ਵਿਕਟੋਰੀਆ ਪੁਲਿਸ ਵਲੋਂ ਡੇਲਸਫੋਰਡ ਪੱਬ ਦੇ ਬੀਅਰ ਗਾਰਡਨ ਵਿੱਚ ਇੱਕ ਕਾਰ ਹਾਦਸੇ ਤੋਂ ਬਾਅਦ ਪੰਜ ਲੋਕਾਂ ਦੀ ਹੱਤਿਆ ਦੇ ਦੋਸ਼ ਵਿੱਚ ਇੱਕ ਵਿਅਕਤੀ ਉਤੇ ਦੋਸ਼ ਆਇਦ ਕੀਤੇ ਗਏ ਹਨ।
66-ਸਾਲ ਦੇ ਵਿਲੀਅਮ ਸਵਾਲੇ ਉਤੇ ਡਰਾਈਵਿੰਗ ਸਬੰਧੀ ਪੰਜ ਮਾਮਲੇ, ਲਾਪਰਵਾਹੀ ਕਾਰਨ ਗੰਭੀਰ ਸੱਟ ਲੱਗਣ ਦੇ ਦੋ ਮਾਮਲੇ ਅਤੇ ਜਾਨ ਨੂੰ ਖਤਰੇ ਵਿੱਚ ਪਾਉਣ ਵਾਲੇ ਲਾਪਰਵਾਹੀ ਵਾਲੇ ਵਿਵਹਾਰ ਦੇ ਸੱਤ ਦੋਸ਼ ਲਗਾਏ ਗਏ ਹਨ।
ਇਸ ਦੋਸ਼ੀ ਨੇ ਹਾਦਸੇ ਤੋਂ 50 ਮਿੰਟ ਪਹਿਲਾਂ ਵੀ ਇਕ ਟੈਸਟ ਕੀਤਾ ਸੀ ਜਿਸ ਵਿਚ ਉਸਦੀ ਗਲੂਕੋਜ਼ ਘੱਟ ਆਈ ਸੀ। ਦੋਸ਼ੀ ਵਲੋਂ ਵਰਤੀ ਜਾ ਰਹੀ ਸਿਹਤ ਐਪ ਵਲੋਂ ਵੀ ਇਸ ਨੂੰ ਵਾਰ-ਵਾਰ ਚੇਤਾਵਨੀਆਂ ਦਿਤੀਆਂ ਗਈਆਂ ਜਿਸਨੂੰ ਉਹ ਨਜ਼ਰਅੰਦਾਜ਼ ਕਰਦਾ ਰਿਹਾ।
5 ਨਵੰਬਰ, ਹਾਦਸੇ ਵਾਲ਼ੇ ਦਿਨ, ਦੋਸ਼ੀ ਇਕ ਐਸਯੂਵੀ ਗੱਡੀ ਚਲਾ ਰਿਹਾ ਸੀ ਜੋ ਡੇਲਸਫੋਰਡ ਪੱਬ ਦੇ ਬੀਅਰ ਗਾਰਡਨ ਵਿੱਚ ਬੈਠੇ ਲੋਕਾਂ ਵਿਚ ਜਾ ਵੱਜੀ ਸੀ।
ਇਸ ਹਾਦਸੇ ਵਿਚ ਪ੍ਰਤਿਭਾ ਸ਼ਰਮਾ ਉਮਰ 44 ਸਾਲ, ਉਸਦੀ 9 ਸਾਲਾਂ ਦੇ ਧੀ ਅਨਵੀ ਅਤੇ ਉਨ੍ਹਾਂ ਦੇ ਸਾਥੀ ਜਤਿਨ ਕੁਮਾਰ (ਉਮਰ 30 ਸਾਲ), ਵਿਵੇਕ ਭਾਟੀਆ (ਉਮਰ 38 ਸਾਲ) ਅਤੇ ਉਸਦੇ ਪੁੱਤਰ ਵਿਹਾਨ (ਉਮਰ 11ਸਾਲ ) ਦੀ ਮੌਤ ਹੋ ਗਈ।
ਪਰ ਸਵਾਲੇ ਦੇ ਵਕੀਲ ਨੇ ਕਿਹਾ ਕਿ ਉਸ ਦਾ ਮੁਵੱਕਿਲ ਅਕਸਰ ਆਪਣੇ ਗਲੂਕੋਜ਼ ਦੇ ਪੱਧਰ ਦੀ ਨਿਗਰਾਨੀ ਰੱਖਦਾ ਸੀ ਪਰ ਇਸ ਸੰਭਾਵਨਾ ਤੋਂ ਇਨਕਾਰ ਨਹੀਂ ਕੀਤਾ ਜਾ ਸਕਦਾ ਕਿ ਐਪ ਦੁਆਰਾ ਘਟ ਗਲੂਕੋਜ਼ ਦੀ ਚੇਤਾਵਨੀ ਉਹ ਇਸ ਕਾਰਨ ਪਏ ਦੌਰੇ ਕਰਕੇ ਪਛਾਣਨ ਵਿੱਚ ਅਸਮਰੱਥ ਰਿਹਾ।
