Ua maliu i Lonetona i Peretania le alii lauiloa i lana taleni tusi ata ma polokalame a tamaiti i le televise, Rolf Harris.
E maliu nei Rolf Harris ua 93 tausaga lona matua, ae o le a le manatuaina o ia i le tele o tausaga o ana faafiafiaga ma lana taleni tusi ata, ae o ona moliaga i le faia o feusua'iga faamalosi i le fanau teine mo le tele o tausaga.
O moliaga na faamonia i le faamasinoga i Lonetona i le 2014 ma faasalaina ai o ia i le fale puipui mo le 5 tausaga ma le 9 masina.
Na fanau Rolf Harris i Perth i le 1930 ma na a'oga i le Iunivesite o Western Australia mo ni tausaga ae le'i i'u ai ma se faailoga tikeri.
Na malaga i Lonetona ma lauiloa ai i lana taleni pese ma tusi ata. (O lana pese Tie Me Kangaroo Down Sport na o'o i le top 10 poo pese aupito mo'omia e 10 i le charts).
E le gata i lea, na amata ona ia fofogaina ata mo tamaiti i le televise, pepese faatasi ma le fa'aili lauiloa le Beatles, ma ia tusia pe valiina se ata o le tupu tama'ita'i Elisapeta II.
O lona pa'u mai le maualuga o le mamalu ma vi'iga i le avea ma pagota i le fale puipui, na amata ina ua faia ni tu'ua'iga a se tama'ita'i i leoleo na ia molimau ai e 'ova i le 20 tausaga o faia e Rolf Harris feusua'iga faamalosi ia te ia.
I le 2014, na aumai ai le faai'uga a le faamasinoga e faamaonia ai moliaga e 12 o Rolf Harris i feusua'iga faamalosi ma ni teineiti i le va o le 1968 ma le 1986.
O nisi o teineiti na o le ta'i 7 tausaga le matutua i le taimi na faia ai e Rolf Harris feusua'iga faamalosi ma isi faiga mataga ia te i latou.
Na aumai ai le faasalaga o le 5 tausaga ma le 9 masina i le fale puipui, ma avea ai Rolf Harris ma pagota ae ua 'ova i le 80 tausaga lona matua.
O se tasi na sauaina e Rolf Harris, o le tama'ita'i o Karen Gardner, ua 61 nei tausaga lona matua, ae na ia faaalia e faatolu ona faia e Harris faiga mataga ia te ia i le 1977 ae faato'a 16 tausaga lona matua ma o faigaluega i le polokalame Star Games i le televise.
"It was humiliating and degrading and awful, and your blood turns to concrete. You can't believe this is happening - and I have no doubt what was happening. I cannot explain to you what his eyes look like; the triumph in his eyes. You knew that he'd won and you'd lost, but you hadn't even had a chance to defend yourself."
E ui i lea, na fa'aauau ona te'ena e Rolf Harris lona faia o ni solitulafono ma tuua'iga e pei ona faasalaina ai.
Na faaalia i se faamatalaga mai lona aiga na maliu Rolf Harris mai se kanesa i le 2 vaiaso ua tuana'i, ae faato'a resitara aloa'ia i Peretania le maliu ananafi, le Aso 23 o Me.
Na faaalia e Mark Borkowski o se tasi e tusitala i faafiafiaga, o le a sili ona manatuaina Rolf Harris i ana soligatulafono ae le o ana taleni.
"People will remember him as an entertainer, remember for a period of time as unique, that he actually lived in the hearts of the nation - and also was pretty good at reinventing himself. You know he took to the main stage at Glastonbury. He became one of those guilty pleasures for the rock and roll world. But he will be remembered unfortunately for his crimes."
E maliu nei Rolf Harris na te le'i Ioeina ana soligatulafono pe faato'ese i le to'atele o teine ma tama'ita'i na ia sauaina.
Na toe soloia ma faafo'i le tele o faailoga taualoa na faae'e ia te ia i Ausetalia nei ma Peretania - e aofia ai faailoga na tau'a'aoina iai e le tupu tama'ita'i Elisapeta II.
If you or someone you know needs support, contact Lifeline crisis support on 13 11 14, Suicide Call Back Service on 1300 659 467 and Kids Helpline on 1800 55 1800 ((for people aged 5 to 25)).
More information is available at beyondblue.org.au and lifeline.org.au.
Anyone seeking information or support relating to sexual abuse can contact Bravehearts on 1800 272 831 or Blue Knot on 1300 657 380.
(That story by Ciara Hain for SBS News, produced by Ioane Lafoa'i for SBS Samoan.)
Share
