Na maua le tino maliu o lenei alii i le pitonu'u o Cobbitty i Saute i Sisifo o Sini, na ta'ua i se ripoti a leoleo o lana taavale na tafea i lologa ma magoto ai i se 'autu.
O loo iai popolega tele i le tetele o lologa i vaitafe o le Hawkesbury-Nepean River ina ua toe pa ona 'auvai i le mamafa o timuga i le 24 itula ua mavae.
E 'ova i le 2,000 tagata ua faatonuina e tu'ua o latou fale ma aiga ona o le tulaga lamatia mai lologa ma tafega.
++++++++++++++++
Ua tofia se palemia setete o Tasmania e sui tulaga ia Peter Gutwein lea na faamavae ma le tofi ma 'upufai o le palemene setete o Tasmania i le vaiaso nei.
E le'i faia se palota a le faafaletui ona e leai seisi na faatu e tauva, ma na tofia ai le sa avea ma sui ta'ita'i o le Liberal Party ma sui premier, Jeremy Rockliff e avea ma palemia setete fou o Tasmania.
++++++++++++++++
O le a tula'i i le faamasinoga e tali i moliaga o le fasioti tagata se tasi na ta'alo i tausaga u mavae faapolofes ai le lakapi liki, le alii o Chris Dawson.
O Chris Dawson na alue fo'i o se faia'oga i tausaga ua mavae.
O loo molia o ia i le fasiotia o lona to'alua o Lynette i le 1982, ma ua lua nei tausaga o taumafai e finau e faata'atia 'ese tumau (permanently stayed) ona moliaga, ae na te'ena e le faamasinoga sili ma le faamasinoga o faai'uga toe iloilo i New South Wales.
Ua faatonuina e le faamasinoga le tula'i o Chris Dawson e tali i ona moliaga i le Aso 9 o Me o le tausaga nei
+++++++++++++++
Ua faatuina e le faigamalo i Amerika le tamaita'i o Caroline Kennedy e avea ma ona sui ambassaor i Asuetalia.
Na faaalia e le peresitene o Amerika, Joe Biden, o se tofiga taua lenei mo atunu'u e lua ona o le malosi o le lagolagoina e le malo Amerika ma le sui o lona malo ua tofia nei mo Ausetalia i le siitia pea o le tulaga o Saina i le Pasefika, e pei ona molimauina i se feagaiga i le va o Saina ma le atu Solomona.
O Caroline Kennedy o se afafine o se tasi o peresitene aupito lauiloa i le tala faasolopito o Amerika, J.F.Kennedy, ma na galue fo'i o le sui ambassador o Amerika i Iapani i le taimi o le faigamalo a Barack Obama.
END +++++++++++
