ਆਸਟ੍ਰੇਲੀਅਨ ਰੀਕੰਸੀਲੀਏਸ਼ਨ ਬੈਰੋਮੀਟਰ ਦੀ ਰਿਪੋਰਟ ਅਨੁਸਾਰ 50 ਫੀਸਦੀ ਤੋਂ ਵੱਧ ਆਦਿਵਾਸੀ ਅਤੇ ਟੋਰੇਸ ਸਟ੍ਰੇਟ ਆਈਲੈਂਡਰ ਲੋਕ ਮੰਨਦੇ ਹਨ ਕਿ ਆਸਟ੍ਰੇਲੀਆ ਇੱਕ ਨਸਲਵਾਦੀ ਦੇਸ਼ ਹੈ। ਰਿਪੋਰਟਾਂ ਜਿਥੇ ਨਸਲਵਾਦ ਦੀਆਂ ਵਧਦੀਆਂ ਘਟਨਾਵਾਂ ਬਾਰੇ ਚਿੰਤਾ ਪ੍ਰਗਟਾਉਂਦੀਆਂ ਹਨ ਓਥੇ ਇਸ ਮਾਮਲੇ ਨੂੰ ਲੈਕੇ ਸੰਸਦ ਵਿੱਚ ਆਵਾਜ਼ ਚੁੱਕੇ ਜਾਣ ਅਤੇ ਇੱਕ ਸੰਧੀ ਵੱਲ ਵਧ ਰਹੇ ਸਮਰਥਨ ਨੂੰ ਵੀ ਦਰਸਾਉਂਦੀਆਂ ਹਨ।
ਆਦਿਵਾਸੀ ਅਤੇ ਦੂਜੇ ਲੋਕਾਂ ਵਿਚਕਾਰ ਸਬੰਧਾਂ ਦੀ ਜਾਂਚ ਕਰਨ ਵਾਲੇ ਇਸ ਸਰਵੇਖਣ ਨੇ ਇਹ ਵੀ ਪਾਇਆ ਕਿ ਚਾਰ ਸਾਲ ਪਹਿਲਾਂ ਦੇ ਮੁਕਾਬਲੇ ਫਸਟ ਨੇਸ਼ਨਜ਼ ਲੋਕਾਂ ਪ੍ਰਤੀ ਨਸਲਵਾਦ ਦੀਆਂ ਘਟਨਾਵਾਂ ਵਿੱਚ ਵਾਧਾ ਹੋਇਆ ਹੈ।
ਇਸ ਤੋਂ ਇਲਾਵਾ ਇੰਨ੍ਹਾਂ ਸਰਵੇਖਣਾਂ ਵਿੱਚ 'ਵੌਇਸ ਟੂ ਪਾਰਲੀਮੈਂਟ' ਅਤੇ ਸੰਧੀਆਂ ਲਈ ਸਮਰਥਨ ਦੇ ਪੱਧਰਾਂ ਦੀ ਵੀ ਪਛਾਣ ਕੀਤੀ ਗਈ ਹੈ।
ਰੀਕੰਸੀਲੀਏਸ਼ਨ ਆਸਟ੍ਰੇਲੀਆ ਦੀ ਸੀ.ਈ.ਓ ਕੈਰਨ ਮੁੰਡਾਈਨ ਦਾ ਮੰਨਣਾ ਹੈ ਕਿ ਇਸ ਰਿਪੋਰਟ ਵਿੱਚ ਜ਼ਿਆਦਾਤਰ ਹਿੱਸੇ ਸਫਲਤਾ ਵੱਲ ਇਸ਼ਾਰਾ ਕਰਦੇ ਹਨ।
ਰਿਪੋਰਟ ਵਿੱਚ ਛੇ ਮਹੀਨਿਆਂ ਵਿੱਚ ਨਸਲਵਾਦ ਦੀਆਂ 267 ਪ੍ਰਮਾਣਿਤ ਰਿਪੋਰਟਾਂ ਦੀ ਜਾਂਚ ਕੀਤੀ ਗਈ ਹੈ।
ਇਸਨੇ ਪਾਇਆ ਕਿ ਆਦਿਵਾਸੀ ਅਤੇ ਟੋਰੇਸ ਸਟ੍ਰੇਟ ਆਈਲੈਂਡਰ ਲੋਕ ਰੋਜ਼ਾਨਾ ਅਧਾਰ 'ਤੇ ਹਰ ਰੂਪ ਅਤੇ ਸਾਰੇ ਪੱਧਰਾਂ ਦੇ ਨਸਲਵਾਦ ਦਾ ਅਨੁਭਵ ਕਰਦੇ ਹਨ।
