I isi tala.....
Ua faaalia e Ukraine le tu'ua ai o le nofoaga niukilia o Chernobyl e fitafita a Rusia.
Na ta'ua i se tasi ripoti le a'afia o fitafita Rusia i 'ave poo le radiation mai le nofoaga.
Ae ua faia se asiasiga a le minisita o le vaifafo mai Rusia Sergei Lavrov i Initia mo talanoaga ma le palemia Narendra Modi. O Initia se tasi o atunu'u na le'i palota e tete'e i le osofa'iga a Rusia o Ukraine i le fono a malo 'aufaatasi.
************************************
Ae ua toe faaopoopo fesoasoani militari a Ausetalia mo Ukraine ina ua mae'a ai se saunoaga a le peresitene o Ukraine Volodymyr Zelenski i le palemene tele ananafi.
O lenei saunoaga na faia mai i luga o se video link ma na tali iai le palemia Scott Morrison ma le ta'ita'i o le itu-agai Anthony Albanese.
***********************************
E $2.5 Billion le aofa'i ua folafola e le ta'ita'i o le Labor ma le itu-agai Anthony Albanese mo 'au'aunaga i le tausiga o tagata matutua pe a manumalo i faigapalota o loma nei.
I lana saunoaga tali fuaitau i le tala i le tupe a le malo tele, na faaalia e Albanese, o le a mautinoa ai le iai o se tausima'i pasi i taimi uma, le siitia o le aofa'i o le 'aufaigaluega ma siitia le tulaga i taumafa mo tagata matutua o loo tausia ai.
**********************************
Ma o loo malosi le vala'au mai le ta'ita'i o le Labor i le palemia Scott Morrison e taloina vave faigapalota ma faailoa tonu mai se aso e faia ai.
*********************************
Ua toe feagai fo'i 'a'ai ma pitonu'u i Matu o New South Wales ma le tetele o lologa ma tafega.
E toe a'afia Lismore ma vaega o le Northern Rivers e le'i mae'a lelei ona tapena mea na faaleagaina i le tetele o lologa i le masina o Fepuari.
*********************************
I taaloga...
O le a sa'ili e le 'au mai Ausetalia ma Egelani le siamupini o le Ipu o le lalolagi i le Kilikiti a tama'ita'i e pei ona faagasolo nei i Aotearoa.
__________________________________________________________________________________________________________________
