Ua faamaonia le pesia o se alii i le Koronavairusi ina ua taunu'u i Melbourne, ma mae'a ai ona tausi puipuia (quarantine) i se faletalimalo i Perth. O ia ma lona to'alua ma lana fanau na faimalaga mai se atunuu i fafo ma quarantine ai i Perth mo le 14 aso ae le'i faa-auau ona malaga i Vitoria e aumau ai. O loo sa'ili e le matagaluega o le soifua maloloina tagata uma na malaga i le QANTAS QF 778 i le Aso Lulu na te'a nei, ina ia faia ni a latou tests ma quarantine ae o faatali le faai'uga. O le pesia o le alii lenei ua faamuta ai le 55 aso soso'o e le'i pesia seisi i se comunity transmission i Vitoria.
I se fonotaga a ta'ita'i o malo tetele i le mataupu i le tau, na folafola e pe lepresitene o Amerika, Joe Biden, le faaitiitia i le 'afa le aofa'i o le Kasa 'o'ona e pua'ina i le siosiomaga (gas emissions) e Amerika e le'i oo i le tausaga 2030. E le'i faailoa maia e Joe Biden pe faapefea ona 'ausia lea faamoemoe. Na faaalia fo'i e le peresitene o le Iuni o Malo Europa, Charles Michel, le fesoasoani e 600 billion Euro i polokalame suia mai ai mai le faaogaina o le Koale i auala mama o le gaosiga o le malosi'aga.
Ua 'ova i le masina talu ona amata le polokalame a le malo tele e lolaina ai tui puipui (vaccines) i Ausetalia nei. Ae i le taimi nei, o loo i lalo ifo o le 10% le aofa'i o tagata ua faia o latou tui puipui. O se tasi o vaega tele o le polokalame e amata lolaina i le masina fou pe atuiina le AztraZeneca vaccine i tagatanu'u Ausetalia i luga atu o le 50 tausaga le matutua.
I taaloga..... O le a talimalo le taulaga o Townsville i taaloga o le Super Rugby ma le NRL. O le a fetaui ai le Queensland Reds ma se 'au lakapi Iuni mai Aoteaora, ae o le North Queensland Cowboys ma se 'au lakapi liki mai Niu Sila.
