ਆਸਟ੍ਰੇਲੀਆ ਦਾ ਹਿੰਦੂ ਭਾਈਚਾਰਾ ਐਤਵਾਰ ਨੂੰ ਸਿਡਨੀ ਦੇ ਭਾਰਤੀਏ ਮੰਦਿਰ ਵਿੱਚ ਹੋਈ ਬੇਅਦਬੀ ਦੀ ਘਟਨਾ ਪਿੱਛੋਂ ਕਾਫੀ ਨਾਰਾਜ਼ ਅਤੇ ਉਦਾਸ ਹੈ।
ਇਸ ਘਟਨਾ ਦੌਰਾਨ ਮੰਦਿਰ ਵਿਚਲੇ ਦੇਵੀ-ਦੇਵਤਿਆਂ ਦੀਆਂ 30 ਮੂਰਤੀਆਂ ਅਤੇ ਤਸਵੀਰਾਂ ਤੋੜ ਦਿੱਤੀਆਂ ਗਈਆਂ। ਗਲੀਚੇ ਨੂੰ ਅੱਗ ਲਾਈ ਗਈ ਅਤੇ ਮੰਦਿਰ ਨੂੰ ਪੂਰੀ ਤਰਾਂ ਤਹਿਸ-ਨਹਿਸ ਕੀਤਾ ਗਿਆ।
ਇਸ ਅਫਸੋਸਨਾਕ ਘਟਨਾ ਦੀ ਹਰ ਪਾਸਿਓਂ ਨਿਖੇਧੀ ਹੋ ਰਹੀ ਹੈ - ਪ੍ਰਵਾਸ, ਨਾਗਰਿਕਤਾ ਅਤੇ ਮਲਟੀਕਲਚਰਲ ਅਫੇਅਰਸ ਮੰਤਰੀ ਡੇਵਿਡ ਕੋਲਮਨ ਨੇ ਦੁੱਖ ਪ੍ਰਗਟਾਉਂਦਿਆਂ ਆਖਿਆ ਹੈ ਕਿ ਇੱਕ ਧਾਰਮਿਕ ਅਤੇ ਪਵਿੱਤਰ ਸਥਾਨ ਤੇ ਹੋਈ ਇਹ ਘਟਨਾ ਨਾ ਸਿਰਫ਼ ਆਸਟ੍ਰੇਲੀਅਨ ਸਮਾਜ ਦੀਆਂ ਕਦਰਾਂ-ਕੀਮਤਾਂ ਦੇ ਉਲਟ ਹੈ ਬਲਕਿ ਬੇਹੱਦ ਸ਼ਰਮਨਾਕ ਵੀ ਹੈ।
ਕੇਸ ਦੀ ਤਫਤੀਸ਼ ਕਰ ਰਹੇ ਪੁਲਿਸ ਅਧਿਕਾਰੀ ਨੇ ਐਸ ਬੀ ਐਸ ਹਿੰਦੀ ਨੂੰ ਦੱਸਿਆ ਹੈ ਕਿ ਘਟਨਾ ਨਫ਼ਰਤ ਤੋਂ ਪ੍ਰੇਰਿਤ ਨਹੀਂ ਜਾਪਦੀ।
"ਇਸ ਤਰਾਂ ਨਹੀਂ ਲੱਗਦਾ, ਓਥੇ ਕਿਸੇ ਕਿਸਮ ਦੇ ਇਤਰਾਜ਼ਯੋਗ ਸ਼ਬਦ ਨਹੀਂ ਲਿਖੇ ਗਏ ਜੋ ਕਿ ਆਮ ਤੌਰ 'ਤੇ ਨਫ਼ਰਤ ਤੋਂ ਪ੍ਰੇਰਿਤ ਘਟਨਾਵਾਂ ਵਿੱਚ ਹੁੰਦਾ ਹੈ।"
ਮੰਦਿਰ ਸਿਡਨੀ ਦੇ ਫਿਜ਼ੀ-ਹਿੰਦੂ ਭਾਈਚਾਰੇ ਵੱਲੋਂ 20 ਸਾਲ ਪਹਿਲਾਂ ਇੱਕ ਪੁਰਾਣੇ ਐਂਗਲੀਕਨ ਚਰਚ ਨੂੰ ਨਵਾਂ ਰੂਪ ਦੇਕੇ ਸਥਾਪਿਤ ਕੀਤਾ ਗਿਆ ਸੀ।
ਮੰਦਿਰ ਦੀ ਕਮੇਟੀ ਨੇ ਦੱਸਿਆ ਹੈ ਕਿ ਇਸ ਧਾਰਮਿਕ ਸਥਾਨ ਦਾ ਹਰ ਕੋਈ ਸਤਿਕਾਰ ਕਰਦਾ ਹੈ ਅਤੇ ਅੱਜ ਤੱਕ ਓਥੇ ਕਦੇ ਨਸਲਵਾਦ ਜਾਂ ਨਫਰਤ ਭਰੀ ਕੋਈ ਵੀ ਘਟਨਾ ਨਹੀਂ ਹੋਈ।
