Ua sauni le teutupe o le malo tele Josh Frydenberg e laulauina mai lana tala i le tupe i le po ananei.
O le tala i le tupe mulimuli lenei a le faigamalo a le so'ofaatasiga (Liberal/National) ae le'i faia palota mo le palemene tele i le Aso 21 o Me o le tausaga nei.
Ae le'i lauina mai le tala i le tupe, na atagia i se faamatalaga a le teutupe le iai o no vaega faamama'avega i aiga i le taugata o le tau o le soifuaga i lenei vaitaimi, e pei o le penisini lea ua 'ova i le $2 i le lita le tau.
Ua faaalia e se sui o le Labor, o le tala i le tupe o le a faasuamalie e le malo tele mo palota o loma nei.
**********************************
Ua toe lapata'ia fo'i tagata i nisi o alaalafaga i le itu i Matu o New South Wales ina ia tu'ua o latou fale ma sa'ili lafitaga i nofoaga lavea'i ona o le tulaga lamatia ua toe iai i le tetele o lologa ma tafega i se taimi lata mai.
O nisi o 'a'ai na sili ona a'afia i lologa i le masina talu ai, e pei o Mullumbimby ma Billinudget, Lismore ma Kyogle ua lapata'ia e tu'ua nei o latou fale.
Na faaalia e le pulenu'u o Lismore, Steve Krieg, o se tulaga e matua faanoanoa ai le toe asia o le 'a'ai e tafega ma lologa ae e le'i mae'a ona tapena le a'afiaga mai lologa o le masina na te'a nei.
**********************************
O loo faapena fo'i ona iai lapata'iga i le tetele o tafega ma lologa i nisi o vaega o Queensland.
Ua faatonuina tagata i Dalby e tu'ua o latou fale ma aiga ona o le tulaga lamatia ua iai mai le tetele o lologa.
E to'atasi le tagata, o se alii ua maliu i Toowoomba ina ua tafea lana taavale i le tetele o lologa.
***********************************
O loo tigaina se tasi o tagatanu'u Rusia, o se alii Billionaire na muamua lauiloa i le lalolagi ina ua ia faatauina le kalapu soka a Chelsea i Egelani, Roman Ambramovich.
E faapea se ripoti na a'afia o ia i se vaila'au 'o'ona ae o feutaga'i ma sui o le faigamalo i Ukraine se tali filemu e faamuta ai le taua e pei ona faagasolo nei ma le osofa'iga a Rusia.
Na ta'ua i le ripoti na a'afia ai fo'i ma sui o le malo Ukraine i lenei vaila'au 'o'ona.
*************************************
Ua faaalia e le palemia setete o Vitoria, premier Daniel Andrewsx, lona pesia i le KOVITI-19, ma o le a le mafai ai ona auai i sauniga faamanatu o Shane Warne lea o loo faamoemoe e faia i le MCG i le po a taeao.
*************************************