86 ਪ੍ਰਤੀਸ਼ਤ ਆਦਿਵਾਸੀ ਅਤੇ ਟੋਰੇਸ ਸਟ੍ਰੇਟ ਆਈਲੈਂਡਰ ਲੋਕ ਇੱਕ ਪ੍ਰਤੀਨਿਧੀ ਸਵਦੇਸ਼ੀ ਸੰਸਥਾ ਦੀ ਸਥਾਪਨਾ ਕਰਨਾ ਚਾਹੁੰਦੇ ਸਨ, ਅਤੇ 87 ਪ੍ਰਤੀਸ਼ਤ ਚਾਹੁੰਦੇ ਸਨ ਕਿ ਇਸਨੂੰ ਸਰਕਾਰਾਂ ਨੂੰ ਬਦਲਣ ਤੋਂ ਬਚਾਉਣ ਲਈ ਸੰਵਿਧਾਨ ਵਿੱਚ ਸਥਾਪਿਤ ਕੀਤਾ ਜਾਵੇ।
ਚਾਰ ਸਾਲਾਂ ਵਿੱਚ ਸੰਧੀ ਲਈ ਸਮਰਥਨ ਵਿੱਚ 25 ਪ੍ਰਤੀਸ਼ਤ ਦਾ ਭਾਰੀ ਵਾਧਾ ਹੋਇਆ ਹੈ।
85 ਪ੍ਰਤੀਸ਼ਤ ਤੋਂ ਵੱਧ ਆਦਿਵਾਸੀ ਅਤੇ ਟੋਰੇਸ ਸਟ੍ਰੇਟ ਆਈਲੈਂਡਰ ਲੋਕ ਇੱਕ ਸੰਧੀ ਨੂੰ ਵਿਕਸਤ ਕਰਨ ਦਾ ਸਮਰਥਨ ਕਰਦੇ ਹਨ, ਜਿਸ ਵਿੱਚ 72 ਪ੍ਰਤੀਸ਼ਤ ਆਮ ਆਬਾਦੀ ਸਹਿਮਤ ਹੈ।
ਦੂਜੇ ਪਾਸੇ ਫੈਡਰਲ ਸਰਕਾਰ, ਰੀਓ ਟਿੰਟੋ ਦੁਆਰਾ ਪੱਛਮੀ ਆਸਟ੍ਰੇਲੀਆ ਵਿੱਚ ਜੁਉਕਨ ਗੋਰਜ ਵਿਖੇ ਇੱਕ ਪਵਿੱਤਰ ਚੱਟਾਨ ਦੇ ਆਸਰੇ ਨੂੰ ਤਬਾਹ ਕਰਨ ਤੋਂ ਬਾਅਦ ਸਵਦੇਸ਼ੀ ਵਿਰਾਸਤੀ ਸਥਾਨਾਂ ਲਈ ਨਵੇਂ ਸੁਰੱਖਿਆ ਕਾਨੂੰਨ ਬਣਾਉਣ ਲਈ ਤਿਆਰ ਹੈ।
ਫੈਡਰਲ ਵਾਤਾਵਰਨ ਮੰਤਰੀ ਤਾਨਿਆ ਪਲੀਬਰਸੇਕ ਦਾ ਕਹਿਣਾ ਹੈ ਕਿ ਕਾਨੂੰਨਾਂ ਨੂੰ ਸੋਧਿਆ ਜਾਵੇਗਾ।
ਪਰ ਰਵਾਇਤੀ ਮਾਲਕਾਂ ਦਾ ਦਾਅਵਾ ਹੈ ਕਿ ਫੈਡਰਲ ਸਰਕਾਰ ਦੇ ਜਵਾਬ ਵਿੱਚ ਉਨ੍ਹਾਂ ਦਾ ਨਿਰਾਦਰ ਕੀਤਾ ਗਿਆ ਸੀ ਅਤੇ ਉਨ੍ਹਾਂ ਨੂੰ ਪਾਸੇ ਕਰ ਦਿੱਤਾ ਗਿਆ ਸੀ।
ਕੌਂਸਿਲ ਫਾਰ ਐਬੋਰਿਜਿਨਲ ਰੀਕੰਸੀਲੀਏਸ਼ਨ ਚੇਅਰ, ਸੈਨੇਟਰ ਪੈਟ ਡੌਡਸਨ ਦਾ ਕਹਿਣਾ ਹੈ ਕਿ ਫਸਟ ਨੇਸ਼ਨਜ਼ ਦੇ ਲੋਕ ਉਨ੍ਹਾਂ ਦੀ ਵਿਰਾਸਤ ਨੂੰ ਪ੍ਰਭਾਵਿਤ ਕਰਨ ਵਾਲੀ ਕਿਸੇ ਵੀ ਚੀਜ਼ ਬਾਰੇ ਸਲਾਹ ਲੈਣ ਦੇ ਹੱਕਦਾਰ ਹਨ।
ਹੋਰ ਜਾਣਕਾਰੀ ਲਈ ਉਪਰ ਦਿੱਤੀ ਆਡੀਓ ਇੰਟਰਵਿਊ ਸੁਣੋ….
