ਇੱਕ ਅੰਦਾਜ਼ੇ ਮੁਤਾਬਿਕ ਦੁਨੀਆ ਭਰ ਵਿੱਚ ਇਸ ਵੇਲ਼ੇ 537 ਮਿਲੀਅਨ ਲੋਕ (10 ਵਿੱਚੋਂ 1) ਸ਼ੂਗਰ ਦੀ ਬਿਮਾਰੀ ਤੋਂ ਪੀੜ੍ਹਤ ਹਨ। ਇਹਨਾਂ ਵਿੱਚੋਂ 90-95% ਇਸਦੀ ਟਾਈਪ-2 ਕਿਸਮ ਤੋਂ ਪ੍ਰਭਾਵਿਤ ਹਨ। ਟਾਈਪ-2 ਡਾਇਬਟੀਜ਼ ਸਰੀਰ ਵਿੱਚ ਜ਼ਿਆਦਾ ਗਲੂਕੋਜ਼ ਇਕੱਠਾ ਹੋਣ ਨਾਲ ਹੁੰਦੀ ਹੈ ਅਤੇ ਇਸਦਾ ਪਤਾ ਲੱਗਣ ਉੱਤੇ ਮਰੀਜ ਨੂੰ ਖਾਣ-ਪੀਣ ਵਿੱਚ ਬਦਲਾਅ ਕਰਨ ਅਤੇ ਕਸਰਤ ਕਰਨ ਦੀ ਸਲਾਹ ਦਿੱਤੀ ਜਾਂਦੀ ਹੈ। ਹੋਰ ਵੇਰਵੇ ਲਈ ਇਹ ਇੰਟਰਵਿਊ ਸੁਣੋ......
ਹਰਦਰਸ਼ਨ ਕੰਗ, ਕੈਨਬਰਾ ਦੇ ਇੱਕ ਹਸਪਤਾਲ ਵਿੱਚ ਇੱਕ ਡਾਇਬੀਟੀਜ਼ ਐਜੂਕੇਟਰ ਅਤੇ ਕਲੀਨਿਕਲ ਨਰਸ ਸਲਾਹਕਾਰ ਵਜੋਂ ਕੰਮ ਕਰ ਰਹੇ ਹਨ।
ਉਹ ਪਿਛਲੇ 15 ਸਾਲਾਂ ਤੋਂ ਇੱਕ ਡਾਇਬੀਟੀਜ਼ ਮਾਹਿਰ ਵਜੋਂ ਆਪਣੀਆਂ ਸੇਵਾਵਾਂ ਦੇ ਰਹੇ ਹਨ।
14 ਨਵੰਬਰ 2023 ਨੂੰ ਵਿਸ਼ਵ ਡਾਇਬੀਟੀਜ਼ ਦਿਵਸ ਦੇ ਮੌਕੇ ਉਨ੍ਹਾਂ ਐਸ ਬੀ ਐਸ ਪੰਜਾਬੀ ਨਾਲ਼ ਗੱਲ਼ ਕਰਦਿਆਂ ਡਾਇਬੀਟੀਜ਼ ਦੇ ਲੱਛਣਾਂ ਅਤੇ ਰੋਕਥਾਮ ਸਬੰਧੀ ਆਪਣੇ ਮਾਹਿਰਾਨਾ ਸੁਝਾਅ ਪੇਸ਼ ਕੀਤੇ।
ਉਨ੍ਹਾਂ ਦੱਸਿਆ ਕਿ ਅਗਰ ਇਸ ਵੱਲ ਧਿਆਨ ਨਾ ਦਿੱਤਾ ਜਾਵੇ ਤਾਂ ਡਾਇਬੀਟੀਜ਼ ਦਿਲ ਦੇ ਦੌਰੇ, ਸਟ੍ਰੋਕ, ਨਿਗਾਹ ਦੀ ਕਮਜ਼ੋਰੀ ਅਤੇ ਗੁਰਦੇ ਫੇਲ੍ਹ ਹੋਣ ਦਾ ਵੀ ਕਾਰਨ ਬਣ ਸਕਦੀ ਹੈ।
“ਟਾਈਪ-2 ਡਾਇਬਟੀਜ਼ ਨੂੰ ਕਾਬੂ ਵਿੱਚ ਕਰਨ ਲਈ ਅਸੀਂ ਅਕਸਰ ਲੋਕਾਂ ਨੂੰ ਸਿਹਤਮੰਦ ਖੁਰਾਕ, ਨਿਯਮਤ ਸਰੀਰਕ ਗਤੀਵਿਧੀ, ਸਰੀਰ ਦਾ ਭਾਰ ਕੰਟਰੋਲ ਵਿੱਚ ਰੱਖਣ ਅਤੇ ਤੰਬਾਕੂਨੋਸ਼ੀ ਦੀ ਵਰਤੋਂ ਤੋਂ ਬਚਣ ਦੀ ਸਲਾਹ ਦਿੰਦੇ ਹਾਂ,” ਉਨ੍ਹਾਂ ਕਿਹਾ।
"ਡਾਇਬੀਟੀਜ਼ ਦਾ ਇਲਾਜ ਕੀਤਾ ਜਾ ਸਕਦਾ ਹੈ ਜਾਂ ਇਸਦੇ ਮਾੜੇ ਅਸਰਾਂ ਤੋਂ ਦੇਰ ਤੱਕ ਬਚਿਆ ਜਾ ਸਕਦਾ ਹੈ - ਬਸ਼ਰਤੇ ਕਿ ਇਸਤੋਂ ਪੀੜ੍ਹਤ ਲੋਕ ਮਾਹਿਰਾਂ ਦੀ ਸਲਾਹ ਮੁਤਾਬਿਕ ਚੱਲਣ,” ਉਨ੍ਹਾਂ ਕਿਹਾ।
ਹੋਰ ਵੇਰਵੇ ਲਈ ਇਹ ਇੰਟਰਵਿਊ ਸੁਣੋ ਅਤੇ ਇਸ ਵੈਬਸਾਈਟ ਉੱਤੇ ਵੀ ਜਾਓ https://www.diabetesaustralia.com.au/
