Faaitiitia le Kasa 'o'ona e pua'ina i le si'osi'omaga.

Ona o puipuiga mai le pepesi o le COVID-19, o le tapunia o le tele o fale faigaluega e gaosi ai 'oloa ma faaogaina ai le koale mo le malosi'aga, ua molimauina ai le pa'u maualalo o le tau o le koale i le lalolagi.

Avustralya'da elektrik için termik santrallerin yoğun olarak kullanılması eleştiri konusu. Source: AAP

Peita'i o se faamanuiaga mo le paneta le faaitiitia ai o le kasa 'o'ona e pua'ina i le si'osi'omaga ma ua iloa i le tele o atunu'u le suiga i le mama o le 'ea.

Na faaalia e le International Energy Agency o le alu i lalo o le faaogaina o le koale ua alu ai i luga ma le tulaga mama o le si'osi'omaga.

O loo faatusa i le 6 pasene e faaitiitia ai le mana'oga o kamupani gaosi 'oloa ma le malosi'aga i le koale i le tausaga lenei, ma e ono pa'u ai i le 8 pasene le aofa'i o le kasa 'o'ona (CO2) e pua'ina i le siosiomaga i le tausaga nei. 

E foliga mai e le tele, ae na faaalia e le IEA, e faatusa lea i le 'ova i le 2,400 miliona tane pe faaonoina le aofa'i aupito maualuga o le 400 miliona tane lea na molimauina i le GFC - le global financial crisis i le 2009.

China currently produces around 30 percent of man-made carbon dioxide. Source: AAP

"O nisi atunu'u e ono faatuai ona toe tatala puipuiga ona o le popolega i le toe iai o se galu e ati faalua, seisi pesiga o le coronavirus ma o le a faaauau ona tapunia galuega e faaogaina ai le koale" na ta'ua e le faatonu o le IEA Fatih Birol i le Reuters.

Ua tele pisinisi i le lalolagi ua le toe faagaioia ona o puipuiga o se faama'i tele mai le coronavirus, ma ua lapata'ia ai se recession e ono tula'i mai i se taimi e le o toe mamao. 

"A silasila i le toatele o tagata i le lalolagi ua maliliu ma le tulaga ua iai le atina'e o tamaoa'iga o atunu'u o le lalolagi, o le pa'u i le aofa'i o le kasa e pua'ina i le si'osi'omaga, o se avanoa lenei e amata ai ona lagolagoina polokalame e gaosia ai le malosi'aga i auala mama." na saunoa ai Fatih Birol. 

Le lava nofoaga e teu ai le suau'u

O le maliega a kamupani suau'u i le masina nei e faaitiitia le pamuina o le suau'u ona o le pa'u maualalo o mana'oga o kamupani ma atunu'u o le lalolagi o se faiga e le manuia ona o le utiuti o nofoaga o totoe e teu ai le suau'u. 

Talu ona amata pepesi le coronavirus ua 5 pasene ua pa'u ai le alumia o le suau'u, ae o loo iai masaloga e ono pa'u atili i le 9 pasene ae le'i mae'a le tausaga nei. 

E faatusa lea i le 9.3 miliona paelo i le aso o le a pa'u ai le alumia o le suau'u i le 2020. 

"O la'u fautuaga ina ia toe tipi le tau," na saunoa ai Fatih Birol.