O loo saoasaoa le pepesi o le KOVITI-19 i Initia, ma o loo faitau selau afe tagata i le aso o loo pesia ai mo le taimi muamua.
I le 3 masina ua tuana'i, ua faaluaina le aofa'i o tagata e pesia lea ua 'ova nei i le 20 miliona e tusa ai ma se fa'aaliga mai le malo Initia, ae o loo talitonu nisi o le fuainumera sa'o o tagata pesia e sili mamao atu.
Ua 'ova i le to'a 220,000 tagata i Initia ua maliliu mai le faama'i KOVITI-19.
O se va'aiga maoa'e le to'atele o loo maliliu i nofoaga faitele ona ua matua leai ni avanoa i falema'i - o le tu ma le aga i Initia o le susunuina o tino maliu, ma o se tasi lenei o va'aiga le tele o afi i nofoaga faitele o loo susunuina ai tagata ua maliliu mai le faama'i. .
Ua atili faigata le tulaga ua iai Initia ona o le fela'asa'i ai o itu'aiga eseese o le vairusi poo variants, ma se faai'uga a le malo e faataga tagata e faitau selau afe ona potopoto i le faamanatuina o nisi o sauniga taua i le talitonuga Hindu.
O loo aupito saoasaoa le pepesi o le faama'i i Initia nai lo seisi lava atunu'u i le lalolagi, ma ua foliga mai ai e mamao i luma se taimi e soloia ai le Koronavairusi mai le paneta.
O le to'atele o tagata ua maliliu i le faama'i i Initia, e mafua mai i le 'uti'uti o le sapalai o le Okesene, le leai o ni avanoa i falema'i. atoa ai ma le faigata ona faia ni suesuega poo tests.
I se ata o le televave o le pepesi o le faama'i i Initia, e to'a 65,000 i le aso tagata na pesia i le masina talu ai ma le to'a 300 na maliliu ai. O lea ua to'a 370,000 tagata pesia i le aso e tasi, ma le 'ova i le 3,000 tagata maliliu i le aso.
O analeila (Aso Lua 4 Me), na lipotia mai e le matagaluega o le soifua maloloina i Initia le pesia o tagata e to'a 357,229 ma le to'a 3,449 na maliliu.
Peita'i e le o talitonuina le sa'o o nei faamaumauga ona o le auala o loo aoina ai ma le to'atele o tagata i lea atunu'u.
