Ua faaalia e le palemia Scott Morrison se iloiloga faapitoa o le faatinoina o galuega a tagata o loo faigaluega i le palemene ma le tulaga saogalemu mai faiga solitulafono. Ua toe lalaga mai luga lenei mataupu ina ua faailoa i se ripoti le faia o su'esu'ega a leoleo i se tagi a le tamaita'i o Brittany Higgins o loo ia tuua'ia ai se ali'i na la faigaluega faatasi i le palemene, i le faia o feusua'iga faamalosi ia te ia i totonu o le ofisa o se minisita ia Mati o le 2019.
Ua manumalo se aiga mai Sri Lanka i le faamasinoga maualuga ina ua te'ena e faamasino uma o le Federal Court le apili a le malo tele ma ua mafai ai nei e le aiga ona nonofo i Ausetalia. O le aiga lenei e tele tausaga o nonofo i Biloela i Queensland ma na fanau ai se tama teine. Na amata saisaia le aiga ia Mati o le 2018 ae na taofia ona tipoti i lalo se faatonuga se injunction a le faamasinoga, ma faagasolo ai le mataupu i faamasinoga.
E ui i le faaopoopo o le aofa'i o tagata ua faamaonia le pesia i le KOVITI-19 i Melbourne, ua faaalia e le malo Setete i Vitoria, o le a tatalaina a taeao Sa ma Vavao e pei ona amata faamamaluina mai le Aso Sa na te'a nei. Na faaalia e le palemia Setete, Daniel Andrews, o loo silasila lana faigamalo i le faavaeina o nofoaga e tausi puipuia (quarantine) ai tagata e malaga mai fafo, e suia mai i faletalimalo e pei ona amata pepesi ai le faama'i.
Ma ua saisaia ma molia e leoleo i Sini le alii o Scott Miller, o se tasi na i le 'au 'a'au a Ausetalia i le Olympics i le fe'avea'ina poo le aumaia i Ausetalia o vaila'au faasaina e faatusa i le $2 miliona le tau pe a faatauina. O Scott Miller, 45 tausaga le matua, na saisaia mai lona aiga i Rozelle ae o se tasi ali'i e 47 tausaga le matua na saisaia mai lona aiga i Balmain. Na faaalia e leoleo o loo molia i la'ua i le 'auamaia faasolitulafono o le vaila'au faasaina le 'aisa i Ausetalia.
