ਵਧੇਰੇ ਸੈਲਾਨੀਆਂ ਅਤੇ ਹੁਨਰਮੰਦ ਕਾਮਿਆਂ ਨੂੰ ਆਸਟ੍ਰੇਲੀਆ ਆਉਣ ਲਈ ਉਤਸ਼ਾਹਿਤ ਕਰਨ ਲਈ ਅਤੇ ਹਵਾਈ ਅੱਡਿਆਂ 'ਤੇ ਚੱਲ ਰਹੀ ਦੇਰੀ ਨੂੰ ਘਟਾਉਣ ਲਈ, ਸਾਰੀਆਂ ਕੋਵਿਡ-19 ਸਰਹੱਦੀ ਪਾਬੰਦੀਆਂ ਅੱਜ ਤੋਂ ਹਟਾ ਦਿੱਤੀਆਂ ਗਈਆਂ ਹਨ ਹਾਲਾਂਕਿ ਮਾਸਕ ਦੀਆਂ ਨੀਤੀਆਂ ਓਸੇ ਤਰ੍ਹਾਂ ਲਾਗੂ ਰਹਿਣਗੀਆਂ।
ਦੋ ਸਾਲਾਂ ਦੀਆਂ ਸਖ਼ਤ ਕੋਵਿਡ-19 ਸਰਹੱਦੀ ਪਾਬੰਦੀਆਂ ਤੋਂ ਬਾਅਦ ਅੰਤਰਰਾਸ਼ਟਰੀ ਯਾਤਰੀਆਂ ਲਈ ਟੀਕਾਕਰਨ ਦੀਆਂ ਲੋੜਾਂ ਨੂੰ ਖਤਮ ਕਰ ਦਿੱਤਾ ਗਿਆ ਹੈ। ਹੁਣ ਡਿਜਿਟਲ ਪੈਸੇਂਜਰ ਡੇਕਲੇਰੇਸ਼ਨ (ਡੀ ਪੀ ਡੀ) ਫਾਰਮ ਨੂੰ ਭਰਨ ਦੀ ਜ਼ਰੂਰਤ ਨਹੀਂ ਹੋਵੇਗੀ।
ਇਨ੍ਹਾਂ ਸਰਹੱਦੀ ਪਾਬੰਦੀਆਂ ਨੂੰ ਹਟਾਏ ਜਾਣ ਦੇ ਫੈਂਸਲੇ ਦੀ ਘੋਸ਼ਣਾ ਕਰਦੇ ਹੋਏ ਸਿਹਤ ਮੰਤਰੀ ਮਾਰਕ ਬਟਲਰ ਨੇ ਕਿਹਾ ਕਿ ਯਾਤਰੀਆਂ ਨੂੰ ਅਜੇ ਵੀ ਏਅਰਲਾਈਨਾਂ ਅਤੇ ਸ਼ਿਪਿੰਗ ਓਪਰੇਟਰਾਂ ਦੇ ਨਾਲ-ਨਾਲ ਹੋਰ ਦੇਸ਼ਾਂ, ਰਾਜਾਂ ਅਤੇ ਪ੍ਰਦੇਸ਼ਾਂ ਦੀਆਂ ਬਾਕੀ ਬਚੀਆਂ ਕੋਵਿਡ -19 ਜ਼ਰੂਰਤਾਂ ਦੀ ਪਾਲਣਾ ਕਰਨੀ ਪਵੇਗੀ।
ਏਅਰਲਾਈਨਾਂ ਆਪਣੇ ਖੁਦ ਦੇ ਟੀਕਾਕਰਨ ਨਿਯਮ ਨਿਰਧਾਰਤ ਕਰਨ ਦੇ ਯੋਗ ਹਨ। ਕੁਝ ਏਅਰਲਾਈਨਾਂ ਤੇ ਸਫ਼ਰ ਕਰਨ ਲਈ ਅਜੇ ਵੀ ਟੀਕਾਕਰਨ ਪ੍ਰਮਾਣ-ਪੱਤਰ ਦੀ ਲੋੜ ਹੋ ਸਕਦੀ ਹੈ।
ਗ੍ਰਹਿ ਮਾਮਲਿਆਂ ਦੀ ਮੰਤਰੀ ਕਲੇਰ ਓ'ਨੀਲ ਨੇ ਕਿਹਾ ਕਿ ਇਹ ਇੱਕ 'ਵੱਡੀ ਖ਼ਬਰ' ਹੈ।
"ਇਨ੍ਹਾਂ ਲੋੜਾਂ ਨੂੰ ਹਟਾਉਣ ਨਾਲ ਨਾ ਸਿਰਫ਼ ਸਾਡੇ ਹਵਾਈ ਅੱਡਿਆਂ ਵਿੱਚ ਦੇਰੀ ਘਟੇਗੀ ਬਲਕਿ ਇਹ ਐਲਾਨ ਵਧੇਰੇ ਸੈਲਾਨੀਆਂ ਅਤੇ ਹੁਨਰਮੰਦ ਕਾਮਿਆਂ ਨੁੰ ਆਸਟ੍ਰੇਲੀਆ ਆਉਣ ਲਈ ਵੀ ਉਤਸ਼ਾਹਿਤ ਕਰੇਗਾ," ਉਨ੍ਹਾਂ ਕਿਹਾ।
ਜ਼ਿਕਰਯੋਗ ਹੈ ਕਿ ਸਮੁੰਦਰੀ ਰਸਤੇ ਆਉਣ ਵਾਲਿਆਂ ਲਈ ਹੁਣ ਸਮੁੰਦਰੀ ਯਾਤਰਾ ਘੋਸ਼ਣਾ ਪੱਤਰ ਨੂੰ ਪੂਰਾ ਕਰਨਾ ਵੀ ਜ਼ਰੂਰੀ ਨਹੀਂ ਹੋਵੇਗਾ।
ਇਸ ਬਾਰੇ ਵਿਸਥਾਰਿਤ ਜਾਣਕਾਰੀ ਹੇਠਾਂ ਦਿੱਤੇ ਆਡੀਓ ਲਿੰਕ ਉੱਤੇ ਕਲਿੱਕ ਕਰ ਕੇ ਲਈ ਜਾ ਸਕਦੀ ਹੈ:
ਸੋਮਵਾਰ ਤੋਂ ਸ਼ੁੱਕਰਵਾਰ ਰਾਤ 9 ਵਜੇ ਐਸ ਬੀ ਐਸ ਪੰਜਾਬੀ ਦਾ ਪ੍ਰੋਗਾਮ ਸੁਣੋ ਅਤੇ ਸਾਨੂੰ ਫੇਸਬੁੱਕ ਉੱਤੇ ਵੀ ਫਾਲੋ ਕਰੋ।
Read in English:
