ਸਾਹਿਤਕ ਸੱਥ ਮੈਲਬੌਰਨ ਦੇ ਨੁਮਾਇੰਦਿਆਂ ਸਨੀ ਬੇਰੀ ਤੇ ਬਿੱਕਰ ਬਾਈ ਨੇ ਐਸ ਬੀ ਐਸ ਪੰਜਾਬੀ ਨੂੰ ਦੱਸਿਆ ਕਿ ਪਿਛਲੇ ਸਾਲ ਕਰੋਨਾ ਕਾਲ ਵਿਚ ਸ਼ੁਰੂ ਕੀਤੇ ਇਸ ਸਮਾਗਮ ਨੂੰ ਉਹ ਆਸਟ੍ਰੇਲੀਆ ਦਾ ਇੱਕ ਮਿਆਰੀ ਸਾਹਿਤਕ ਉਤਸਵ ਬਣਾਉਣਾ ਚਾਹੁੰਦੇ ਹਨ ਤੇ ਇਹ ਕੋਸ਼ਿਸ਼ ਉਸੇ ਕੜੀ ਦਾ ਇੱਕ ਹਿੱਸਾ ਹੈ।
"ਇਸ ਅਦਬੀ ਬੈਠਕ ਨੂੰ ਇਸ ਵਾਰ ਅਸੀਂ ਹੋਰ ਵੀ ਮੁਹੱਬਤ ਅਤੇ ਮਿਹਨਤ ਨਾਲ ਸਜਾ ਰਹੇ ਹਾਂ। ਇਸ ਵਿੱਚ ਸ਼ਾਇਰ ਜਸਵੰਤ ਜ਼ਫ਼ਰ ਜੀ ਦੀ ਹਾਜ਼ਰੀ ਤਾਰਿਆਂ ਵਿਚ ਚੰਨ ਵਰਗੀ ਹੋਵੇਗੀ," ਉਨ੍ਹਾਂ ਦੱਸਿਆ।
“ਇਸ ਸਮਾਗਮ ਤਹਿਤ ਸਾਡਾ ਮੁਖ ਉਦੇਸ਼ ਆਸਟ੍ਰੇਲੀਆ ਵਸਦੇ ਨਵੀਂ ਪੀੜੀ ਦੇ ਬੱਚਿਆਂ ਨੂੰ ਪੰਜਾਬ, ਪੰਜਾਬੀ ਅਤੇ ਪੰਜਾਬੀਅਤ ਨਾਲ਼ ਜੋੜਨਾ ਹੈ।“
ਸਮਾਗਮ ਦੌਰਾਨ 'ਗੌਰਵ ਪੰਜਾਬ ਦੇ' ਪੁਰਸਕਾਰ ਤਹਿਤ ਵੱਖ-ਵੱਖ ਖੇਤਰਾਂ ਵਿੱਚ ਕੰਮ ਕਰਨ ਵਾਲੀਆਂ ਕੁਝ ਸਖਸ਼ੀਅਤਾਂ ਦਾ ਸਨਮਾਨ ਵੀ ਕੀਤਾ ਜਾਵੇਗਾ ਜਿਸ ਵਿੱਚ ਥੀਏਟਰ ਅਦਾਕਾਰੀ ਲਈ ਮਹਿੰਗਾ ਸਿੰਘ ਸੰਗਰ, ਬਾਲ ਸਾਹਿਤ ਤੇ ਅਧਿਆਪਨ ਲਈ ਹਰਪ੍ਰੀਤ ਸੰਧੂ, ਮੀਡੀਆ ਸੇਵਾਵਾਂ ਲਈ ਰੌਬੀ ਬੈਨੀਪਾਲ ਤੇ ਕਲਾ-ਸੱਭਿਆਚਾਰ-ਭੰਗੜੇ ਦੇ ਖੇਤਰ ਵਿੱਚ ਸੇਵਾਵਾਂ ਦੇਣ ਵਾਲ਼ੇ ਗੁਰਦੀਪ ਸਿੱਧੂ ਸ਼ਾਮਿਲ ਹਨ।
'ਅਦਬੀ ਉਤਸਵ' ਦੌਰਾਨ ਉਘੇ ਭੰਗੜਾ ਕੋਚ ਸੁਖਜਿੰਦਰ ਲਾਡੀ ਦੁਆਰਾ ਲੋਕ ਸਾਜ਼ਾਂ ਦੀ ਪੇਸ਼ਕਾਰੀ ਅਤੇ ਪ੍ਰਦਰਸ਼ਨੀ ਉਸ ਦਿਨ ਸੁਰਾਂ ਬਿਖੇਰਦੀ ਹੋਈ ਆਪਣਾ ਰੰਗ ਦਿਖਾਵੇਗੀ।
ਪ੍ਰੀਤ ਖਿੰਡਾ ਦੁਆਰਾ ਸਥਾਪਿਤ ਵਿਰਾਸਤੀ ਸਕੂਲ ਜੀਲੌਂਗ ਦੇ ਬੱਚੇ ਆਪਣੇ ਨੰਨ੍ਹੇ ਹੱਥਾਂ ਨਾਲ ਬਣਾਈਆਂ ਤਸਵੀਰਾਂ ਨੂੰ ਪ੍ਰਦਰਸ਼ਿਤ ਕਰਨਗੇ ਜਦਕਿ ਪੰਜਾਬੀਅਤ ਨੂੰ ਸਮਰਪਿਤ ਜੱਸੀ ਧਾਲੀਵਾਲ ਕਿਤਾਬਾਂ ਦਾ ਸਟਾਲ ਲਗਾਵੇਗੀ।
ਪ੍ਰਬੰਧਕਾਂ ਨੇ ਇਸ ਅਦਬੀ ਸਮਾਗਮ ਵਿੱਚ ਸ਼ਮੂਲੀਅਤ ਲਈ ਸਭ ਨੂੰ ਖੁੱਲ੍ਹਾ ਸੱਦਾ ਦਿੱਤਾ ਹੈ।
ਮਿਤੀ: 19 ਮਾਰਚ 2023 ਦਿਨ ਐਤਵਾਰ - ਸਥਾਨ: ਕਲਾਈਡ ਪਬਲਿਕ ਹਾਲ, ਮੈਲਬੌਰਨ
ਇਸ ਇੰਟਰਵਿਊ ਦੌਰਾਨ ਬਿੱਕਰ ਬਾਈ ਨੇ ਆਪਣੀਆਂ ਕਿਤਾਬਾਂ 'ਬੋਲ ਪਏ ਅਲਫਾਜ਼' ਅਤੇ 'ਗੀਤ ਰਹਿਣਗੇ ਕੋਲ਼' ਵਿਚਲੀਆਂ ਚੋਣਵੀਆਂ ਕਵਿਤਾਵਾਂ ਵੀ ਸੁਣਾਈਆਂ।
ਹੋਰ ਜਾਣਕਾਰੀ ਲਈ ਇਹ ਆਡੀਓ ਲਿੰਕ ਕਲਿਕ ਕਰੋ:
