ਪੇਸ਼ ਕੀਤੇ ਗਏ ਬਜਟ ਵਿੱਚ ਇਹ ਅਨੁਮਾਨ ਲਗਾਇਆ ਗਿਆ ਹੈ ਕਿ ਆਸਟ੍ਰੇਲੀਆ ਵਿੱਚ ਬਿਜਲੀ ਅਤੇ ਗੈਸ ਦੀਆਂ ਕੀਮਤਾਂ ਵਿੱਚ ਵਾਧਾ ਹੋ ਸਕਦਾ ਹੈ।
ਬਜਟ ਵਿੱਚ ਬਿਜਲੀ ਦੀਆਂ ਕੀਮਤਾਂ ਨੂੰ ਘਟਾਉਣ ਲਈ ਕੋਈ ਸੇਧ ਨਹੀਂ ਦਿੱਤੀ ਗਈ ਪਰ ਅਲਬਨੀਜ਼ੀ ਸਰਕਾਰ ਨੇ ਸੰਕੇਤ ਦਿੱਤਾ ਹੈ ਕਿ ਇਸ ਸੰਕਟ ਦਾ ਹੱਲ ਕੱਢਣ ਲਈ ਉਹ 'ਰੈਗੂਲੇਟਰੀ ਤਬਦੀਲੀਆਂ' ਲਿਆਉਣ ਬਾਰੇ ਸੋਚ ਰਹੀ ਹੈ।
ਆਸਟ੍ਰੇਲੀਆ ਵੱਡੀ ਮਾਤਰਾ ਵਿੱਚ ਗੈਸ ਨਿਰਯਾਤ ਕਰਦਾ ਹੈ ਜਿੱਥੇ ਉਤਪਾਦਕ ਜ਼ਿਆਦਾ ਕੀਮਤ ਵਿੱਚ ਗੈਸ ਵੇਚ ਸਕਦੇ ਹਨ ਪਰ ਸੁਤੰਤਰ ਅਰਥ ਸ਼ਾਸਤਰੀ ਕ੍ਰਿਸ ਰਿਚਰਡਸਨ ਦਾ ਕਹਿਣਾ ਹੈ ਕਿ ਬਿਜਲੀ ਦੀਆਂ ਕੀਮਤਾਂ ਨੂੰ ਘਟਾਉਣ ਲਈ ਗੈਸ ਦੀਆਂ ਕੀਮਤਾਂ ਨੂੰ ਘਟਾਉਣਾ ਬਹੁਤ ਜ਼ਰੂਰੀ ਹੈ।
ਗ੍ਰੀਨਜ਼ ਪਾਰਟੀ ਦਾ ਕਹਿਣਾ ਹੈ ਕਿ ਸਰਕਾਰ ਨੂੰ ਬਿਜਲੀ ਦੀਆਂ ਕੀਮਤਾਂ ਨੂੰ 'ਕੈਪ' ਕਰਨਾ ਚਾਹੀਦਾ ਹੈ ਅਤੇ ਸ੍ਰੀ ਰਿਚਰਡਸਨ ਵੀ ਇਸ ਸੁਝਾਵ ਨਾਲ ਸਹਿਮਤੀ ਰੱਖਦੇ ਹਨ।
ਗੈਸ ਦੀਆਂ ਕੀਮਤਾਂ ਨੂੰ ਕਿਫਾਇਤੀ ਪੱਧਰ ਤੇ ਰੱਖਣ ਲਈ ਆਸਟ੍ਰੇਲੀਆ ਇੰਸਟੀਚਿਊਟ ਨੇ ਵੀ ਵਿਦੇਸ਼ਾਂ ਵਿੱਚ ਗੈਸ ਵੇਚਣ ਨੂੰ ਤਰਜੀਹ ਦੇ ਰਹੇ ਉਤਪਾਦਕਾਂ ਉੱਤੇ ਉੱਚ ਦਰ ਵਾਲ਼ਾ 'ਵਿੰਡਫਾਲ ਟੈਕਸ' ਲਾਉਣ ਦਾ ਸੁਝਾਵ ਦਿੱਤਾ ਹੈ।
