ਪਰਥ ਦੀ ਇੱਕ ਝੀਲ ਵਿੱਚ ਕਾਰ ਡਿੱਗਣ ਨਾਲ਼ ਭਾਰਤੀ ਮੂਲ ਦੀਆਂ ਦੋ ਕੁੜੀਆਂ ਦੀ ਮੌਤ ਹੋ ਗਈ ਹੈ ਜਿਸ ਪਿੱਛੋਂ ਪਰਥ ਵਿਚਲੇ ਹਿੰਦੂ ਭਾਈਚਾਰੇ ਵੱਲੋਂ ਸੋਗ ਦਾ ਪ੍ਰਗਟਾਵਾ ਕੀਤਾ ਗਿਆ ਹੈ।
ਬੈਨੇਟ ਸਪ੍ਰਿੰਗਜ਼ ਵਿੱਚ ਸਥਿਤ ਸ਼੍ਰੀ ਸਵਾਮੀਨਾਰਾਇਣ ਮੰਦਿਰ, ਜਿਥੋਂ ਦੀਆਂ ਇਹ ਦੋਨੋਂ ਕੁੜੀਆਂ ਸ਼ਰਧਾਲੂ ਸਨ, ਵਲੋਂ ਵੀ ਇਸ ਦੁਰਘਟਨਾ 'ਤੇ ਦੁੱਖ ਦਾ ਪ੍ਰਗਟਾਵਾ ਕੀਤਾ ਗਿਆ ਹੈ।
ਨਿਧੀ ਹਿਰਾਨੀ ਅਤੇ ਰੁਕਸਮੀ ਵਾਘਜੀਹਾਨੀ ਦਾ ਜਨਮ ਕੀਨੀਆ ਵਿੱਚ ਹੋਇਆ ਸੀ ਅਤੇ ਇਹ ਦੋਵੇਂ ਸਹੇਲੀਆਂ ਆਸਟ੍ਰੇਲੀਆ ਵਿੱਚ ਐਡਿਥ ਕੋਵਨ ਯੂਨੀਵਰਸਿਟੀ ਵਿੱਚ ਨਰਸਿੰਗ ਦੀ ਪੜ੍ਹਾਈ ਕਰਨ ਲਈ ਆਈਆਂ ਸੀ ਅਤੇ ਬਹੁਤ ਘਟ ਸਮੇਂ ਵਿੱਚ ਇਨ੍ਹਾਂ ਨੇ ਸਥਾਨਕ ਭਾਈਚਾਰੇ ਵਿੱਚ ਆਪਣੀ ਪਛਾਣ ਬਣਾ ਲਈ ਸੀ।
ਮਿਸ ਵਾਘਜੀਹਾਨੀ ਦੇ ਰਿਸ਼ਤੇਦਾਰ ਕਲਪੇਸ਼ ਹਲਾਈ ਨੇ ਐਸ ਬੀ ਐਸ ਨਿਊਜ਼ ਨੂੰ ਦੱਸਿਆ ਕਿ ਜਦੋਂ ਕਾਰ ਪਾਣੀ ਵਿੱਚ ਡੁਬ ਰਹੀ ਸੀ ਤਾਂ ਇਨ੍ਹਾਂ ਕੁੜਿਆਂ ਨੇ ਮੱਦਦ ਲਈ ਉਨ੍ਹਾਂ ਨਾਲ਼ ਸੰਪਰਕ ਕੀਤਾ ਅਤੇ ਉਹ ਮਿੰਟਾਂ ਵਿੱਚ ਹੀ ਦੁਰਘਟਨਾ ਵਾਲ਼ੀ ਥਾਂ 'ਤੇ ਪਹੁੰਚ ਗਏ ਸਨ।
ਉਨ੍ਹਾਂ ਦਸਿਆ ਕਿ ਉਨ੍ਹਾਂ ਨੂੰ ਡੁਬਦੀ ਹੋਏ ਕਾਰ ਵਿੱਚੋਂ ਇਨ੍ਹਾਂ ਕੁੜੀਆਂ ਵਲੋਂ ਖਿੜਕੀ ਤੋੜਨ ਦੀ ਆਵਾਜ਼ ਵੀ ਸੁਣਾਈ ਦਿੱਤੀ ਪਰ ਦੇਖਦੇ ਹੀ ਦੇਖਦੇ ਇਨ੍ਹਾਂ ਦੀ ਕਾਰ ਪਾਣੀ ਵਿੱਚ ਪੂਰੀ ਡੁੱਬ ਗਈ ਤੇ ਉਹ ਤੇ ਉਥੇ ਖੜੇ ਹੋਰ ਲੋਕ ਕੁਛ ਵੀ ਨਾ ਕਰ ਸਕੇ।
ਸ੍ਰੀ ਹਲਾਈ ਨੇ ਕਿਹਾ ਕਿ ਇਨ੍ਹਾਂ ਜਵਾਨ ਕੁੜੀਆਂ ਦੀ ਅਚਨਚੇਤ ਹੋਈ ਮੌਤ ਨਾਲ ਭਾਈਚਾਰਾ ਵੀ ਕਾਫੀ ਸਹਿਮ ਗਿਆ ਹੈ।
