ਪਰਿਵਾਰਕ ਹਿੰਸਾ ਝੱਲਣ ਵਾਲੇ ਅਸਥਾਈ ਵੀਜ਼ਾ ਧਾਰਕਾਂ ਲਈ ਵਿੱਤੀ ਸਹਾਇਤਾ 'ਚ ਵਾਧਾ

ਫੈਡਰਲ ਸਰਕਾਰ ਨੇ ਹਿੰਸਕ ਸਬੰਧਾਂ ਨੂੰ ਛੱਡਣ ਵਾਲੇ ਅਸਥਾਈ ਵੀਜ਼ਾ ਧਾਰਕਾਂ ਲਈ ਵਿੱਤੀ ਅਸੁਰੱਖਿਆ ਨੂੰ ਘੱਟ ਕਰਨ ਦੇ ਯਤਨ ਵਿੱਚ 2021 ਵਿੱਚ ਪਹਿਲੀ ਵਾਰ ਸ਼ੁਰੂ ਕੀਤੇ ਗਏ ਇੱਕ ਪ੍ਰੋਗਰਾਮ ਦਾ ਵਿਸਥਾਰ ਕੀਤਾ ਹੈ।

6 ਵਿੱਚੋਂ ਇੱਕ ਆਸਟ੍ਰੇਲੀਅਨ ਔਰਤ ਪਰਿਵਾਰਕ ਅਤੇ ਘਰੇਲੂ ਹਿੰਸਾ ਦਾ ਅਨੁਭਵ ਕਰਦੀ ਹੈ, ਅਤੇ ਪ੍ਰਵਾਸੀ ਅਤੇ ਸ਼ਰਨਾਰਥੀ ਔਰਤਾਂ ਵਿੱਚੋਂ ਇਹ ਤਿੰਨ ਵਿੱਚੋਂ ਇੱਕ ਹੈ।

ਪ੍ਰੋਗਰਾਮ ਦੇ ਵਿਸਥਾਰ ਨਾਲ ਪਰਿਵਾਰਕ ਅਤੇ ਘਰੇਲੂ ਹਿੰਸਾ ਦਾ ਸਾਹਮਣਾ ਕਰ ਰਹੇ ਅਸਥਾਈ ਵੀਜ਼ਾ ਧਾਰਕਾਂ ਲਈ ਉਪਲਬਧ ਵਿੱਤੀ ਸਹਾਇਤਾ ਵਿੱਚ ਮੌਜੂਦਾ $3,000 ਤੋਂ $5,000 ਤੱਕ ਵਾਧਾ ਹੋਵੇਗਾ।

ਸਮਾਜ ਸੇਵਾ ਮੰਤਰੀ ਅਮਾਂਡਾ ਰਿਸ਼ਵਰਥ ਦਾ ਕਹਿਣਾ ਹੈ ਕਿ ਇਹ ਇੱਕ ਮਹੱਤਵਪੂਰਨ ਕਦਮ ਹੈ, ਕਿਉਂਕਿ ਇਹ ਅਸਥਾਈ ਵੀਜ਼ਾ ਧਾਰਕਾਂ ਲਈ ਸਥਾਈ ਨਿਵਾਸੀਆਂ ਨੂੰ ਦਿੱਤੇ ਗਏ ਭੁਗਤਾਨਾਂ ਦੇ ਬਰਾਬਰ ਭੁਗਤਾਨ ਦੇਵੇਗਾ।

ਫੈਡਰਲ ਸਰਕਾਰ ਨੇ ਵਾਧੇ ਲਈ ਦੋ ਸਾਲਾਂ ਵਿੱਚ $4.4 ਮਿਲੀਅਨ ਦੀ ਵਚਨਬੱਧਤਾ ਕੀਤੀ ਹੈ।

ਇਹ ਫੰਡਿੰਗ ਪਰਿਵਾਰਕ ਅਤੇ ਘਰੇਲੂ ਹਿੰਸਾ ਦਾ ਸਾਹਮਣਾ ਕਰ ਰਹੇ ਅਸਥਾਈ ਵੀਜ਼ਾ ਧਾਰਕਾਂ ਦੀ ਸਹਾਇਤਾ ਲਈ ਅਪ੍ਰੈਲ 2021 ਵਿੱਚ ਸ਼ੁਰੂ ਕੀਤੇ ਗਏ ਇੱਕ ਪਾਇਲਟ ਪ੍ਰੋਗਰਾਮ ਨੂੰ ਵਧਾਉਣ ਲਈ ਵਚਨਬੱਧ $38.2 ਮਿਲੀਅਨ ਤੋਂ ਵੱਖਰਾ ਹੈ।

ਇਹ ਪਾਇਲਟ ਪ੍ਰੋਗਰਾਮ, ਜਿਸ ਨੂੰ ਜਨਵਰੀ 2025 ਤੱਕ ਵਧਾ ਦਿੱਤਾ ਗਿਆ ਹੈ, ਦਾ ਉੱਦੇਸ਼ ਅਸਥਾਈ ਵੀਜ਼ਾ ਧਾਰਕਾਂ ਨੂੰ ਮਾਲ ਅਤੇ ਸੇਵਾਵਾਂ ਲਈ ਵਿੱਤੀ ਸਹਾਇਤਾ ਪੈਕੇਜ ਅਤੇ ਮਾਈਗ੍ਰੇਸ਼ਨ ਅਤੇ ਪਰਿਵਾਰਕ ਕਾਨੂੰਨ ਲਈ ਕਾਨੂੰਨੀ ਸਲਾਹ ਤੱਕ ਪਹੁੰਚ ਪ੍ਰਦਾਨ ਕਰਨਾ ਹੈ।

ਜੇਕਰ ਤੁਹਾਨੂੰ ਜਾਂ ਤੁਹਾਡੇ ਕਿਸੇ ਜਾਣਕਾਰ ਨੂੰ ਸਹਾਇਤਾ ਦੀ ਲੋੜ ਹੈ, ਤਾਂ ਸਲਾਹ ਸਹਾਇਤਾ 1800RESPECT ਉੱਤੇ, ਜਾਂ 1800 737 732 ਉੱਤੇ ਜਾਂ ਲਾਈਫਲਾਈਨ 13 11 14 ਉੱਤੇ ਉਪਲਬਧ ਹੈ।