ਡਾ: ਅਡੇਲੇ ਮੁਰਡੋਲੋ ਮੈਲਬੌਰਨ ਵਿੱਚ ‘ਮਲਟੀਕਲਚਰਲ ਸੈਂਟਰ ਫਾਰ ਵੂਮੈਨ ਹੈਲਥ’ ਵਿੱਚ ਕਾਰਜਕਾਰੀ ਨਿਰਦੇਸ਼ਕ ਹਨ।
ਉਹਨਾਂ ਦਾ ਕਹਿਣਾ ਹੈ ਕਿ ਜਨਮ ਤੋਂ ਪਹਿਲਾਂ ਦੀ ਦੇਖਭਾਲ ਦਾ ਉੱਦੇਸ਼ ਗਰਭਵਤੀ ਔਰਤ ਅਤੇ ਉਸਦੇ ਹੋਣ ਵਾਲੇ ਬੱਚੇ ਦੀ ਸਿਹਤ ਨੂੰ ਬਿਹਤਰ ਬਣਾਉਣਾ ਅਤੇ ਕਿਸੇ ਵੀ ਪ੍ਰਕਾਰ ਦੀ ਬਿਮਾਰੀ ਨੂੰ ਰੋਕਣਾ ਹੈ।
2019 ਵਿੱਚ ‘ਆਸਟ੍ਰੇਲੀਅਨ ਇੰਸਟੀਚਿਊਟ ਆਫ਼ ਹੈਲਥ ਐਂਡ ਵੈਲਫੇਅਰ’ ਦੁਆਰਾ ਪ੍ਰਕਾਸ਼ਿਤ ਅੰਕੜਿਆਂ ਦੇ ਅਨੁਸਾਰ, 55 ਪ੍ਰਤੀਸ਼ਤ ਔਰਤਾਂ ਗਰਭ ਅਵਸਥਾ ਦੇ ਪਹਿਲੇ 10 ਹਫ਼ਤਿਆਂ ਵਿੱਚ ਜਨਮ ਤੋਂ ਪਹਿਲਾਂ ਦੀ ਦੇਖਭਾਲ ਵਿੱਚ ਸ਼ਾਮਲ ਹੋਈਆਂ ਸਨ।
ਡਾਕਟਰ ਮੁਰਡੋਲੋ ਦੱਸਦੇ ਹਨ ਕਿ ਗਰਭ-ਅਵਸਥਾ ਦੇ ਪਹਿਲੇ ਤਿੰਨ ਮਹੀਨਿਆਂ ਵਿੱਚ ਦੇਖਭਾਲ ਨਾ ਲੈਣ ਦੀ ਵਧੇਰੇ ਸੰਭਾਵਨਾ ਵਾਲੇ ਚਾਰ ਸਮੂਹਾਂ ਵਿੱਚੋਂ ਇੱਕ ਪ੍ਰਵਾਸੀ ਔਰਤਾਂ ਹਨ।
ਉਹਨਾਂ ਦਾ ਕਹਿਣਾ ਹੈ ਕਿ ਨਿਯਮਤ ਸਕ੍ਰੀਨਿੰਗ ਸ਼ੁਰੂਆਤੀ ਪੇਚੀਦਗੀਆਂ ਦਾ ਪਤਾ ਲਗਾ ਸਕਦੀ ਹੈ ਅਤੇ ਇਸਨੂੰ ਰੋਕ ਸਕਦੀ ਹੈ।
ਅਮਾਂਡਾ ਹੈਨਰੀ ਯੂ.ਐਨ.ਐਸ.ਡਬਲਯੂ ਵਿੱਚ ‘ਓਬਸਟੈਟ੍ਰਿਕਸ ਅਤੇ ਗਾਇਨੀਕੋਲੋਜੀ’ ਵਿੱਚ ਇੱਕ ਐਸੋਸੀਏਟ ਪ੍ਰੋਫੈਸਰ ਹਨ ਅਤੇ ਸਿਡਨੀ ਦੇ ਸੇਂਟ ਜਾਰਜ ਪਬਲਿਕ ਹਸਪਤਾਲ ਅਤੇ ਰਾਇਲ ਹਸਪਤਾਲ ਫਾਰ ਵੂਮੈਨ ਵਿੱਚ ਇੱਕ ਪ੍ਰਸੂਤੀ ਮਾਹਰ ਹਨ।
ਉਹਨਾਂ ਦੱਸਿਆ ਕਿ ਗਰਭ ਅਵਸਥਾ ਵਿੱਚ ਪਹਿਲੀ ਮੁਲਾਕਾਤ ਸ਼ੁਰੂਆਤ ਦੇ 10 ਹਫ਼ਤਿਆਂ ਵਿੱਚ ਹੋਣੀ ਚਾਹੀਦੀ ਹੈ, ਨਾਂ ਕਿ 14 ਹਫ਼ਤਿਆਂ ਤੋਂ ਬਾਅਦ।
