O le faia o faamalositino faifaipea ma le tausisi i mea'ai lelei ma talafeagai, o nisi ia o vaega taua mo le soifua maloloina e tatau ona faia i aso uma, e tusa ai ma se faamatalaga a Professor Anne Tiedeman - o se tama'ita'i e lava lona tomai i mata'upu o le soifua maloloina ma faamalosi tino.
E aofia ai fo'i le tipi i lalo o le aofa'i o le 'ava malosi e inuina, ma le tu'u motu o le ulaula tapa'a.
1. Faamalosi tino.
Na faaalia e Prof Tiedeman, ua tele molimau mai su'esu'ega i le aoga o le faamalosi tino i le soifua maloloina o le tino ma le mafaufau, ma taofia ai fo'i le tupu mai o faama'i i le tauafiafi o le soifuaga.
O mea e faia i lau gaioi i le aso lenei poo lenei vaiaso, e mafai ona molimauina le aoga i le lumana'i.
I le tulaga o le aofa'i o le faamalosi tino e tatau ona faia e se tagata, na faasino Prof Tiedeman i le ta'iala mai malo 'aufaatasi, le WHO, World Health Organization’s guidelines, o loo fautuaina ai le aofa'i ma mea e faia e fuafua i le matua o se tagata ma pe iai sona gasegase poo ni mana'oga tumau.
“O le fe'au taua i le faamalosi tino, e lelei ma aoga mo tagata uma, poo le a lou matua poo le itu'aiga mana'oga faapitoa."
“Tusa pe le mae'a atoa ona e faia faamalosi tino o loo fautuaina mai i le ta'iala, ua matou iloa i su'esu'ega faatuatuaina, soo se aofa'i o le faamalosi tino e aoga mo lou soifua maloloina."
Na ia ta'ua fo'i e tele isi auala o le faia o faamalosi tino, e 'ese mai i ta'aloga masani poo faalapotopotoga faamalosi tino.
“E pei o le faia o se savaliga i le auala poo le paka, faia o fe'au i le fale, se galuega i le togala'au, o na mea uma e tulei ai le gaioi ma aoga i lou soifua maloloina."
2. Paleni au mea'ai
Na saunoa Prof Tiedeman e taua tele ona faapaleni mea taumafa, e faaitiitia ai le avanoa o lou maua i ma'i matuia atoa ai le tino puta.
O mea'ai lelei e aoga mo lou malosi, faamalosi ai ponaivi ma lau faalogona.
“O nei mea uma e aoga, paleni au mea taumafa, 'aua le tele 'a'ano manu fa'aasu, 'aua le tele le suka (o se faafitauli i le atunuu i le taimi nei).
O le Ta'iala mo Mea'ai i Ausetalia, le Australia Dietary Guidelines e maua atu ai fautuaga i itu'aiga taumafa, aofa'i tala feagai ma le fuaina o itu'aiga taumafa mo aso ta'itasi.
E una'ia ai tagata i le atunu'u i itu'aiga taumafa e 5 e aoga mo le tino, ae faatapula'a mea'ai lololo, tele ai le masima, suka ma le 'ava malosi.
3. Faatapula'a le aofa'i o le 'ava malosi ma tu'u motu le tapa'a.
“Ua matou iloa o vaega nei e sili ona a'afia ai le soifua maloloina o tagata," se faamatalaga a Prof Tiedeman i le taua ona faatapula'a le 'ava malosi ma tu'u le ulaula tapa'a.
O le 'ava malosi e mafua ai le maliliu o tagata e to'a 3 miliona i le lalolagi i tausaga uma, atoa ai ma le a'afia o le faitau miliona o nisi i gasegase matuia, e tusa ai ma faamaumauga a malo 'aufaatasi le World Health Organization.
I faamaumauga a le Australian Institute of Health and Welfare (AIHW) e to'a 1,452 tagata na maliliu i Ausetalia ona o mafua'aga e feso'ota'i sa'o ma le 'ava malosi i le 2020, o le to'atele (73%) o le itupa o ali'i.
O le Ta'iala, le Australian Alcohol Guidelines, o le 2020, o loo fofola atu ai fautuaga i auala e faaitiitia ai le aofa'i o le 'ava malosi e inuina ma tulaga lamatia o le soifua maloloina mai le 'ava malosi.
