E ui ina faasa'olotoina Katinale George Pell i se faai'uga a le High Court, e le o uma ai masaloga i lona sao i le sauaina o fanau i le taimi o galue i le Ekalesia Katoliko Roma i Melbourne.
E pei ona silafia, o tu'ua'iga na molia ma faasalaina ai Pell i le falepuipui na afua mai i le 1996, i le taimi o ia umia le tofi taualoa o le Archbishop of Melbourne, lea na ta'ua ai e se tama na faia ia te ia e George Pell ni feusua'iga faamalosi solitulafono. E le gata ia te ia, ae o se tasi tama ua maliu ina ua pule i lona ola - o i la'ua o ni tamaiti na pepese i le 'aufaipese a le malumalu St Patrick's Cathedral lea na ia molimau na faia ai le solitulafono.
Peita'i i molimau na tu'uina i luma o le Komisi Su'esu'e, le Royal Commission into Institutional Responses to Child Sexual Abuse, e iai molimau na 'redacted' pe na taofia ona tu'uina i luma o le faamasinoga o Katinale Pell.
Ona o lea ua soloia moliaga o George Pell, ua faatagaina ai nei ona faaalia molimau ia na taofia.
Ua iloa ai nei le silafia e George Pell o patele e suafa ia Gerard Ridsdale ma Peter Searson, o nisi o patele na molia ma tu'ua'ia i le tele o soligatulafono i tamaiti. Peita'i e le'i iai se faai'uga poo se mea na faia e George Pell e puipuia ai le fanau mai sauaga a ona uso patele.
O Phil Nagle se tasi o tamaiti na sauaina i le taimi o a'oga i se a'oga a le Ekalesia Katoliko Roma i Ballarat i Melbourne i le taimi lena.
Na ia saunoa - 'He was hanging around the school all the time, when I was there, particularly in 1973 and '74, when he was living with Gerry Ridsdale, Father Ridsdale next door. There's no way a guy in that situation, especially an intelligent man like George Pell, didn't know something was going on.'
Na faaalia e le Komisi, e iai lo latou talitonuga na iloa e Pell soligatulafono na faia e ona uso patele i tamaiti, ae na ia ufiufia ina ia taofia le sosolo o faamatalaga ma iloa ai e isi tagata solitulafono ma sauaga i le fanau, e ui ina molimau Pell na te le'i iloa ni solitulafono a Ridsdale.
O Father Gerard Ridsdale na molia ma faasalaina i le falepuipui i solitulafono na ia faia i tamaiti e to'a 65 mai le tausaga 1960 e tau i le 1989, ma na faia i totonu o ni nofoaga ma a'oga e 13 a le ekalesia Katoliko Roma.
Na saunoa se tina na sauaina e se patele lana fanau teine ae o a'o'oga i se a'oga tulagalua a le Ekalesia i Melbourne, le tina o Chrissie Foster - 'They should have known already, they did know already. It's against their religion, it's against everything. Yet, they still did it. Not only did they do these crimes, they enabled their offenders to commit more crimes by not getting rid of them'
E maliu Father Peter Searson i le 2009, e le'i molia i se solitulafono e ui i le tele o tu'ua'iga na faasino ia te ia, e aofia lona saua i le sasaina o tamaiti ma lona faia o feusua'iga faamalosi.
Na saunoa Dr Viv Waller na tula'i mo nisi o le fanau na sauaina ma o latou aiga, o le mea e taua ia te ia, o le faaaliga i le ripoti a le Royal Commission ua atagia ai le talitonuina o molimau na faavae ai tu'ua'iga a le fanau i patele o le Ekalesia na sauaina i latou.
'We understand that there are very good reasons why parts of the report have been redacted for so long. But it is a great relief to our clients to finally have access to the Royal Commission's thinking about a number of important matters.'
O loo tumau pea George Pell i lana molimau na te le'i iloaina ni solitulafono na faia e Father Gerard Ridsdale ma Father Peter Searson
i le taimi na latou galulue faatasi ai i Melbourne.
Redacted Royal Commission Documents. Source: SBS
_______________________________________________________________________________________________________
Share
