ਸੁਰਜੀਤ ਪਾਂਗਲੀ ਪਿਛਲੇ 33-ਸਾਲ ਤੋਂ ਯਾਰਾ-ਟਰੈਮ ਮੈਲਬੌਰਨ ਲਈ ਇੱਕ ਡਰਾਈਵਰ ਵਜੋਂ ਕੰਮ ਕਰ ਰਹੇ ਹਨ।
ਆਸਟ੍ਰੇਲੀਆ ਵਸਦੇ ਪੰਜਾਬੀ ਭਾਈਚਾਰੇ ਵਿੱਚ ਉਨ੍ਹਾਂ ਨੂੰ ਇੱਕ ਕਬੱਡੀ ਕੋਚ ਅਤੇ ਬੌਡੀਬਿਲਡਰ ਵਜੋਂ ਵੀ ਜਾਣਿਆ ਜਾਂਦਾ ਹੈ।
ਪਰ ਇਸਦੇ ਨਾਲ਼ ਉਹਨਾਂ ਨੂੰ ਇੱਕ ਹੋਰ ਸ਼ੌਕ ਵੀ ਹੈ - ਅਤੇ ਉਹ ਹੈ ਪੁਰਾਣੇ ਪੰਜਾਬੀ ਗੀਤ ਸੰਭਾਲਣ ਦਾ ਅਤੇ ਉਨ੍ਹਾਂ ਨੂੰ ਦੂਜੇ ਲੋਕਾਂ ਤੱਕ ਪਹੁੰਚਦੇ ਕਰਨ ਦਾ।
ਲੰਘੇ ਕਰੀਬ 40-45 ਸਾਲਾਂ ਦੌਰਾਨ ਉਨ੍ਹਾਂ ਤਕਰੀਬਨ 150 ਦੇ ਕਰੀਬ ਪੁਰਾਣੇ ਤਵੇ ਅਤੇ 1500 ਦੇ ਕਰੀਬ ਕੈਸੇਟਾਂ ਜਾਂ ਰੀਲਾਂ ਇਕੱਠੀਆਂ ਕੀਤੀਆਂ ਹਨ।
ਇਸਤੋਂ ਇਲਾਵਾ ਜਲੰਧਰ ਦੂਰਦਰਸ਼ਨ ਉੱਤੇ ਆਓਂਦੇ ਰੰਗਾ-ਰੰਗ ਪ੍ਰੋਗਰਾਮ ਲਿਸ਼ਕਾਰਾ ਅਤੇ ਸੰਦਲੀ ਪੈੜ੍ਹਾਂ ਦੇ ਅਣਗਿਣਤ ਐਪੀਸੋਡ ਵੀ ਉਨ੍ਹਾਂ ਰਿਕਾਰਡਿੰਗ ਵਜੋਂ ਸਾਂਭੇ ਹੋਏ ਹਨ।
ਇਹਨਾਂ ਵਿਚਲੇ ਗੀਤ ਉਹ ਅਕਸਰ ਆਪਣੇ ਯੂਟਿਊਬ ਚੈਨਲ ਉੱਤੇ ਲੋਡ ਕਰਦੇ ਹਨ।
ਸ਼੍ਰੀ ਪਾਂਗਲੀ ਨੇ ਦੱਸਿਆ ਕਿ ਉਨ੍ਹਾਂ ਨੂੰ ਸੰਗੀਤ ਪ੍ਰਤੀ ਸ਼ੌਕ ਆਪਣੇ ਪਿਤਾ ਜੀ ਕੋਲੋਂ ਪਿਆ ਜੋ ਧਾਰਮਿਕ ਗੀਤ ਅਤੇ ਢਾਡੀ ਵਾਰਾਂ ਪ੍ਰਤੀ ਖਾਸ ਲਗਾਅ ਰੱਖਦੇ ਸਨ।
"ਮੈਂ ਹੁਣ ਤਕ ਜੋ ਰਿਕਾਰਡ (ਤਵੇ) ਇਕੱਠੇ ਕੀਤੇ ਹਨ ਉਨ੍ਹਾਂ ਵਿੱਚ ਸਾਡੀ ਪੁਰਾਣੀ ਪੰਜਾਬੀ ਲੋਕ ਗਾਇਕੀ ਦੇ ਚੇਹਰਾ-ਮੋਹਰਾ ਦਾ ਪਤਾ ਲੱਗਦਾ ਹੈ ਜਦਕਿ ਇਸਤੋਂ ਇਲਾਵਾ ਰੀਲਾਂ ਜ਼ਰੀਏ ਮੈਂ ਅੱਜ ਦੇ ਕਈ ਮਕਬੂਲ ਗਾਇਕਾਂ ਦੇ ਗੀਤ ਸਾਂਭੇ ਹੋਏ ਹਨ," ਉਨ੍ਹਾਂ ਕਿਹਾ।
