Ua toe faamanatu mai le taua o le tausisia o le va mamao ma isi tagata ona le molimaui o le toe pepesi o le COVID-19 i Melbourne - Melbourne coronavirus clusters.
Ae o le lapata'iga i tagata i le tulaga lamatia mai le pepesi o faama'i e afua mai i le feasogi poo le Kisi, e le o se mea fou nei. O se lapata'iga masani i tausaga ua mavae ae maise le taimi na pepesi ai le faama'i o le TB (mama pala) i le senituri na te'a nei i Ausetalia.
Faitau atili: This isn't the first global pandemic, and it won't be the last. Here's what we've learned from 4 others throughout history
I le amataga o le senituri na te'a nei (20), na fautuaina tagata na a'afia i le TB ina ia 'aua ne'i feasogi ma isi tagata o latou aiga poo uo e puipuia ai le pepesi o le faama'i.
I le1905 i le fonotaga faavaomalo, le International Congress on Tuberculosis i Paris, na faamatalaina ai le feasogi (Kisi) o se "amio le saogalemu ma e mafua mai ai le anoano o faama'i pepesi."
I Western Australia i le 1948 o le ulutala i se lomiga a le Tuberculosis Association na faapea mai - “Kissing can be Dangerous: Doctors and Married Men are agreed on this”. ("O le Kisi e le saogalemu: Ua 'autasi iai finagalo o foma'i ma asli'i faaipoipo")
O le taofia o le Kisi ma le fepa'ia'i o tagata, na o le pau lea o le auala na puipuia ai le pepesi o le TB se'ia o'o i le taimi na maua ai le vaila'au le antibiotic streptomycin ma isi vaila'au i le faai'uga o le taua lona lua o le lalolagi e tau mai i le 1950s.
O isi fuafuaga e pei ona tatou masani ai nei, o le tausisia o le va mamao ma isi tagata, atoa ai le tu-mama i le fufuluina o lima.
Na faatulafonoina e le malo ma pulega pitonu'u tulafono e faasaina ai le feanu i nofoaga faitele. O tagata na faamaonia le pesia i le TB, na faamalosia ona latou tau'aveina fagu mo le faamoemoe e feanu iai, poo ni solo pepa e faaigoaina o (Japanese paper), e tatau ona susunu pe a uma ona faaoga.
Lapata'iga i le Sa ona feanu i nofoaga faitele.
O tagata na faamaonia le pesia i le TB na faaigaoina o “Consumptives” ma na fautuaina i latou e ufi o latou gutu i le taimi e tale pe mafatua ai, ma 'aua le tautala latalata i foliga o seisi tagata.
Na fautuaina fo'i i latou e 'aua le inu 'ava malosi, ona o le popolega i le taimi e 'onana ai ma le pulea a latou amio ma lamatia ai le saogalemu o isi tagata i le pepesi o le faama'i.
Na manino le fe'au. O le TB o se faama'i e a'afia ai le tagata e to'atasi, ma o soo se amio le pulea poo amio fa'ainaelo a tagata ua pesia, e pesia ai ma le to'atele o isi tagata.
Na fautuaina fo'i le matua faamama faalelei o fale. Fufulu faifaipea luga o laulau i se solo susu, fufulu le fola ole fale i lauti ma le suavai e puipuia ai le pefu e ono a'afia ai le soifua maloloina o le aiga.
Ua tu'u 'ese'ese ipu ma sipuni ma tui a le tagata ua pesia, na o ia e faaogaina. A mae'a ona faaoga, ona soka lea i le vaivela e tape ai le siama (bacteria) o le TB.
E le gata i lea, na faafale'esea pe tausi puipuia i seisi vaega o le lotoa - i le politito poo seisi fale i tuafale o le lotoa.
I le taimi e maliu ai lea tagata, e o mai sui o le matagaluega o le soifua maloloina e susunu uma ona 'ofu ma 'ie o lona moega.
E pei lava ona molimauina nei, na iai lapata'iga mo tagata uma e faia ni suesuega (tests) mo le TB i le 1950, atoa ai ma le fe'au o le tausisi i le tu-mama.
Tuliloaina o tagata pesia ma su'esu'eina
E pei ona molimauina i le faama'i o le coronavirus, na faia fo'i le galuega a le soifua maloloina o le tulitoaina o tagata na pesia i le TB ma nisi na latou fepa'ia'i pe felata'i ina ia suesue pe o pesia i le TB.
Na faia i le faua (spit) le suesuega, ma sa fautuaina tagata e tausi puipuia mo le taimi ae o faatali le faai'uga o le test.
Na faamalosia fo'i tagata uma i Western Australia 14 aga'i i luga le matutua e faia fa'ata o le fatafata i le 1950. Na faatulagaina clinics faapitoa mo le faia o fa'ata, ma e o'o mai i le 1960, ua faamalosia le faia o fa'ata o le fatafata mo tagata uma i Ausetalia.
Soo se tagata na musu e faia lana fa'ata, na 'ave i le falepuipui ma faamalosia le faia ai o lana fa'ata.
X-rays in the outback, part of mass screening for TB. Alan King, Author provided
Tausi puipuia mo tausaga e tele
O tagata na a'afia i le TB ma ua tigaina ai, na tausia i nofoaga e faaigoaina o sanatoria. O le Sanatoria na va'ai iai o le la'asaga mulimuli lea o le soifua o lea tagata, ona e le'i iai se vaila'au e tape ai le TB, faato'a maua i le 1947.
O tagata na tausia i le sanatorium o se faasalaga solo atoa. E le'i mafai ona felata'i ma aiga ma fanau ona o le puipuiga o isi tagata mai le pesia i le TB. 
Falema'i faapitoa (sanatoria) e tausi puipuia ai tagata ma taofia ai le pepesi o le TB . Author provided
O le 1958, na amata molimauina ai le taofia ma le faasolo atu ina soloia le TB mai Ausetalia nei.
O le a se lesona ua maua mai ai?
O le COVID-19 ma le tuberculosis (TB) ua molimauina le matua tele o le a'afiaga i le soifuaga o tagata. Peita'i, o le 'ese'esega i faama'i nei e lua, ona o le COVID-19 o se vairusi e le'i maua iai se vaila'au e tete'e atu ai, ae o le TB e mafua mai i se siama (bacterium), ma ua iai le vaila'au, le vaccine e tape ai.
E ui i le iai o le vaccine, na lipotia e le World Health Organisation e to'a 1.5 miliona tagata i le lalolagi na maliliu mai le TB i le 2018.
Ae o faia le galuega a foma'i ma saienisi i le sa'iliga o se vaccine e togafitia ai le coronavirus, pau le 'a'upega o loo tatou umia i le taimi nei o le tausisia o le tu-mama, le va mamao ma isi tagata, le tuliloaina o i latou ua pesia ma tagata na latou fepa'ia'i.
IOE, e ono lamatia lou saogalemu mai le KISI poo le feasogi.
Share
