'ਵਰਕਿੰਗ ਹੋਲੀਡੇ ਵੀਜ਼ਾ' ਜੋ ਅਕਸਰ 'ਬੈਕਪੈਕਰ ਵੀਜ਼ਾ' ਨਾਂ ਨਾਲ਼ ਵੀ ਜਾਣਿਆ ਜਾਂਦਾ ਹੈ,18 ਤੋਂ 30 ਸਾਲ ਦੀ ਉਮਰ ਦੇ ਚੋਣਵੇ ਦੇਸ਼ਾਂ ਦੇ ਨਾਗਰਿਕਾਂ ਲਈ ਉਪਲਬਧ ਹੈ।
ਕੈਨੇਡਾ, ਡੈਨਮਾਰਕ, ਆਇਰਲੈਂਡ, ਇਟਲੀ ਅਤੇ (ਜਲਦ ਹੀ) ਯੂ.ਕੇ. ਦੇ ਨਾਗਰਿਕਾਂ ਲਈ ਇਹ ਉਮਰ ਸੀਮਾ 35 ਸਾਲ ਦੀ ਹੈ।
ਪਰ ਜਿਵੇਂ ਕਿ ਸੈਰ-ਸਪਾਟਾ, 'ਹਾਸਪੀਟੈਲਿਟੀ' ਅਤੇ ਹੋਰ ਅਹਿਮ ਖੇਤਰਾਂ ਵਿੱਚ ਕਾਮਿਆਂ ਦੀ ਘਾਟ ਵਧਦੀ ਜਾ ਰਹੀ ਹੈ ਟੂਰਿਜ਼ਮ ਐਂਡ ਟ੍ਰਾਂਸਪੋਰਟ ਫੋਰਮ ਆਸਟ੍ਰੇਲੀਆ (ਟੀ ਟੀ ਐਫ ਏ) ਵਲੋਂ 'ਵਰਕਿੰਗ ਹੋਲੀਡੇ ਵੀਜ਼ਾ' ਦੇ ਵਿਸਤਾਰ ਦਾ ਸੁਝਾਅ ਦਿੱਤਾ ਜਾ ਰਿਹਾ ਹੈ।
ਟੀ ਟੀ ਐਫ ਏ ਦੇ ਮੁੱਖ ਕਾਰਜਕਾਰੀ ਅਧਿਕਾਰੀ, ਮਾਰਗੀ ਔਸਮੰਡ ਦਾ ਕਹਿਣਾ ਹੈ ਕਿ ਵਰਕਿੰਗ ਹੋਲੀਡੇ ਵੀਜ਼ਾ' ਤਹਿਤ ਉਮਰ ਸੀਮਾ ਨੂੰ 50 ਤੱਕ ਵਧਾਉਣ ਨਾਲ਼ ਸੈਰ-ਸਪਾਟੇ ਵਰਗੇ ਖੇਤਰਾਂ ਵਿੱਚ ਸਕਿਲਡ ਕਾਮਿਆਂ ਦੀ ਕਮੀ ਨੂੰ ਪੂਰਾ ਕੀਤਾ ਜਾ ਸਕਦਾ ਹੈ।
ਮਿਸ ਔਸਮੰਡ ਨੇ ਕਿਹਾ ਕਿ ਉਮਰ ਸੀਮਾ ਨੂੰ ਵਧਾਉਣ ਨਾਲ "ਸੀਨੀਅਰ ਅਹੁਦਿਆਂ ਨੂੰ ਭਰਨ ਲਈ ਹੋਰ ਬਿਹਤਰ ਵਿਕਲਪ ਮਿਲ ਸਕਦਾ ਹੈ।"
16 ਦਸੰਬਰ 2022 ਤੱਕ 'ਵਰਕਿੰਗ ਹੋਲੀਡੇ ਵੀਜ਼ੇ' ਉੱਤੇ ਲਗਭਗ 129,300 ਲੋਕ ਆਸਟ੍ਰੇਲੀਆ ਪਹੁੰਚ ਚੁੱਕੇ ਸਨ।
