'ਐਪਲ' ਉਨ੍ਹਾਂ ਤਕਨੀਕੀ ਕੰਪਨੀਆਂ ਵਿੱਚੋਂ ਇੱਕ ਹੈ ਜੋ ਯੂਰਪੀਅਨ ਯੂਨੀਅਨ ਵਿੱਚ ਚਾਰਜਰਾਂ ਸੰਬੰਧਤ ਪਾਸ ਹੋਏ ਨਵੇਂ ਕਾਨੂੰਨਾਂ ਨਾਲ਼ ਵੱਡੇ ਤੌਰ ਉੱਤੇ ਪ੍ਰਭਾਵਿਤ ਹੋਵੇਗੀ। ਭਵਿੱਖ ਵਿੱਚ ਇਨ੍ਹਾਂ ਤਬਦੀਲੀਆਂ ਦਾ ਆਸਟ੍ਰੇਲੀਅਨ ਖ਼ਪਤਕਾਰਾਂ ਉਤੇ ਵੀ ਅਸਰ ਪੈ ਸਕਦਾ ਹੈ।
'ਐਪਲ' ਕੰਪਨੀ ਆਪਣੇ ਆਈਫੋਨ ਲਈ ਵੱਖਰੀ ਕਿਸਮ ਦੇ ਚਾਰਜਰ ਦੀ ਵਰਤੋਂ ਕਰਦੀ ਹੈ ਪਰ ਯੂਰਪ ਵਿੱਚ ਕਾਨੂੰਨਾਂ ਵਿੱਚ ਬਦਲਾਅ ਹੋਣ ਤੋਂ ਬਾਅਦ ਸਾਰੇ ਮੋਬਾਇਲ ਉਪਕਰਣਾਂ ਨੂੰ 'ਯੂ ਐਸ ਬੀ - ਸੀ ਕਨੈਕਟਰ ਪੋਰਟ' ਜੋਕਿ ਜ਼ਿਆਦਤਰ 'ਐਂਡਰੌਇਡ' ਫੋਨ ਦੁਆਰਾ ਵਰਤੇ ਜਾਂਦੇ ਹਨ, ਦੇ ਅਨੁਕੂਲ ਹੋਣਾ ਪਵੇਗਾ।
ਇਹ ਕਾਨੂੰਨ 2024 ਵਿੱਚ ਲਾਗੂ ਹੋਣਗੇ ਅਤੇ 2026 ਤੋਂ ਲੈਪਟਾਪਾਂ ਨੂੰ ਵੀ ਇਸ ਵਿੱਚ ਸ਼ਾਮਲ ਕੀਤਾ ਜਾਵੇਗਾ। ਕਾਨੂੰਨ ਲਾਗੂ ਹੋਣ ਤੋਂ ਬਾਅਦ 'ਐਪਲ' ਨੂੰ ਯੂਰੋਪ ਵਿੱਚ ਫੋਨ ਅਤੇ ਚਾਰਜਰਾਂ ਦੀ ਵਿਕਰੀ ਜਾਰੀ ਰੱਖਣ ਲਈ ਆਪਣੇ ਵਰਤਮਾਨ 'ਲਾਈਟਿੰਗ' ਚਾਰਜਰ ਨੂੰ ਬਦਲਣਾ ਪਵੇਗਾ।
ਤਕਨੀਕੀ ਮਾਹਰ ਟ੍ਰੇਵਰ ਲੌਂਗ ਨੇ ਐਸ ਬੀ ਐਸ ਨਿਊਜ਼ ਨੂੰ ਦੱਸਿਆ ਕਿ ਯੂਰਪੀਅਨ ਯੂਨੀਅਨ ਵਲੋਂ ਪਾਸ ਕੀਤੇ ਗਏ ਕਾਨੂੰਨ ਆਸਟ੍ਰੇਲੀਆ ਸਮੇਤ ਦੁਨੀਆ ਭਰ ਵਿੱਚ ਇਸ ਸਬੰਧੀ ਕਾਨੂੰਨੀ ਬਦਲਾਵ ਲਿਆਉਣ ਲਈ ਪ੍ਰੇਰਿਤ ਕਰ ਸਕਦੇ ਹਨ।