E le gata i lea, e iai fautuaga mai le Cancer Council 12 tips to break alcohol habits, e aofia ai aso faatulagaina e le inuina ai se 'ava malosi ma le tali o lou galala i le suavai.
E faaitiitia ai le 'umi o le ola o se tagata ma lona ola fiafia, ae na ona si'itia ai le tulaga lamatia o lona a'afia i le tele o faama'i ma vave maliu ai.
4. 'Auai i mafutaga ma isi tagata
Na faaalia e Prof Tiedeman o le isi faafitauli o le nofo to'atasi ma lagona o mafutaga motusia, e ui i nisi o taimi o loo felata'i ma nisi tagata. Na ia faaigoaina o le leai o se so'otaga, “lack of connection”.
“O le lagona e iai se mafutaga mafana ma isi tagata o loo nonofo ma felata'i, poo le iai o se so'otaga ma isi i le nu'u ma le pitonu'u o loo aumau ai."
“E mafai ona faapea o le manatu e taua i isi lou tulaga faaletagata, ma le faaali atu fo'i e te aloa'ia ma faatauaina le mafutaga ma isi tagata. O so'otaga uma faaletagata, e sili ona taua."
Na ia ta'ua o so'otaga uma nei e taua ma e iai auala e faatinoina ai, e pei o le ofo o lou taimi i se 'au'aunaga faia fua mo nisi le volunteering.
“O le ofoina o lau tautua e aunoa ma se taui, [volunteering], o se auala lea e te feso'ota'i ai ma isi tagata e tutusa outou lagona ma 'aufaatasi i le ofoina o se 'au'aunaga, e pei o le tautuaina o se Kalapu ta'alo.
“E iai se 'au tou te ta'a'alo ai pe tapua'ia, ma e tasi le sini autu o le fiafia ma le fia manumalo."
Peita'i, e iai isi e fiafia e nonofo to'atasi ma le manana'o e nonofo faatasi ma nisi.
“Ae tusa pe nonofo ta'ito'atasi i latou, e iai lava o latou so'otaga ma isi tagata i auala ua latou malilie iai."
Ua fautuaina e le faalapotopotoga le Beyond Blue auala e mafai ai e tagata ona feso'ota'i ma mafuta ma isi tagata e aofia ai le fa'aaogaina o le Skype, Zoom, FaceTime ma apps e pei o le House Party e feso'ota'i ai i luga o le video chat.
E fautuaina fo'i e le Beyond Blue le fuafuaina ma faatulagaina o feiloa'iga faifaipea ma isi tagata, e pei o se kalapu faitau tusi, trivia, fai 'aiga ma lou aiga i se fale'aiga, ma le tele lava o auala e feso'ota'i ma talanoa ai ma aiga ma uo.
5. Siaki 'oe lava ma nisi e pele ia te 'oe.
O le taimi Sa ma Vavao i puipuiga o le KOVITI-19 o se faata'ita'iga i le taua tele ona tausi lelei ia te 'oe ma nisi e pele, e pei ona faaalia e Prof Tiedeman.
“Ou te iloa le taua tele. Ia te a'u, o le isi vaega na sili ona ou popole iai o matua ma tagata matutua o loo puipuia i Sa o le faama'i, ma pe o maua uma mea latou te mana'omia."
“Ae tele ina e le iloa o loo e amoina le avega mamafa i le popole ma le atuatuvale. E taua ai ona siaki ia te 'oe lava poo e malosi, ona e taua tele lou ola manuia ma maloloina."
E fautuaina e le Black Dog Institute se lisi o ni mea se 6 e mafai ona siaki ai lou tulaga manuia i vaiaso ta'itasi, e aofia ai lagona, faalogona o le tino, moe ma ou mafaufauga.
A mana'omia nisi faamatalaga ma fesoasoani lagolago, faafeso'ota'i le Lifeline mo fesoasoani 24-7 i le 13 11 14, Suicide Call Back Service i le 1300 659 467 ma le Kids Helpline i le 1800 55 1800 (mo tamaiti ma tupulaga 5 i le 25 tausaga le matutua). Mo nisi faamatalaga, asiasi i le Beyond Blue.org.au ma lifeline.org.au.
Embrace Multicultural Mental Health mo fesoasoani i tagata fai mai ma fa'aaogaina gagana e 'ese mai le Igilisi.
