ਬਹੁਤੇ ਲੋਕਾਂ ਦਾ ਕਹਿਣਾ ਹੈ ਕਿ ਉਹ ਜੌਬਸੀਕਰ ਦੀ ਮੌਜੂਦਾ ਦਰ 'ਤੇ ਗੁਜ਼ਾਰਾ ਨਹੀਂ ਕਰ ਸਕਦੇ ਅਤੇ ਉਨ੍ਹਾਂ ਨੇ ਇਸ ਭਲਾਈ ਭੁਗਤਾਨ ਨੂੰ ਵਧਾਉਣ ਲਈ ਸਰਕਾਰ ਨੂੰ ਅਪੀਲ ਕੀਤੀ ਹੈ।
ਆਸਟ੍ਰੇਲੀਅਨ ਕੌਂਸਲ ਆਫ਼ ਸੋਸ਼ਲ ਸਰਵਿਸ ਅਤੇ ਯੂਨੀਵਰਸਿਟੀ ਆਫ਼ ਨਿਊ ਸਾਊਥ ਵੇਲਜ਼ ਵਲੋਂ ਕੀਤੀ ਗਈ ਇਕ ਖੋਜ ਵਿੱਚ ਪਾਇਆ ਗਿਆ ਕਿ 58 ਫ਼ੀਸਦੀ ਲੋਕ ਮੌਜੂਦਾ ਜੌਬਸੀਕਰ 'ਤੇ ਗੁਜ਼ਾਰਾ ਨਹੀਂ ਕਰ ਪਾ ਰਹੇ ਜਦਕਿ 23 ਫ਼ੀਸਦੀ ਨੇ ਕਿਹਾ ਕਿ ਉਹ ਬਹੁਤ ਮੁਸ਼ਕਲ ਨਾਲ਼ ਇਸ 'ਤੇ ਗੁਜ਼ਾਰਾ ਕਰ ਰਹੇ ਹਨ।
ਇਸ ਸਰਵੇਖਣ ਵਿੱਚ ਇਹ ਵੀ ਪਾਇਆ ਗਿਆ ਕਿ 62 ਪ੍ਰਤੀਸ਼ਤ ਲੋਕਾਂ ਦੀ ਇਹ ਸੋਚ ਹੈ ਕਿ ਮੌਜੂਦਾ ਸਰਕਾਰੀ ਨੀਤੀਆਂ ਹੀ ਮੁੱਖ ਤੌਰ ਉੱਤੇ ਇਨ੍ਹਾਂ ਲੋਕਾਂ ਲਈ ਗਰੀਬੀ ਵਰਗੇ ਹਲਾਤ ਪੈਦਾ ਕਰਨ ਲਈ ਜ਼ਿਮੇਵਾਰ ਹਨ।
ਬਿਨਾਂ ਬੱਚੇ ਵਾਲੇ ਸਿੰਗਲਜ਼ ਲਈ ਜੌਬਸੀਕਰ ਦੀ ਵੱਧ ਤੋਂ ਵੱਧ ਮੌਜੂਦਾ ਦਰ ਇਸ ਵੇਲ਼ੇ 53.51 ਡਾਲਰ ਪ੍ਰਤੀ ਦਿਨ ਹੈ ਜਦਕਿ 55 ਸਾਲ ਤੋਂ ਵੱਧ ਉਮਰ ਦੇ ਲੋਕਾਂ, ਜੋ ਨੌਂ ਮਹੀਨਿਆਂ ਤੋਂ ਆਮਦਨ ਸਹਾਇਤਾ ਭੁਗਤਾਨ ਲੈ ਰਹੇ ਹਨ, ਲਈ ਇਹ ਦਰ 57.32 ਡਾਲਰ ਹੈ।
ਇਸ ਖੋਜ ਨੇ ਇਹ ਵੀ ਖੁਲਾਸਾ ਕੀਤਾ ਕਿ 76 ਪ੍ਰਤੀਸ਼ਤ ਲੋਕਾਂ ਦਾ ਮੰਨਣਾ ਹੈ ਕਿ ਇਸ ਨੂੰ ਵਧਾਉਣ ਦੀ ਲੋੜ ਹੈ ਅਤੇ ਸਰਕਾਰ ਨੂੰ ਇਸ ਵਿੱਚ ਦਖ਼ਲ ਦੇਣਾ ਚਾਹੀਦਾ ਹੈ।
