Ou te nofo i le taulaga o Dhaka, le laumua o Bangaldesh, ma ua 6 nei tausaga o la'u galuega su'isu'i i le gaosiga o 'ofu ma lavalava.
Ou te fiafia lava i la'u galuega, e ui e le tumau ma e iai taimi e te'i ai lava ua vaea i matou e aunoa ma se mafua'aga e ta'u maia.
A tapuni galuega pe ua vaea pe faate'a a'u, ona ou savali lea i isi taulaga ma 'a'ai e su'e seisi a'u galuega su'isu'i.
O 'ofu uma ma lavalava matou te gaosia i fale su'isu'i i Bangladesh, e faatau i atunu'u i fafo - 'ofu o tamaiti, 'ofu ta'alo, 'ofu mafanafana, so'o se itu'aiga 'ofu.
I le taimi o galuega e matua faasa ona matou talanoa i isi tagata faigaluega, pe fesiligia se faatonuga. E iai leoleo i taimi uma e va'ava'aia a matou galuega.
Ae talu ona amata le faama'i lea ua a'afia ai le lalolagi, na vaea ai a'u ma la'u galuega ma ua le toe maua sa'u galuega su'isu'i.
O a'u ua 45 tausaga lo'u matua, ma o le to'atele o tina e pei o a'u ma nisi e matutua atu, na faatonuina e tu'ua a matou galuega ma a'ua matou te toe o atu. Na o le tagi ma loimata maligi ae leai se mea matou te mafaia ona fai.
Ona o lo'u matua lea ua iai, e le toe mana'omia a'u i galuega su'isu'i - e tele ina filifili muamua e Kamupani gaosi lavalava teine talavou.
Talu mai ona vaea a'u ma la'u galuega ma pepesi le faaa'i KOVITI-19, ua matua faigata le tausiga o lo'u aiga - leai se mea'ai, se suau'u e kuka ai se mea'ai, le totogia le rent, le totogia pili o le a'oga a si a'u tama. E iai lo'u naunauga ina ia a'oga ma poto si a'u tama, ae ua ou iloa le faigata.
Pau le isi galuega lea ua ou faia o le talitane - feusua'iga ma tane e totogi - e maua ai se tupe mo le tausiga o lo'u aiga.
E le o iloa e lo'u aiga la'u galuega ona ou te musu e ta'u iai, ina ne'i le toe alofa seisi ia te a'u.
O tamaloloa e totogia la'u galuega e i le va o le 200 Taka ($3 Ausetalia) ma le 500 Taka ($7 Ausetalia) e maua mai ai. O nisi e alolofa ma fa'aaloalo, ae o nisi e saua ma so'ona fai amio le taupulea ia te a'u.
Ou te lagona i taimi uma ua ou faatau lo'u tino mo tupe.
O nisi o tamaloloa e mumusu e faaoga le pa'u (condom), ma ou te iloa le tulaga le saogalemu ma lamatia ai o lo'u ola maloloina. E ui ou te taumafai e fai la'u ufi foliga (mask) ma tausisi lo'u tu-mama, ae o nisi o tane e le amana'ia ma faia amioa faamalosi ia te a'u.
E iai fo'i ma lo'u popolega, a ou ma'i o le a le mafai ona totogi le pili o se falema'i e togafitia a'u.
Talu mai ona pepesi le KOVITI-19, o le toatele o a'u uo ma tama'ita'i na matou faigaluega faatasi i le galuega su'isu'i, ua galulue uma nei i galuega talitane - faatau o latou tino mo tupe mai le itupa o tane.
Ma'imau pe ana iloa e Kamupani i fafo o loo faatauina lavalava ma 'ofu mai Bangladesh, atoa ai ma tagata i atunuu mau'oloa e faatauina nei lavalava, le tulaga mativa ma mafatia o loo iai tagata e pei o a'u na faigaluega i le galuega su'isu'i i se tulaga pologa ma faamalosi.
O le talanoaga lenei na pue'ina ma tusia ma faaliliuina ma e te mauaina le ata atoa i le Dateline - COVID19: Fashion's Great Unravelling.
To learn more about the impacts of the pandemic on the fashion industry and its supply chain, watch Dateline’s full documentary, COVID19: Fashion’s Great Unravelling, here.
