19 ਸਾਲਾ ਸ਼ਿਕਾਰੀ ਜੋਸ਼ੂਆ ਹੇਅਡਨ ਨੇ ਦੱਸਿਆ ਕਿ ਮੰਗਲਵਾਰ ਦੀ ਰਾਤ ਨੂੰ ਉਹ ਆਪਣੀ ਕਾਰ ਵਿੱਚ ਬੈਠਾ ਸ਼ਿਕਾਰ ਦਾ ਇੰਤਜ਼ਾਰ ਕਰ ਰਿਹਾ ਸੀ ਜਦੋਂ ਉਸ ਨੂੰ ਤਿੰਨ ਕੰਗਾਰੂ ਦਿਖੇ। ਚੰਗਾ ਮੌਕਾ ਸਮਝ ਕੇ ਜੋਸ਼ੂਆ ਨੇ ਜਦੋਂ ਹੀ ਕਾਰ ਦੀ ਖਿੜਕੀ ਵਿੱਚੋਂ ਬਾਹਰ ਵੱਲ ਨੂੰ ਉਲਰ ਕੇ ਨਿਸ਼ਾਨਾਂ ਲਾਉਣਾ ਚਾਹਿਆ, ਤਾਂ ਉਹਨਾਂ ਤਿੰਨ ਕੰਗਾਰੂਆਂ ਵਿੱਚੋਂ ਇੱਕ ਨੇ ਉਸ ਵਾਲ ਛਾਲ ਕੱਢ ਮਾਰੀ।
ਕੰਗਾਰੂ ਦੇ ਇਸ ਅਚਾਨਕ ਉਲਟ ਵਾਰ ਨਾਲ ਜਿੱਥੇ ਕਾਰ ਦੇ ਅਗਲੇ ਹਿੱਸੇ ਨੂੰ ਨੁਕਸਾਨ ਪੁੱਜਿਆ ਉੱਥੇ ਨਾਲ ਹੀ ਜੋਸ਼ੂਆ ਦੇ ਜਬਾੜੇ ਉੱਤੇ ਵੀ ਭਾਰੀ ਜਖਮ ਹੋਏ ਕਿਉਂਕਿ ਕੰਗਾਰੂ ਨੇ ਫੁਰਤੀ ਨਾਲ ਦੂਜਾ ਵਾਰ ਕਰਦੇ ਹੋਏ, ਆਪਣੇ ਸਿਰ ਦਾ ਨਿਸ਼ਾਨਾਂ ਐਨ ਸਿੱਧਾ ਕਰ ਕੇ ਉਸ ਦੇ ਮੂੰਹ ਉੱਤੇ ਕੱਢ ਮਾਰਿਆ।
ਇਹ ਹਮਲਾ ਇੰਨਾ ਫੁਰਤੀ ਨਾਲ ਕੀਤਾ ਗਿਆ ਸੀ ਕਿ ਜੋਸ਼ੂਆ ਨੂੰ ਸੰਭਲਣ ਦਾ ਕੋਈ ਮੌਕਾ ਹੀ ਨਹੀਂ ਮਿਲਿਆ ਅਤੇ ਉਹ ਜਖਮਾਂ ਦੀ ਤਾਬ ਨਾ ਝਲਦਾ ਹੋਇਆ ਤਕਰੀਬਨ 30 ਸਕਿੰਟਾਂ ਵਾਸਤੇ ਬੇਹੋਸ਼ ਵੀ ਹੋ ਗਿਆ। ਜਦੋਂ ਉਸ ਨੂੰ ਮੁੜ ਹੋਸ਼ ਆਈ ਤਾਂ ਉਸ ਨੇ ਆਪਣੇ ਭਰਾ ਨਾਲ ਹੀ ਨਾਲ ਹੀ ਲੜਨਾਂ ਸ਼ੁਰੂ ਕਰ ਦਿੱਤਾ ਕਿ ਉਸੀ ਨੇ ਜੋਸ਼ੂਆ ਨੂੰ ਜਖਮੀ ਕੀਤਾ ਸੀ। ਪਰ ਉਸ ਦੇ ਭਰਾ ਨੇ ਦੱਸਿਆ ਕਿ ਅਸਲ ਵਿੱਚ ਤਾਂ ਸ਼ਿਕਾਰ ਨੇ ਹੀ ਸ਼ਿਕਾਰੀ ਉੱਤੇ ਹਮਲਾ ਕਰ ਦਿੱਤਾ ਸੀ।
ਸ਼੍ਰੀ ਹੇਅਡਨ ਦੇ ਭਰਾ ਨੇ ਉਸ ਨੂੰ ਤੁਰੰਤ ਹਸਪਤਾਲ ਪਹੁੰਚਾਇਆ ਜਿੱਥੇ ਉਸ ਦੀ ਮੁੱਢਲੀ ਜਾਂਚ ਤੋਂ ਬਾਦ ਉਸ ਨੂੰ ਰਾਇਲ ਪਰਥ ਹਸਪਤਾਲ ਭੇਜ ਦਿੱਤਾ ਗਿਆ। ਇਸ ਸਮੇਂ ਜੋਸ਼ੂਆ ਦੇ ਚਿਹਰੇ ਉੱਤੇ ਬਹੁਤ ਜਿਆਦਾ ਸੋਜਸ਼ ਹੈ ਅਤੇ ਇਸ ਕਾਰਨ ਸਰਜਰੀ ਲਈ ਤਕਰੀਬਨ 10 ਦਿੰਨ ਇੰਤਜਾਰ ਕਰਨਾ ਹੋਵੇਗਾ।
ਇਸ ਸਮੇਂ ਸ਼੍ਰੀ ਹੇਅਡਨ ਦੇ ਚੇਹਰੇ ਅਤੇ ਖਾਸ ਕਰਕੇ ਅੱਖ ਦੇ ਕੋਲ ਭਾਰੀ ਸੋਜਸ਼ ਹੈ।
19 ਸਾਲਾ ਸ਼੍ਰੀ ਹੇਅਡਨ ਨੇ ਕਿਹਾ ਕਿ ਅੱਜ ਤੱਕ ਉਹਨਾਂ ਨੇ ਆਪਣੇ ਭੋਜਨ ਲਈ ਪਹਿਲਾਂ ਵੀ ਕਈ ਵਾਰ ਕੰਗਾਰੂਆਂ ਦਾ ਸ਼ਿਕਾਰ ਕੀਤਾ ਹੈ, ਪਰ ਇਹ ਪਹਿਲੀ ਵਾਰ ਹੀ ਹੋਇਆ ਹੈ ਜਦੋਂ ਉਲਟਾ ਕੰਗਾਰੂ ਨੇ ਹੀ ਪਹਿਲ ਕਰਦੇ ਹੋਏ ਪਲਟ ਵਾਰ ਕੀਤਾ ਹੋਵੇ।
