ਯੂਨਾਈਟਿਡ ਆਸਟ੍ਰੇਲੀਆ ਪਾਰਟੀ ਦੇ ਪ੍ਰਧਾਨ ਕਲਾਈਵ ਪਾਮਰਜ਼ ਦੀ ਆਖਰੀ-ਮਿੰਟ ਦੀ ਕਾਨੂੰਨੀ ਚੁਣੌਤੀ ਨੂੰ ਫ਼ੈਡਰਲ ਕੋਰਟ ਨੇ ਖਾਰਜ ਕਰ ਦਿੱਤਾ ਹੈ। ਇਸ ਚੁਣੌਤੀ ਵਿੱਚ ਸ਼੍ਰੀ ਪਾਮਰਜ਼ ਵਲੋਂ 'ਐਕਸ' ਜਾਂ 'ਕ੍ਰੋਸ' ਦੇ ਨਿਸ਼ਾਨ ਨੂੰ ਨੋ-ਵੋਟ ਵਜੋਂ ਗਿਣਨ ਲਈ ਕੋਸ਼ਿਸ਼ ਕੀਤੀ ਗਈ ਸੀ।
ਇਸ ਫ਼ੈਸਲੇ ਤੇ ਟਿੱਪਣੀ ਕਰਦਿਆਂ ਬੈਰਿਸਟਰ ਲੂਕ ਲਿਵਿੰਗਸਟਨ ਐਸ ਸੀ ਨੇ ਕਿਹਾ ਕਿ "ਜੇਕਰ ਅਦਾਲਤ ਟਿੱਕ ਦੇ ਨਿਸ਼ਾਨ ਤੋਂ ਇਹ ਸਿੱਟਾ ਕੱਢਦੀ ਹੈ ਕਿ ਇਹ 'ਹਾਂ' ਵੋਟ ਹੈ ਤਾਂ 'ਕ੍ਰੋਸ' ਦੀ ਵੋਟ ਨੂੰ ਨਾਂ-ਵੋਟ ਵਜੋਂ ਮਾਨਤਾ ਦਿੱਤੀ ਜਾਣੀ ਚਾਹੀਦੀ ਹੈ।"
ਪਰ ਏ ਈ ਸੀ ਦੇ ਬੈਰਿਸਟਰ ਸਟੀਫਨ ਫ੍ਰੀ ਐਸ ਸੀ ਨੇ 'ਟਿੱਕ' ਦੇ ਨਿਸ਼ਾਨ ਨੂੰ ਹਾਂ-ਵੋਟ ਸਮਝਣਾ ਇਕ ਸਹੀ ਫੈਸਲਾ ਦੱਸਿਆ ਹੈ। ਉਨ੍ਹਾਂ ਕਿਹਾ ਕਿ "ਇਸ ਦੇਸ਼ ਵਿੱਚ ਚੋਣਾਂ ਦੇ ਸੰਦਰਭ ਵਿੱਚ 'ਐਕਸ' ਜਾਂ 'ਕ੍ਰੋਸ' ਦੇ ਨਿਸ਼ਾਨ ਨੂੰ 'ਹਾਂ-ਪੱਖੀ' ਸਮਝੇ ਜਾਣ ਦਾ ਇੱਕ ਲੰਮਾ ਇਤਿਹਾਸ ਹੈ।"
ਅਕਤੂਬਰ 14 ਦੀ ਰਾਏਸ਼ੁਮਾਰੀ ਵਿੱਚ ਸਰਕਾਰ ਵੱਲੋਂ ਆਦਿਵਾਸੀ ਅਤੇ ਟੋਰੇਸ ਸਟ੍ਰੇਟ ਆਈਲੈਂਡਰ 'ਵੋਇਸ' ਨੂੰ ਮਾਨਤਾ ਦੇਣ ਲਈ ਸੰਵਿਧਾਨ ਬਦਲਣ ਲਈ ਆਸਟ੍ਰੇਲੀਅਨ ਲੋਕਾਂ ਕੋਲੋਂ ਮਨਜ਼ੂਰੀ ਮੰਗੀ ਜਾ ਰਹੀ ਹੈ।
