Ua aumaia se lapataiga mai le sui o malo aufaatasi i Suria, Staffan de Mistura a le taofia le taua ma osofaiga o loo faia e Rusia ma vaegaau o loo lagolago i le faigamalo a Bashar al-Assad, e le'i maea le tausaga nei ua leai se fale e tu ma se tagata e ola i le itu i Sasae o le taulaga tele o Aleppo.
O eleele ia o loo umia e le vaegaau tetee, le Fateh al-Sham lea sa faaigoaina o le al-Nusra Front, ma o lo latou iai i eleele ia, o loo faavae ai le finauga a Rusia e tatau ona osofa'ia e ui ina toatele tagata sivili o loo nonofo ai.
O osofaiga mai le 'ea e Rusia ua faaleagaina ai le tele o falema'i, ua faitau selau tagata sivili ua maliliu ma le faitau afe ua manunu'a.
Ua faitau masina fo'i e le'i toe oo iai se fesoasoani mai malo aufaatasi.
Ua faia se folafolaga a Staffan de Mistura i le Fateh al-Sham o le a ia auai faatasi ma i latou e tuua eleele ia ina ia taofia ai le osofaiga ma amata ona sao atu fesoasoani a malo aufaatasi i tagata sivili o loo nonofo ai.
DE MISTURA
"And if you did decide to leave, in dignity, and with your weapons, to Idlib or anywhere you wanted to go, I personally am ready, physically, to accompany you."
Na saunoa di Mistura a faaauau le osofaiga i le tulaga o iai nei, e oo atu i le Kerisimasi ua leai se fale e tu i Sasae o Aleppo.
DE MISTURA
"The bottom line is, in maximum, two months, two-and-a-half months, the city of eastern Aleppo, at this rate, may be totally destroyed."
Na ia saunoa foi o le a manatua i le tala faasolopito le faaogaina e Rusia ma Suria o le iai o le vaegaau tetee a Fateh al-Sham ma mafuaaga o le osofaiga ma le tulaga pagatia ua faitau masina nei o feagai ma tagata sivili.
O le itu i Sasae o Aleppo o loo nonofo ai tagata e toa 275,000 e aofia ai le ova i le 100,000 tamaiti.
