ ਹੈ।