ਜ਼ਿਕਰਯੋਗ ਹੈ ਕਿ ਉਨ੍ਹਾਂ ਦੀ ਸੰਗੀਤ ਲਾਇਬ੍ਰੇਰੀ ਵਿੱਚ ਮਕਬੂਲ ਲੋਕ ਗਾਇਕ ਕੁਲਦੀਪ ਮਾਣਕ, ਗੁਰਦਾਸ ਮਾਨ, ਮੁਹੰਮਦ ਸਦੀਕ, ਰਣਜੀਤ ਕੌਰ, ਦੀਦਾਰ ਸੰਧੂ, ਹਜ਼ਾਰਾ ਸਿੰਘ, ਸਨੇਹ ਲਤਾ, ਆਸਾ ਸਿੰਘ ਮਸਤਾਨਾ, ਕਰਮਜੀਤ ਧੂਰੀ, ਹਰਚਰਨ ਗਰੇਵਾਲ, ਕਰਤਾਰ ਰਮਲਾ, ਅਮਰ ਸਿੰਘ ਚਮਕੀਲਾ, ਲਾਲ ਚੰਦ ਯਮਲਾ ਜੱਟ, ਕੇ.ਦੀਪ ਜਗਮੋਹਨ, ਸੁਰਿੰਦਰ ਛਿੰਦਾ ਸਮੇਤ ਹੋਰਨਾਂ ਸੈਂਕੜੇ ਗਾਇਕਾਂ ਦੇ ਗੀਤ ਵੀ ਸ਼ਾਮਲ ਹਨ।
ਸ਼੍ਰੀ ਪਾਂਗਲੀ ਦਾ ਕਹਿਣਾ ਹੈ ਕਿ ਉਨ੍ਹਾਂ ਦੇ ਇਸ ਸ਼ੌਕ ਨੂੰ ਪੂਰਾ ਕਰਨ ਵਿੱਚ ਉਨ੍ਹਾਂ ਦੇ ਪੰਜਾਬ ਰਹਿੰਦੇ ਮਿੱਤਰਾਂ ਦਾ ਕਾਫੀ ਯੋਗਦਾਨ ਹੈ ਜੋ ਉਨ੍ਹਾਂ ਨੂੰ ਪੁਰਾਣੇ ਗੀਤ, ਕੈਸੇਟਾਂ ਜਾਂ ਤਵੇ ਖਰੀਦਣ ਵਿੱਚ ਮਦਦ ਕਰਦੇ ਹਨ।
ਮੈਲਬੌਰਨ ਰਹਿੰਦਿਆਂ ਛੁੱਟੀ ਵਾਲ਼ੇ ਦਿਨ ਉਨ੍ਹਾਂ ਘਰ ਮਹਿਮਾਨਾਂ ਦਾ ਵੀ ਤਾਂਤਾ ਲੱਗਿਆ ਰਹਿੰਦਾ ਹੈ ਜੋ ਉਨ੍ਹਾਂ ਦੇ ਸਾਂਭੇ ਤਵਿਆਂ ਅਤੇ ਰੀਲਾਂ ਦੇ ਖ਼ਜ਼ਾਨੇ ਨੂੰ ਵੇਖਣ ਤੇ ਪੁਰਾਣੇ ਗੀਤ ਸੁਣਨ ਲਈ ਅਕਸਰ ਆਓਂਦੇ-ਜਾਂਦੇ ਰਹਿੰਦੇ ਹਨ।
"ਇਸ ਸਿਲਸਿਲੇ 'ਚ ਸਾਡਾ ਪਰਿਵਾਰ ਆਪਣੇ-ਆਪ ਨੂੰ ਖੁਸ਼ਕਿਸਮਤ ਸਮਝਦਾ ਹੈ ਕਿ ਅਸੀਂ ਲੋਕਾਂ ਦੀ ਤਣਾਅ ਭਰੀ ਜ਼ਿੰਦਗੀ ਵਿੱਚ ਗੀਤ-ਸੰਗੀਤ ਜ਼ਰੀਏ ਕੁਝ ਰੰਗ ਭਰ ਸਕੀਏ, ਕਿਸੇ ਨੂੰ ਖੁਸ਼ ਕਰ ਸਕੀਏ," ਉਨਾਂ ਕਿਹਾ।
ਹੋਰ ਵੇਰਵੇ ਲਈ ਇਹ ਇੰਟਰਵਿਊ ਸੁਣੋ…..