ਪ੍ਰੋਫੈਸਰ ਹੈਨਰੀ ਦਾ ਕਹਿਣਾ ਹੈ ਕਿ ਪਹਿਲੀ ਮੁਲਾਕਾਤ ਇੱਕ ਜੀ.ਪੀ ਨਾਲ ਸਲਾਹ-ਮਸ਼ਵਰਾ ਹੁੰਦੀ ਹੈ।
ਅਲਟਰਾਸਾਊਂਡ ਦੇ ਸੰਦਰਭ ਵਿੱਚ, ਪ੍ਰੋਫ਼ੈਸਰ ਹੈਨਰੀ ਦਾ ਕਹਿਣਾ ਹੈ, ਕਿ ਆਸਟ੍ਰੇਲੀਅਨ ਗਰਭ-ਅਵਸਥਾ ਦੇਖਭਾਲ ਦਿਸ਼ਾ-ਨਿਰਦੇਸ਼ ਦੀ ਸਿਫਾਰਸ਼ ਮੁਤਾਬਕ 18 ਤੋਂ 20 ਹਫ਼ਤਿਆਂ ਦੇ ਦਰਮਿਆਨ ਅਲਟਰਾਸਾਊਂਡ ਕੀਤਾ ਜਾਂਦਾ ਹੈ।
ਹਾਲਾਂਕਿ, ਕਈ ਔਰਤਾਂ ਦਾ ਡੇਟਿੰਗ ਸਕੈਨ ਵੀ ਹੋ ਸਕਦਾ ਹੈ।
ਪ੍ਰੋਫੈਸਰ ਹੈਨਰੀ ਮੁਤਾਬਕ 20 ਹਫ਼ਤਿਆਂ ਦੇ ਸਕੈਨ ਵਿੱਚ ਬੱਚੇ ਦੀਆਂ ਸਾਰੀਆਂ ‘ਸੰਰਚਨਾਤਮਕ ਐਬਨਾਰਮੈਲਿਟੀਜ਼’ ਦਾ ਮਹਿਜ਼ 50-65 ਫੀਸਦ ਹਿੱਸੇ ਦਾ ਹੀ ਪਤਾ ਲੱਗਦਾ ਹੈ।
ਉਹਨਾਂ ਵਧੇਰੇ ਜਾਣਕਾਰੀ ਦਿੰਦਿਆਂ ਦੱਸਿਆ ਕਿ ਅਜਿਹੇ ਕੋਈ ਟੈਸਟ ਨਹੀਂ ਹਨ ਜੋ ਇਹ ਸੁਨਿਸ਼ਚਿਤ ਕਰ ਸਕਣ ਕਿ ਬੱਚਾ ਪੂਰੀ ਤਰ੍ਹਾਂ ਸਿਹਤਮੰਦ ਪੈਦਾ ਹੋਵੇਗਾ।
ਡਾਕਟਰ ਮੁਰਡੋਲੋ ਸਿਫ਼ਾਰਸ਼ ਕਰਦੇ ਹਨ ਕਿ ਜਿਵੇਂ ਹੀ ਔਰਤਾਂ ਨੂੰ ਪਤਾ ਲੱਗਦਾ ਹੈ ਕਿ ਉਹ ਗਰਭਵਤੀ ਹਨ ਉਦੋਂ ਹੀ ਉਹਨਾਂ ਨੂੰ ਆਪਣੇ ਜੀ.ਪੀ ਨਾਲ ਮੁਲਾਕਾਤ ਬੁੱਕ ਕਰਵਾ ਲੈਣੀ ਚਾਹੀਦੀ ਹੈ ਕਿਉਂਕਿ ਕਦੇ-ਕਦੇ ਬੁਕਿੰਗ ਮਿਲਣ ਵਿੱਚ ਵੀ ਸਮ੍ਹਾਂ ਲੱਗ ਜਾਂਦਾ ਹੈ।
ਉਹਨਾਂ ਇਹ ਵੀ ਦੱਸਿਆ ਕਿ ਜੋ ਔਰਤਾਂ ਅੰਗ੍ਰੇਜ਼ੀ ਨਹੀਂ ਬੋਲ ਸਕਦੀਆਂ ਉਹਨਾਂ ਲਈ ‘ਐਂਟੀਨੈਟੇਲ ਕੇਅਰ’ ਦੌਰਾਨ ਦੋ ਭਾਸ਼ੀਏ ਦੀ ਸੁਵਿਧਾ ਵੀ ਉਪਲਬਧ ਹੈ।
ਸੋਮਵਾਰ ਤੋਂ ਸ਼ੁੱਕਰਵਾਰ ਰਾਤ 9 ਵਜੇ ਐਸ ਬੀ ਐਸ ਪੰਜਾਬੀ ਦਾ ਪ੍ਰੋਗਰਾਮ ਸੁਣੋ ਅਤੇ ਸਾਨੂੰ ਫੇਸਬੁੱਕ ਉੱਤੇ ਵੀ ਫਾਲੋ ਕਰੋ।
